Apostolmi 2 - Sumi Naga CL (Re-edited) Bible (BSI)

Aghungu Kimthe Ighi

¹ Kughou Pentecost tsala ighi keno, panongu kümtsü a-a lakhi lo ae.

² Paikhavi atsütsü lono asütsa lakhi amülhü kuloghi toi ighi no panongu no ngo akeu ki chhitoive.

³ Eno ami mili toi amqo-amqo shi panongu zülo ipeghi no lakhikhi shou ngove.

⁴ Aghungu Kimthe no panongu kümtsü shepichhive no Aghungu no panongu pelo pilupe kehu amili kütau no pithuve.

⁵ Tipa ghuloki lo aghakhu kümtsü lono amlo kütsümi Jewmi Jerusalem lo ae.

⁶ Eno aghügha chilu kelo aqokitikhi ighive no akümzave, kughengu kümtsü no atsa pi akeu pütüta tsauno chilu ke.

⁷ Panongu no akümzaqhiyi eno akichiqhipe pi, “Hi atsa pi akeqo kümtsü Galileemi ke kumo?

⁸ Imaye kishino ningu ye kümtsü no pütüta tsauno chilu ani kea?

⁹ Ningu ye Parthiami, Medemi, Elammi, eno Mesopotamia, Judea ngo Cappadocia, Pontus ngo Asia lo kungomi,

¹⁰ Phrygia eno Pamphylia, Egypt ngo Cyrene phivilo Libya lo kungomi, eno Rome lono ighi kemi,

¹¹ Jewmi eno Judah chineye luve kemi, Cretemi, Arabiami, ikeghi panongu no Alhouw akümzapu kümla ghili pikeu ningu tsauno chilu anie.”

¹² Kümtsü no akümzave no thüghüi lakhino lakhi vilo pikile, “Hi ye kiu kiqi kea?”

¹³ Ikemu khami ye thaigha ghi pi, “Panongu ye aji kithe shomzü ani.”

Pentecost Tsalani Peter Kükütsü

¹⁴ Ikemu Peter no chighiqhaqhi gholono puthugho no asütsa kuloghi lono timiqo vilo pi: “Judeami eno Jerusalem lo küamiqo, hi ithilo eno nongu kini kughope I tsa inilo.

¹⁵ Nongu no kümsü aketoi timi hipaqo ye shomzü amoe, kughengu itehi ye inaqhe ayi toku shiaphi.

¹⁶ Ikemu hi ye tungkupu Joel vecheo pipüa keu ke:

¹⁷ “‘Alhou no sheshu, ashekha tsala lo hitoi nani, I no timi kümtsü shou I Ghungu lepuku nani, no tianuli no tungkuptsa pi nani; now apumiqo no kungunhetsü ithulu nani, eno now muchomiqo no asamo pumo nani;

¹⁸ tipa ghuloki lo I qepumi ngo I qelimi shou ghi I no I Ghungu lepuku no panongu no tungkuptsa pi nani.

¹⁹ I no kunguu atsütsü lono akichiqhipu piye nani eno aqhou ayeghi lo aji, ami, eno amchhi phoboi amchipu piye nani;

²⁰ Ampeu juküvüpu tsala kije ighini ke zülo khetsünhe no zümoive nani, aqhi no aji toi huchuyive nani.

²¹ Khukhumu Ampeu je kulu keu ye xaluve nani.’

²² “Israelmiqo, atsa hipaqo inilo, Alhou no Nazarethmi Jisü nongu lau kophe tsüno pa vecheo aküka kumto, akümzapu eno amchipu kümla shikeu nongu ampi no ithi ani.

²³ Alhouw mtsümishei keu küpüghü eno azünatha kighithi kiqi lono Jisü hipau pesü nongu u lo süvetsü, eno nongu no aye kümthami u lono pa yedave no pithive.

²⁴ Ikemu Alhou no akithipu ghime shipühave tsüno pa xüputhuve, kughengu akithi ye pa küghape püamlave.

