Apostolmi 22 - Sumi Naga CL (Re-edited) Bible (BSI)

¹ “Athiküzümi eno apunoqo, I no nongu zülo I shokükha tsa pinike inilo.”

² Kughou pa no Hebrew tsauno pikeu panongu no chilu keno, panongu no alau qümüive. Pa no pi:

³ “Ni ye Jewmi, Cilicia lo Tarsus lono punu, ikemu mishighüna hipau lono saputhu, eno Gamaliel pukhuphi lono ni puasü Yezah kiqi lono akighithi ithulue. Ishi nongu kümtsü toi ni ghi Alhou ghenguno müamzü chekemi.

⁴ Hipau Laghi zükemi I no ghimeche, eno kiptimi totimi ghi I no tshüpe akughu shiche,

⁵ ti ye achinetou eno hoho lo kichimi kümtsü no thopi shilu nani. Panongu launo yesü khupe I no athiküzümi Damascus lo akemi lau pewu no tilau timi akeqo Jerusalem lo tshü sasü ighi no ghime niye kughue.”

⁶ “Kughou I no Damascus kupunuve keno, puchomghü lo paikhavi atsütsü lono aküvü kije no I yeluve.

⁷ Ni ye ayeghi lo iluqive eno asütsa lakhino I vilo pikeu chilu, ‘Saul, Saul, no ye kushiye I shikighime ani kea?’

⁸ I no, ‘Ampeu, no khuu kea?’ ipi kelo pa no I vilo pi, ‘Ni ye Nazarethmi Jisü, nono shikighime akeu huke.’

⁹ Timi khunoqo I gholo chekeno, panongu ye aküvü ithulu kemu I pütsa akeu sütsa vethamlae.

¹⁰ I no pi, ‘Ampeu, ni ye kiu shini kea?’ Ampeu no I vilo pi, ‘Ithu no Damascus lo ilolo, eno o pelo shipeniye kughu püakeu kümtsü tilau no o vilo pini.’

¹¹ Aküvü no I nhethi ghuchheve tsüno ni ye kiumu ithumlave kehu, khunoqo I gholo chekeno panongu no I u lono sünhepe Damascus lo iloghi.

¹² “Ananias ipikeu, Ayezah pülüthomi, tipa phughi lo Jewmi akemi kümtsü no pipivi chekeu

¹³ huno I lau ighi no I phivilo puthugho no pi, ‘Athiküzüu Saul, o nhethi tsükholu lo.’ Tipa mtsa I nhethi tsükho luve eno pa ithulu.

¹⁴ Pa no pi, ‘Ni puasü Lhou no o pelo Pa pulou ithi, Amikuchou ithulu, eno Pa no pikeu tsa chilu penike o süsüvae.

¹⁵ Kughengu nono kiu ithulu eno chiluve akeno tipau pesü kümtsü lau Paw thopi shiniae.

¹⁶ Imaye no ye kiu khe ani kea? Ithu no Pa je lono baptiz shiluve no o xine qhuvelo.’

¹⁷ “Kughou I no Jerusalem lo idewo achineki lono inikhu akeno, I no kungunhetsü lakhi ithulu,

¹⁸ eno pa no I vilo pikeu ithulu, ‘Mtazü Jerusalem lono ipeve lo, kughengu nono I shepe shikeu panongu ye ikhilu tsümo nani.’

¹⁹ I no pi, ‘Ampeu, sinagog atsütsü lo khunoqo o pülü aghi keno, tipaqo I no küghape akughu shino heqhi chekeu panongu ampi no ithi ani.

²⁰ Eno kughou ow thopiu Stephen ji pele akeno, ni ghi tile ae eno pulotsü ghi pa pithi kemi phimini hekütsü tsüae.’

²¹ Ikelo Ampeu no I vilo pi, ‘Wulo, kughengu Jewkumomi lau aghacheu I no o puwuni.’”

Paul eno Rommi Zatsüu

²² Hi kutolo timiqo no pa tsa initsü. Tithiu panongu no ighamku pi, “Timi hikithipu ye ayeghi lono ikhive lo! Pa ye xü küzüpu kumoe.”

²³ Panongu no ighamku aphimini kutho piye eno ayeghimkhu kunguu vepuku akelo,

²⁴ Zatsüu no pa sasü ghüshimi kungo-a lo saghi lopi azah tsü, eno asü pesü ghaqhi no timiqo ye kushiye pa shou hitoi igha ani keno ithi nike ighiju kideküdai lopi.

²⁵ Ikemu panongu no pa ghaqhi niye tshüve kelo, pa no ghüshimi aqhe zatsüu tile akeu vilo pi, “Rome ghakütsami eno akipimi küha keu shou hepukuni keu ye o ghenguno ayezah kiqilo keshea?”

²⁶ Kughou aqhe zatsüu no ti chilu keno, pa no zatsüu lau wuno pi, “No ye hi ye kiu shiniye ani kea? Kughengu timi hipau ye Rome ghakütsami ke.”

²⁷ Ikehu zatsüu no ighi no Paul vilo pi, “I vilo pilo, no ye Rome ghakütsami keshea?” Pa no, “Iyei” ipi khochile.

²⁸ Zatsüu no pi, “Ni ye aghakütsami shinike pisa kutomo no qhü püani.” Paul no pi, “Ikemu ni ye apunu lono aghakütsamie.”

²⁹ Ikehu khunoqo no pa ighiju kideküdai niye akeno, tipa mtsa pa launo tsüghüve, eno pa ye Rome ghakütsamie pi ithive kehu pa tshüve keu ghenguno zatsüu ghi msave.

Jewmi Hoho Zülo

³⁰ Ikemu thoghiu Jewmi ye kushiye pa nguku akeno ithini kehu, zatsüu no pa kuqhovepe, eno achinetomi ngo hoho kusho lopi azah tsü, eno pa no Paul sasü ighi no panongu zülo qhi.