Apostolmi 25 - Sumi Naga CL (Re-edited) Bible (BSI)

Paul no Caesar Qhüiniju

¹ Festus no aghakhu lo ighi keu atsala küthü thiu, pa no Caesarea lono Jerusalem lo iqho.

² Achinetomi ngo Jewmi akhotomi no Paul nguku keu lhephe no tsüikhomo pa qhüiniju,

³ eno panongu pulou shitsü ghi Jerusalem lo Paul puqho tsülopi, kughengu panongu ye Paul no ala lo cheke lono pithive nike kuchughu ake.

⁴ Festus no Paul ye Caesarea lo qhipüani, eno pa ampi no kighithe tilau wuniye anie pi khochileve.

⁵ “Ikehu nongu gholo ampemi no I gholo ighi no timi huno kiuala pimi püaghi aye, pa shou akipimi tsülo,” ipi pa no pive.

⁶ Panongu gholo atsala tache ngo chighi dolo ngove kethiu, pa ye Caesarea lo iqive. Thoghiu pa no küghaki lo iqa no Paul saghi lopi azah tsü.

⁷ Kughou pa no ighi keno, Jerusalem lono Jewmi ighi keqo no pa sühope puthugho luve no thopi küha keu tsa pesü shishe pa nguku thuve.

⁸ Paul no pa shokha keu tsa pi, “Jewmi Yezah na, achineki na, Caesar shou namu ni ye kiumu pimi püamoe.”

⁹ Ikemu Festus no Jewmi pulou shitsü niye Paul vilo pi, “No ye Jerusalem lo iqho no tilau no hi o nguku akeqo pelo I zülono küghaju penishi anima?”

¹⁰ Ikemu Paul no pi, “Ni ye Caesar küghaki zülo puthugho ani, eno tileno I shou küghatha tsü masae. No ampi no akivishi ithi aketoi ni ye Jewmi lau kiumu pimi püamoe.

¹¹ Tsala I no akumou kümlami shiaghi eno I kümla lhoksa ghenguno thive küzüpu shiaghi aye, ni ye akithi lono pojolu nike khuamoe. Ikemu panongu no I nguku akeu no kuchou kumo aye, khunomu I pesü panongu tsüve mlae. Ni ye Caesar launo xatha nike khuani.”

¹² Tileno Festus no paw hohomi sasü küptsave no khochile, “Nono Caesar launo xatha nike khuke toi Caesar lau wuniae.”

Agrippa ngo Bernice Zülo

¹³ Atsala hami thiu, akükau Agrippa ngo Bernice pama Caesarea lo ighi no Festus sasü kusholu.

¹⁴ Pama no atsala kutomo ngo akehu Festus no akükau zülo Paul tsakükügha vehu pesü pi, “Hile timi lakhi Felix no akughu shipüaghi keu ani.

¹⁵ Kughou I no Jerusalem lo wu keno, Jewmi gholo achinetomi ngo kichimi no pa nguku akeu vehu pesü I lau ighi, eno I vilo pa shou aghime küghatha tsülopi qhüiniju.

¹⁶ Ikemu Rommi khuaye lo timi khuu nguku ani keno, pa no pa nguku akeqo sasü kinheqhe kusho no kiu ghenguno pa nguku ani keno pa shokhalu moke loye kütami u lo süve tsümlae pi I no panongu khochileve.

¹⁷ Ikehu kughou panongu no kümtsa hile ighi keno, ni ye ado süpushu tsümoe, ikemu thoghiu ye küghaki lo ngono timi hu sailoghi lopi azah tsüe.

¹⁸ Kughou pa nguku akeqo no puthugho keno, panongu ye I no kümsü aketoi nguku keu alhoksa süghimoe.

¹⁹ Ikemu panongu no pano chineye eno timi lakhi Jisü, khuu thive kemu Paul no xüani pi keno, tipaqo vehu lono pa sasü kimpie.

²⁰ Hipaqo vehu lo kishi phujumo kelauno, I no Paul vilo Jerusalem lo iqho no pa nguku akeu tilau no küghatha nima pi ighiju.

²¹ Ikemu Paul no akükau xakütha lunike ghenguno pa küghape püaghi tsülo pive kelo, I no pa pesü Caesar lau puwu moke kutolo, püaghini keu za tsüvae.”

²² Agrippa no Festus vilo pi, “Ni ampi no timi hipau tsa chiluni shi ani.” Festus no pi, “Nono thoghiu no chilu nani.”

²³ Ikehu thoghiu Agrippa ngo Bernice pama no qhivütsünyi ghüshitomi ngo aphughi lo akhotomi no sasü mishi kilo iloghi. Eno Festus zakütsü lono Paul sailoghi.

²⁴ Festus no pi, “Akükau Agrippa eno hile khije ani keno, nongu no timi hipau ithulu ani, pa ghenguno Jerusalem lo Jewmi eno hile akemi kümtsü no I lau muchho ighi no ighamku pa ye xüape kepu kumoe pike.

²⁵ Ikemu I no phulu keu no pa ye thive küzüpu kiumu shi püamoe. Eno pa ampi no akükau lau qhüiniju ketoi ni ye pa puwuve nike xathavae.

²⁶ Ikemu ni ye I mpeu lau pa vehu mtsümishei pilu kepu kiumu kühae. Tigheno I no pa sasü nongu zülo, eno akhotoshi Akükau Agrippa zülo saghi ani, tishianguno ningu no akivishi pa phuju kelo, ni ye kiuala yekulupu shinani.

²⁷ Kughengu akughumi lakhi shou kiu ghenguno atsa kügha ani keno mtsüqhei mono puwuni keu ye achipi kumoe.”