Apostolmi 24 - Sumi Naga CL (Re-edited) Bible (BSI)

Caesarea lo Felix Zülo

¹ Atsala pungu thiu achinetou Ananias no kichimi khami eno atsaküküghau Tertullus sasü Caesarea lo ighi. Panongu no angh zülo Paul nguku keu lheqhi.

² Kughou Paul kusaghi keno, Tertullus no hitoi Paul nguku: “Shishe akiqheu Felix, o vecheo ningu ye aloino acheni, eno o nhetsü vecheo akikili ni ghakhu lo süghi tsüe,

³ ala thokha eno a-a kümtsü lono ningu no shikimthi qhiyi ikhilu ani.

⁴ Ikemu o do vekha tsümoni kehu ow kikimiye lono ni tsa initsü nima pi I no o qhüiniju ani.

⁵ Timi hipau ye aküsü kupuu toi ayeghiqha lo Jewmi kümtsü gholo aküküpna xukutho cheni, pa ye Nazarethmi mqo lo atou ke.

⁶ Pa no achineki thotsü shikuchhube niye pükapütsa kemu ningu no pa küghaluve, eno ni yezah kiqi lono pa shou küghatha niyeshi,

⁷ ikemu zatsüu Lysias no ighi no ngukangugha shi ni u lono pa sawuve, eno pa nguku akeqo vilo o lau ighilo pi azah tsüve.

⁸ No ampi no timi hipau phuju kelono nino pa nguku akeu kümtsü nono phulu nani.”

⁹ Jewmi ghi hi nguku akeu kümtsü kuchou kepi küqha tsüe.

¹⁰ Kughou angh no Paul pelo pi penike kichetsü keno, pa no pi: “Nono ampe kushuo shiye hipau shou küghaküthau shi ighive keu ithi ani kehu, ni ye alokivishi I shokükha tsa piani.

¹¹ Nono phulu nanike hi atsala chighikini mu kumphi, I no Alhou mllani ye Jerusalem lo iqhoe,

¹² achineki lo, sinagog lo, eno aphughi lonomu panongu ye I no kütami sasü kighe momu aqokitikhi xukutho aghikeu ithumlae.

¹³ Tike kumono panongu no I ngukube akeu o vilo tikepi thebei pimla nani.

¹⁴ Ikemu I no o vilo piphe anike ni ye Alaghi, khikhi panongu no achineye mqo ipi ani keno, tipau kiqi lono ni puasü Lhou mlla, eno Ayezah lo akeu ngo Tungkupu kaku lo yepüa keu kümtsü pülü cheni.

¹⁵ Alhou khuu timi hipaqo no ikhilu cheni keno, Pa shou Iw lajupu achekeu ye amikuchomi ngo kixikilami kinikujo xüchilekulu anani.

¹⁶ Ikehu ni ye alhokuthu Alhou eno timi zülo I lolo kiviküsa lotsü tsüghükhüi qhinike pükapütsa cheni.

¹⁷ Ampe hami thiu no ni ye kümsagho eno akümllagho pesü ni shiye tsünike ighi.

¹⁸ I shikimtheve kethiu no panongu no achineki lono ni ithulu, eno tile aqokitikhi na mtomshu keu mu kühae. Ikemu Asia lo Jewmi khami noke,

¹⁹ panongu ye hile o zülo aghi kepu shia eno I shou kiuala aghi aye ngukube kepu shiae.

²⁰ Tikumo aye timi hipaqo pelo, I no Jewmi hoho zülo puthugho kelo, I kipimi kiu akeno piju pelo,

²¹ I no panongu zülo puthugho akelono ishi ighamku pikeu nguno kütau ye kiumu kühae: ‘Ishi tsala lo nongu zülo I tsa kügha akeu ye kithimi xüchilekulu vehu ghenguno ke.’”

Paul pesü Akughu Shive

²² Ikemu Felix no Alaghi vehu tsaqüi ithi akehu, panongu puwove ghi pi, “Zatsüu Lysias ighi kethiu no I no nongu tsa xatha tsüni.”

²³ Tishino Felix no aqhe zatsüu vilo Paul jukuto lopi azah tsü, ikemu pa pelo ililai ngope eno pa no avehupu shikeu pa küsami no süghitsü aye lakha kevilo pive.

²⁴ Atsala hami thiu Felix ngo pa nipu Drusilla, khuu Jewmi keno, pama no Paul kusaghipe, eno pa no Jisü Khristo lau aküpülü akeu ghili pikeu ini.

²⁵ Pa no amikucho, alikhi aghasükulu, eno küghakütha chekeu vehu apasü shi lhewo kelo, Felix ye thüghüive no pi, “Hi no tave aghilo, kughou adokivi ithuluni keno I no o ku puwuni.”

²⁶ Ikeghi Felix ye Paul no pisa pa tsüni mala lajuae. Ikehu ghuthu kutomo Paul kuno pa sasü küptsae.

²⁷ Kughou ampe kini wove keno, Porcius Festus no Felix züqhulo ighive. Eno Jewmi lopushi tsüniye Felix no Paul akughu shive.