²⁵ Kughengu David no pa vehu ishi pi, “‘I no alhokuthu I zülo Ampeu ithulue, Pa no I u ajeu anike ni ye ithamoe;

²⁶ tigheno I mlo no alovi, eno I tsapi no alokivi shi; I phimpi ghi lajupu lono xü nani.

²⁷ Kughengu No ye I ngulho pesü Kithigha lo qhivemo nani, momu Ow Akimtheu pelo tsümave keu ithulu pemo nani.

²⁸ Nono aküxüpu la I piye; Nono I sasü akeu no I lopivi tsü nani.’

²⁹ “Athiküzümiqo, ni ye asü David ghili mtotoi pilu nani, pa ye thive no qhove, eno pa kumona ye ishi kutolo ningu gholo ani.

³⁰ Pa ye tungkupmi, eno pa lagha lo milakhi no pa kükalakhü lo ngo nanie pi Alhou no tushoqhi keu pa no ithi akehu,

³¹ pa no Khristo xüchilekulu azünatha ithulu, eno Khristo ye Kithigha lo qhive no tsümave moe pi pitsüe.

³² Alhou no Jisü hipau xüputhuve, eno ningu kümtsü no tipau thopimi ke.

³³ Pa süqhepe Alhou u ajeu qhive no Apu launo Aghungu Kimthe piqhi püakeu ithulu kethiu, nongu ampi no ithulu eno chilu akeu hi ye pa no ningu shou lepuku tsükeu ke.

³⁴ Kughengu David ye kungugha lo ikumo ikemu pa ampi no pike, “‘Ampeu no I Mpeu vilo pi, I u ajeu iqalo,

³⁵ I no o ghümi pesü o pukhu kinepu shitsü moke kutolo.’”

³⁶ Tighenguno Israel kibolomi kümtsü no mtsüqhei ithilo, Jisü khuu nongu no yedave keno, Alhou no pa pesü Ampeu eno Khristo kinikujo shive tsüae.”

³⁷ Kughou timiqo no hi chilu keno panongu mlo itapinyive no Peter ngo apostolmi kütami vilo pi, “Athiküzümiqo, ningu ye kiu shiveni kea?”

³⁸ Peter no panongu vilo pi, “Nongu xine qhivetsü kepushi xaideghi no Jisü Khristo je lono baptiz shilulo, eno nongu no Aghungu Kimthe gho ithulu nani.

³⁹ Kughengu ashoqhi ye nongu eno no tianuli eno khunoqo putou ani keno, Ampeu ni Lhou no Pa lau kulu kemi kümtsü ghenguno ke.”

⁴⁰ Pa no atsa kütau kutomo pesü thopi shino panoqo hakutho ghi pi, “Hi chighichilai keu tiqheli lono nongu ampi xalulo.”

⁴¹ Ikehu khunoqo pa tsa ikhilu keno tipaqo baptiz shivetsü, eno tipani timi 3,000 kutolo panongu gholo kihisü luve.

Küpülümi Kuposhukulu

⁴² Panongu no pano ampi pesü apostolmi shiküka eno kuposhukulu eno asho sükupho ngo akighini lo ikhiphe tsü.

⁴³ Apostolmi vecheo akümzapu eno akichiqhipu kümla kutomo shikelo timi kümtsü shou msaighü keu ikughive.

⁴⁴ Pülülu kemi kümtsü no kumqo no thokha aqü shiche.

⁴⁵ Panongu no pano mheghi ngo tinhemgha kümtsü jeve no avehupu shi aghi kemi lau küsaje che.

⁴⁶ Tsala kipetsü achineki lo kümtsa wu, eno panongu ki lono kümtsa alokiqi eno qhaqhilei shi chuqu-kusho shiche,

⁴⁷ Alhou sheqhe eno timi kümtsü lopu shilue. Eno Ampeu no tsala kipetsü panoqo gholo xaluve kemi küpha tsüe.