Apostolmi 20 - Sumi Naga CL (Re-edited) Bible (BSI)

Macedonia ngo Achaia lo

¹ Aküküpna thiu, Paul no akhopemi kuno panongu mlo shikumto tsüno ileno alo pive, eno pa ye Macedonia lo wuve.

² Pa no tipa cheaxü qhalo wuno timiqo shikumto tsü, eno Greece lo ighive.

³ Pa ye tile aqhi küthü ngove, tithiu ashuka lono Syria lo wuniye akelono Jewmi no pa pithive niye kuchughu aghive kehu Macedonia küdau no ideighini ke kughuve.

⁴ Bereami Pyrrhus nu Sopater no pa sasü wuve; eno Thessaloniami Aristarchus ngo Secundus; Derbemi Gaius; Timothy ngo Asiami Tychicus ngo Trophimus

⁵ hipaqo no azüu no wuve no Troas lono ningu khe aghi.

⁶ Ikemu ningu ye Kholaqhi sümokeu Sho ghulhu thiu Philippi lono cheve, eno atsala pungu lono Troas lo panoqo lau ighi, tilau ningu ye atsala tsüni ngove.

Akithi lono Eutychus Xüputhu

⁷ Apine kithe lo atsala atüghüni, ningu no aghulhu shiniye kumqo akelo, Paul ye thoghiu wuve niye akehu pa no timiqo sasü küptsa anipi zübumta kutolo süpushuve.

⁸ Ningu no akeu kunguu chebo lo akulu kutomo ae.

⁹ Tile apumi lakhi Eutychus ipikeu ye Paul no shulo atsa pi auve kehu, alashe mütsü lo iqa ghi cheyi zühuve. Eno zücheive kehu pa ye aki jolha aküthüu lono ikiqive no khapeqhe kelo thive aghi.

¹⁰ Ikemu Paul no iqi no itsaqi püzü pa u no vapeno panoqo vilo pi, “Amlo kichi püha kevilo, kughengu pa lolo aküxü aphie.”

¹¹ Tishino Paul no kunguu ikuve no achuqupu chuve kethiu, tsütho moke kutolo küptsa ano cheve.

¹² Panongu no apumi hu thai aki lo sawuve eno ighono panongu mloqive.

¹³ Ningu no ashuka lono Assos lo wuve, kughengu Paul no pekithi tsüke toi tilau no pa saluni ye kughu, pa ye apukhu lono tilau ighini keu shiae.

¹⁴ Kughou pa no Assos lono ningu sholu keno, nino pa saluve no Mitylene lo wuve.

¹⁵ Thoghiu Chios ghüngü tolu, aghiniu no Samos tolu eno kuniu no Miletus tolue.

¹⁶ Paul ye Asia lono ado puwo moniye Ephesus kathasü wuniye kughuve, kughengu pa ye Pentecost tsalani Jerusalem lo tolu nike mighi cheke.

Ephesus lo Layemi Pütsa

¹⁷ Miletus lono Paul no Ephesus kukuhou lo kichimiqo pa lau ighi penike ku puwu.

¹⁸ Kughou panongu no ighi keno, pa no pi, “I no Asia lo I pukhu nesüke tsalani no kishi nongu gholo xükeno nongu ampi no ithi ani,

¹⁹ shishe aqhokighe eno anhezü kipiji shino Ampeu huthu, eno Jewmi no kuchughu keu vecheo ighono I pishipuju püani.

²⁰ Ni ye nongu kuphulu kepu tsa süchile mono mishi gholo eno aki-aki lono shika püani.

²¹ Jewmi eno Greekmi vilo ghi Alhou lau xaide ighi no ni Mpeu Jisü Khristo pülü penike thopi shi püani.

²² Eno itehi ye Aghungu no I pekülhü keu kiqi lono, I lau kiu shive nani keno mtha kemu ni ye Jerusalem lo wucheae.

²³ Aphughi kümtsü lo Aghungu Kimthe no akughukishi eno shiluküsa no I khe akeu kütüghü ani.

²⁴ I kimjiu ye Alhouw küpükini tsakiviu sheshu peni keu kümlapu saje khikhi Ampeu Jisü no I tsü keno ti shikupu luni malapi ani thono ni ye I küxü pesü ameküapu momu akughupu shi chemoe.

²⁵ I no ithi anike nongu khunoqo lau I no Alhou yekipe sheshuve akeno, itehi ye khilemu I ju ithulumae.

²⁶ Tighenguno ishi tsala lono I no nongu lau thopi shi anike nongu no pühave aye I makho kumoae.

²⁷ Kughengu Alhou kimji kümtsü pesü nongu vilo pikülha nike ni ye süchile püamoe.

²⁸ Nongu ampi jukütsükiyi lo eno Aghungu Kimthe no nongu pesü khunoqo shou jukükütsümi shive akeno, aloji kümtsü jukuto lo. Alhou kukuhou kheu shilo, ti ye Pa no Pa ji pesü qhüluvae.

²⁹ I no ithi anike I no cheve kethiu tüngtügha yiküsa no nongu gholo ighi no küpülümi lojiqo püxümo nani,

³⁰ eno nongu mqo lono akhopemi züluve nike atsa tuchighi kemi ipeghi nani.

³¹ Tighenguno tsükhüi alo, I no anhezü piji, ampe küthü kutolo tamono putho pucho nongu lakhikhi shika chekeu kümsü lulo.

³² Itehi ye Alhou lau eno Paw küpükini tsa lo nongu kulhuqhi tsü ani, tino nongu xaqhelu nani eno Paw shiluve kemi gholo nongu mheghi ighilu penani.

³³ Ni ye khuuw ameshoyi, ghükayi, aphimini mu mine püamoe.

³⁴ Nongu ampi no ithi anike I u pesü ni eno I gholo kichemi vehupu kümtsü lo mlaitha cheke.

³⁵ I no thokha lo nongu piyeve ake ningu ye ichheime mlano miqemlei kemi kuphu, eno Ampeu Jisü ampi no pikeu tsa kümsülu masae, ‘Tsükeu no lukeu nguno akümghapue.’”

³⁶ Kughou pa no hipaqo pive keno, panongu kümtsü sasü qhoqhünhe no akighini shi.

³⁷ Tile panongu kümtsü no qaukhave; eno Paul vape no müma,

³⁸ kütau nguno alau panongu no ighono amlo imeve keu ye panongu ye pa ju ithulu kithemae pi pa no pike ghenguno ke. Tithiu panongu no pa sawo ashuka lo phesüve.