Apostolmi 3 - Sumi Naga CL (Re-edited) Bible (BSI)

Apukhu Kinita kemi Shipivi

¹ Ghulo lakhi Peter ngo John pama no avelau ayi küthü kihe kighini lo achineki lo iqhoche.

² Ikelo Jukivi Khagho lo timi lakhi apunu lono apukhu kinita kemi tsalakipe xapuwo qhino achineki lo iloche kemi vilo pisa khuchu chekeu khape cheghi.

³ Peter ngo John pama achineki lo iloche keu ithulu no pa no pisa khu.

⁴ Pama no thüghüi pa juno Peter no pi, “Nikujo julo.”

⁵ Pama launo kiuala ithulu nanie pi huqhe ghi pa no tsaqüi ju.

⁶ Ikemu Peter no pi, “Nikujo ye ghükayi na ameshoyi namu kühae, ikemu I no kiu ani keno o tsüni. Nazarethmi Jisü Khristo je lono ithu no alache lo!”

⁷ Pa no pa u ajeu no pa sünhe puthu kemtsa pa pukhu ngo alaunhe mtotoive.

⁸ Pa no ilhethu puthughove no alache thuve, eno ilhe iku-iqi alachesü Ampeu sheqhe ghi pama sasü achineki lo ilove.

⁹ Timi kümtsü no pa no alachesü Alhou sheqhe akeu ithulu,

¹⁰ eno pa ye achineki Jukivi Khagho lo iqa no khuchu chekeu kepi michive. Panongu no pa lau kiu shive keno ithulupe akichiqhi eno akümzave.

Achineki lo Peter Tsapi

¹¹ Pa no Peter ngo John pama phivilo akelono, timi kümtsü no shishe akichiqhiyi posü Solomon kisheqho ipikeu lo ighi.

¹² Kughou Peter no ti ithulu keno, pa no timiqo vilo pi, “Israelmiqo, kushiye nongu ye hi jupe akichiqhi ani, eno ni küka momu ni küxü kimthe huno timi hipau pelo alache lupe ketoi kutuxoxo ni juani kea?

¹³ Abraham, Isaac, eno Jacob Lhou, ni puasü Lhou no Pa qeu Jisü, khuu Pilate no kuqho pheveni pi keghi nongu no pa zülono akipimi tsüno milive keno, pa juküvüpu shive tsüae.

¹⁴ Nongu no Akimtheu eno Amikuchou milive no ghikiqhimiu kuqhophe tsülopi khuluve.

¹⁵ Nongu no aküxü Mpeu khuu Alhou no akithi lono xüputhuve keno, pa pithive. Ningu no tipau thopimi ke.

¹⁶ Eno pa je pülülu keu vecheo timi hi, khuu nongu no ithulu eno ithi ani keno, akumto tsüe, eno Jisü vecheo aküpülü huno nongu kümtsü zülono timi hipau phimpi shipivivae.

¹⁷ “Ikehu athiküzümiqo, I no ithi anike now yepemi toi nongu ghi mthano mlavae.

¹⁸ Ikemu Alhou no kiu Paw tungkupmi kümtsü vecheo azünatha Paw Khristo ye aghime shinani, ipi keno, Pa no ti shikupuve tsüe.

¹⁹ Tighenguno xaidelo, eno nongu xine nuxave tsü penike tsüghü ighilo,

²⁰ tishikeu lono Ampeu gholo akeu huno aghüthi püxülu peni, eno Pa no nongu ghenguno Khristo kishephe tsükeu, Jisü hu puwutsü penie.

²¹ Alhou no kushuo lono Pa kimthe tungkupmi vecheo pipüa ketoi, thokha athoputho moke kutolo, kungugha no pa saluve masae.

²² Moses no pivae, ‘Ampeu Alhou no nongu ghenguno tungkupu lakhi I toike nongu thiküzümi gholono ipipe nani. Pa no kiu kiu pimu nongu ye pa tsa ini masae.

²³ Pa no pikeu inimo keu ye timiqo launo kütüta shi püghave nani.’

²⁴ Samuel lono huthusü pa thiu tungkupu khijeno tungkuptsa piche keno kümtsü no atsala hipaqo ghili pi püani.

²⁵ Nongu ye tungkupmi nuli, eno Alhou no nongu puasüqo sasü puloshoqhi shikeu nuliqo ke. Pa no Abraham vilo pi, ‘O polo kughuko vecheo ayeghi lo alagha kümtsü kümghatsü nani.’

²⁶ Alhou no now kixikila lono sachile ighi no nongu kümgha tsüniye Pa qeu saputhupe atüghüshi nongu lau puwuke.”