Apostolmi 23 - Sumi Naga CL (Re-edited) Bible (BSI)

¹ Paul no tsaqüi hoho mpemi juno pi, “Athiküzümiqo, ni ye ishi kutolo Alhou zülo I kükümsü mtsümishei shi xüighivae.”

² Achinetou Ananias no Paul phivilo puthugho akeqo vilo pa kichi lo ghatsü lopi azah tsü.

³ Paul no pa vilo pi, “Alhou no o ghaqhi niye ani, no metsüghoi nuda püakeu tozü! No ye Ayezah kiqi lono I shou küghatha niye iqa apülaghi Ayezah bidela shi I heqhi lopi azah tsüni keshea?”

⁴ Tile akeqo no pa vilo pi, “No ye Alhou chinetou thaighani keshea?”

⁵ Paul no pi, “Athiküzümiqo, pa ye achinetou kepi ni ye mthae, kughengu ishi yepüani, ‘Timiqo shou yepemi vilo alhoksa tsa pimoni.’”

⁶ Kughou tile khami no Sadduceemi eno khami no Phariseemi shi akeu Paul no vethalu keno, pa no hoho lo sheshu, “Athiküzümiqo, ni ye Phariseemi, Phariseemi nuke. I no kithimi xüchilekulu shou lajupu akeu ghenguno atsa kükügha zülo puthugho ani.”

⁷ Kughou pa no hi pi keno, Phariseemi ngo Sadduceemi dolo kimpi ipeghive no hoho ghi kijeve.

⁸ Kughengu Sadduceemi ye xüchilekulu, kungumi, momu aghawu kühae picheni, ikemu Phariseemi ye hi kümtsü pülü cheni.

⁹ Tile shishe mqhumza ipeghive, eno Phariseemi mqo lo Ayezah shikükami khami no puthugho no aghoshi pi, “Ningu ye timi hipau shou akipimi kiumu phumlae. Aghungu momu kungumi no pa pütsa püaghi aye kiu pini kea?”

¹⁰ Kughou kimpikile ghi kihe kileuve keno, timiqo no Paul sütha pinyive nikeu kümsa no zatsüu no ghüshimi vilo panongu gholono anguka nomu Paul sasü ghüshimi kungo-a lo ilove lopi azah tsüve.

¹¹ Tipa ji Ampeu no Paul phivilo puthugho no pi, “Amlo mtolo, kughengu no ye Jerusalem lo kuchou thopi shivae, titoi Rome lo ghi thopi shimasae.”

Paul Pithini ke Kuchughu

¹² Kughou atsala ipeghi keno, Jewmi no kuchughu no Paul pithive moke kutolo panongu ye kiumu chusho monie pi ashoqhi shive.

¹³ Timi lhobidi shou no hitoi küsüqeve.

¹⁴ Panongu no achinetomi ngo layemi lau wuno pi, “Ningu ye Paul pithive moke kutolo achuqupu miche monie pi ashoqhi shivae.

¹⁵ Tighenguno itehi nongu eno hohomi küqha no achipi lono Paul vehu xatha tsüniye aketoi zatsüu vilo pa sasü nongu lau ighi lopi asütsa tsüpuwu lo. Ningu ye pa no aphivilo ighi mphi lono pithive nike kutope ani.”

¹⁶ Paul chepu nopu no kuchughu akeu chiluve, ikehu pa no ghüshimi kungo-a lo ilo no Paul vilo pive.

¹⁷ Paul no ghüshimi aqhe zatsüu lakhi kuno pi, “Apumi hipau sasü zatsüu lau wulo, kughengu pa vilo kiuala pikepu ani.”

¹⁸ Ikehu akijeu no pa sasü zatsüu lau saghi no pi, “Paul akughumi no I kuno apumi hipau no o vilo kiuala pikepu anie pi kehu pa sasü o lau wulo pie.”

¹⁹ Zatsüu no au lono apumi sünhe sawo lomoshi pa vilo ighiju, “No ye I vilo kiu pikepu ani kea?”

²⁰ Pa no pi, “Jewmi ye Paul ghili chixechilei ighiju niye akeshi küqha no o vilo thoghiu hohomi zülo pa saghi penike o vilo piniye ani.

²¹ Ikemu panongu pelo o züluvepe kevilo, kughengu timi lhobidi shou no Paul pithive moke kutolo chushomo nikeu ashoqhi shive no itshüpe pa khe ani. Itehi panongu ye kutope ow puloza khe ani.”

²² Zatsüu no pa vilo ishi pino puwuve, “I vilo hipau pithivae pikeu tsa khuu vilomu pi kevilo.”

Angh Felix lau Paul Puwu

²³ Tileno zatsüu no aqhe shou zatsümi kini kuno pi, “Itiji ayi toku kihelo ghüshimi 200, tipau gholo khurshimi 70, eno angu kipemi 200 ishi Caesarea kutolo wukepu shi kutolo.

²⁴ Paul ghengu ghi khurshi kuto tsüno pa khesawo angh Felix tolo.”

²⁵ Pa no yesü ishi yetsü:

²⁶ “Claudius Lysias no Akiqheu angh Felix lau ye ani, petha lulo.

²⁷ Timi hipau ye Jewmi no küghape pithive niye aghi kelono I no ghüshimi sawo xaphelu, kughengu pa ye Rome ghakütsami shi aghike.

²⁸ Kiu ghenguno pa nguku ani keno ithinishi kehu, panow hoho lau I no pa sawu.

²⁹ I no phulu keu no pa nguku akeu ye pano Yezah ghenguno shi aghi, ikemu pithive momu akughu shi küzüpu kiumu kühae.

³⁰ Kughou pa pithive niye kuchughu akeu I pithi keno, tipa mtsa I no o lau pa puwuve ani, eno pa nguku akeqo vilo ghi o zülono pa shou pikepu aghikeu pilo pivae.”

³¹ Ikehu ghüshimi no azakütsü kiqi lono Paul sasü putho lono Antipatris lo sawuve.

³² Thoghiu panongu ye pano kungo-a lo ideighive, eno khurshimi no Paul sasü wuvepe.

³³ Kughou panongu no Caesarea tove no yesü angh tsü keno, panongu no Paul ghi sawo pa zülo qhitsü.

³⁴ Yesü phive no pa no Paul vilo pa ye khuno cheaxü lono ighi keno ighiju. Eno kughou pa ye Cilicia lono ighie pi chilu keno,

³⁵ pa no pi, “O nguku akeqo no ighi kelono o tsa ini tsüni.” Tishino Paul pesü Herod kighiki lo qhino khe penike pa no azah tsüve.