Apostolmi 26 - Sumi Naga CL (Re-edited) Bible (BSI)

Agrippa Zülo Paul no Pi

¹ Ikehu Agrippa no Paul vilo pi, “O ghenguno pilu penike azah tsü ani.” Paul no pa u sükhope pa shokükha tsa pi:

² “Akükau Agrippa, ni ye angukivi shi o zülono Jewmi no I nguku akeu lo I likhi I shokha niye ani,

³ akhoto no nono Jewmi khuaye eno kimpikile keu pasü kümtsü ithi ani. Tighenguno, kheakulushi I tsa initsü lopi I no o qhüiniju ani.

⁴ “I lhothe lono I küxü lhoaye, kishi hukuthu lo ni ghakhu eno Jerusalem lo xüache keno, Jewmi kümtsü no ithi ani.

⁵ Panongu no thopi shinike pulo aye, panongu ye ado kushuo lono ni ithi ighivae, ni chineye lo ayezah akümkau mqo Phariseemi shi ni ye xü ighivae.

⁶ Itehi I no hile atsa kükügha lo puthugho akeu ye I no Alhou no ni puasü lau piqhikeu lo lajupu akeu ghenguno ke.

⁷ Hi ye ni shiaye chighikini no ithuluni ke lajupu qhino putho pucho müamzü Alhou mlla chekeu ke. Eno hipau lajupu ghenguno Jewmi no I nguku ani, O akükau!

⁸ Alhou no kithimi xüputhu chekeu lo kushiye nongu khami ye mzaqhiyi kümsü ani kea?

⁹ “Niu ghi Nazarethmi Jisü je mjochile nike tolukivi thaqhü mla masae pi kümsüche.

¹⁰ Titoi ni ye Jerusalem lo mla püani. Achinetomi launo azah pesü, küpülümi kutomo akughuki lo khathake likhi kumono panongu pithini kelo ni ghi Iw pulobe tsüke.

¹¹ Ghuthu kutomo I no sinagog lono panoqo ghime, Alhou thaigha penike pükapütsa, eno axukighide lono inaghami phughi kutolo panongu ghime wuke.

Paul no Xükithekulu Pi

¹² “Hipau kikime lono, ni ye achinetomi launo kükagha eno azah pesü Damascus lo wuche.

¹³ O akükau, puchomghü lo ala lo chekelo atsütsü lono aküvü lakhi I no ithulu, ti ye khetsünhe küvü nguno vüqai, eno tino ni eno I gholo chekeqo süho luve.

¹⁴ Kughou ningu kümtsü ayeghi lo iluqive keno, asütsa lakhi no Hebrew tsauno I pütsa keu I no chilu, ‘Saul, Saul, no ye kushiye I ghime ani kea? Ashu lo püsü pukuni keu ye o ghenguno kushokütsüe.’

¹⁵ I no pi, ‘Ampeu, no khuu kea?’ Ampeu no pi, ‘Ni ye Jisü, nono ghime akeu huke.

¹⁶ Ithu puthugho lo, kughengu avehu hipau ghenguno ni ye o zülo ipeghi ani, o pesü I qeu shino nono ni ithuluve keu eno itaghi I no o zülo ipeghi niye akeu pesü thopi shipeni.

¹⁷ I no ow timi ngo Jewkumomi, khunoqo lau I no o puwu ani keno, tipaqo launo o xaphelu nani,

¹⁸ panongu nhethi xükho tsüno no aküzü lono aküvü lo ipeghilu, eno Satan küka lono Alhou lau tsüghü ighilu, tishino panongu pelo axine qhikütsü ithulu no I lau aküpülü akeu vecheo shikimtheve kemi gholo a-a ithulu peni.’

¹⁹ “Tighenguno, O Akükau Agrippa, ni ye atsütsü lo kungunhetsü hebide püamoe.

²⁰ Ikemu Damascus lo paghi sheshu, tishino Jerusalem, Judea cheaxü kümtsü lo, eno Jewkumomi lau ghi Alhou lau xaide, eno tipau kiqi lono akümla lono piye lopi sheshue.

²¹ Hi ghenguno Jewmi no achineki lono I küghaluve no pithive niye shike.

²² Ishi tsala kutolo, ni ye Alhou launo ighikeu kukuphu ithulu kehu hile puthugho no kijemi kitilami lau ala süküpha mono tungkupmi ngo Moses no shinanie pi püakeu likhi ashepe tsü ani:

²³ ti ye Messiah ye ime masae, eno akithi lono xüputhuve kemi gholo amsüu shino pa no ni timi ngo Jewkumomi lau aküvü ghili sheshu nani.”

²⁴ Pa no hipaqo pi ghi pa shokha ake lono, Festus no asütsa kuloghi lono pi, “Paul, no ye o kükümsü aphi ije amovae, o kighithi kighiche no o kükümsü o shiküghüzüvae.”

²⁵ Ikemu Paul no pi, “Akiqheu Festus, ni ye I kükümsü achipishi ani, eno kuchou ngo tsaqütsalei keu tsa piani.

²⁶ Kughengu akükau ye hipaqo vehu ithi ani, eno pa vilo ni ye ighümo no piani. I no thebei ithi anike hipaqo lakhimu no ye mthakeu kühae, kughengu hi ye acheku lono shipüamoe.

²⁷ Akükau Agrippa, no ye tungkupmi pülü chenima? I no ithi anike no ye pülü cheni.”

²⁸ Agrippa no Paul vilo pi, “Hi ikhonheike dolono no ye I pelo Khristomi shive penike I züiza ani keo?”

²⁹ Paul no pi, “Ado ikhonhei shiaghi na kushuo namu, I no Alhou vilo khu akeu ye, o likhi kumono khunoqo ishi I tsa ini ani keno, ayikichhe no kumo aye kümtsü I toi luve penishi ani.”

³⁰ Tile akükau no ithuve, eno angh ngo Bernice eno panongu gholo iqa akemi kümtsü no puthughove.

³¹ Panongu ixawo chekelo lakhino lakhi vilo pi, “Timi hipau ye akithi momu akughu shiküzüpu shi püamoe.”

³² Agrippa no Festus vilo pi, “Timi hipau ye pa no Caesar lau qhüiniju püaghi moke aye, kuqhopheve kepushi akena.”