Apostolmi 28 - Sumi Naga CL (Re-edited) Bible (BSI)

Malta lo

¹ Kütüsü mono ningu sawo toluve kethiu, züdoyeghi huye Malta kepi nino chilu.

² Tile küxümi no paküta keu kimiyekini ningu piye, kughengu tsüghuuve no süthi akehu, panongu no ami shino ningu kümtsü ikhilue.

³ Paul no asükügha amqo lakhi kichepe ami lo sükelo athicho pighi no akülü pumla no ipeghi püzü pa u lo hechije luve.

⁴ Kughou tipano ghami no pa u lo lhoxü hechijepe akeu ithulu keno, lakhino lakhi vilo pi, “Timi hipau ye mtsüqheino ghikiqhimie. Azüghi lono pojolu namu, Kuchou Xakütha huno pa püxü movae.”

⁵ Ikemu pa no lhoxü hu ami lo kilhesüve no kiumu pa shipüsa moe.

⁶ Pa ye ingu ipeghi momu züleno ikiqi thive nanie pi panongu no khea. Ikemu ado kushuo thiu ghi pa shou kiumu anguküsa ikughi move kelo, panongu no akükümsü kilive no pa ye alhoue piuve.

⁷ Ningu no ngo akeu phivilo züdoyeghi tipau kükau Publius yeghi ae. Pa no ningu ikhilu eno atsala küthü ningu kimiyeqhiyi pa kilo sasü.

⁸ Publius papu ye aghakimki ngo ajiküba no süae. Paul no pa xuju wuno pa u chhope pa shou beno inikhu tsü püzü shipivive.

⁹ Kughou hi shikeno, züdoyeghi lo küsükinimi kütami ghi ighi no shikipivi ithulu.

¹⁰ Panongu no ningu ghi akiqheu shi ikhilu, eno kughou ningu no cheve niye shive keno, nino avehupu shikeqo thokha panongu no peighi tsü.

Paul no Rome lo Ighi

¹¹ Aqhi küthü thiu, Alexandriami zükilu, züdoyeghi tipau lono süsü puwove keu lono ningu ye wuve, tipau lo alhou kinikishe julho ae.

¹² Syracuse lo ighi no ningu no atsala küthü ngove.

¹³ Tileno ningu ye vehosü Rhegium lo ighi. Eno atsala lakhi thiu, apeu mülhü ighi no ghulo akiniu lono ningu ye Puteoli lo ighive.

¹⁴ Tile ningu no küpülümi kusholu eno panongu no kusü kehu atsala tsüni panoqo gholo ngove. Tishino ningu no Rome tolu.

¹⁵ Tile küpülümi no kughou ningu ghili chilu keno, Appius Lhikishi-a ngo Aghüzüki Küthü kutolo ningu sasü kusho niye ighi. Panongu ithulu kelo, Paul no Alhou shikimthi tsüno pa mlo kuloghi shikithelu.

¹⁶ Kughou ningu no Rome lo iloghi keno, Paul ye ghüshimi lakhi no pa kheno pa kutoshi ngolu penike azah tsü.

Rome lo Akelo

¹⁷ Atsala küthü thiu, Paul no tile Jewmi sakiphemi kukütsü. Kughou panongu no kumqolu keno, Paul no pi, “Athiküzümiqo, ni ye ni timi momu ni puasü khuaye shou kiumu mla pimi püamo kemu Jerusalem lono I küghape akughumi shi Rommi u lo süvetsü.

¹⁸ Panongu no I piqhijuve kethiu I pheve nike pulove, kughengu I pithive kepu jeku panongu ye kiumu phumlae.

¹⁹ Ikemu Jewmi no lakhave kehu, ni ye ni shiye shou nguku kepu kiumu küha kemu Caesar lau qhüiniju masave.

²⁰ Ikehu hipa vehu ghenguno ni ye nongu sasü kusho no küptsa niye kue, kughengu Israelmi lajupu ghenguno ni ye ayikichhe hipau no I tshüpe ani.”

²¹ Panongu no pi, “Ningu ye Judea lono o ghenguno yesü kiumu ithumla, momu athiküzümi tilano ighi kemi mu o ghili küsa pimoe.

²² Ikemu ningu ye o kükümsü kiu keno o launo chiluni shi ani, kughengu aqha kümtsü lo hipa mqo pipüsa akeu nino ithi anie.”

²³ Kughou pa sasü kushoni ke kihikütha tsala tove keno, panongu kutomo shesü pa kungo-a lo ighi. Inaqhe no avelau kutolo, pa no apasü shi Alhou yekipe shepe shitsü eno Moses Yezah ngo Tungkupmi kaku lono Jisü ghili pesü panongu züiza nike pükapütsa.

²⁴ Khami ye pa tsa no züluve, ikemu khami ye pülü tsümoe.

²⁵ Paul no atsa nhekha lakhi pive kethiu panongu dolo akükümsü küqha mlano ixawove: “Aghungu Kimthe no tungkupu Isaiah vecheo nongu puasü vilo ishi pikeu ye achipie:

²⁶ “‘Timi hipaqo lau wuno pilo, “Nongu no chilu nani kemu khilemu vethamla nani, nongu no ithulu nani kemu khilemu ithikuthu monani.”

²⁷ Kughengu timi hipaqo mlo ye mamaivae, pano kini ye chimlavae, pano nhethi miyi luvae, tikumo aye pano nhethi no ithulu, akini no chilu eno amlo no ithikuthulu no I lau tsüghü ighi kelo I no shipivi nosa kehue.’

²⁸ Tighenguno hi ithilo, Alhouw xakulu huye Jewkumomi lau puwuvae; panongu no chilu nani.”

²⁹ (Pa no hipa tsa pive kethiu Jewmi no pano dolono kütsala ixawove.)

³⁰ Ampe kini kutolo Paul ye pa no ame süghi ngoche, eno pa lau ighi kemi kümtsü sasü kusholu no

³¹ mtotoi lakükha kühano Alhou yekipe ghili sheshu eno Ampeu Jisü Khristo ghili pesü kütsü shikache.