Apostolmi 18 - Sumi Naga CL (Re-edited) Bible (BSI)

Corinth lo

¹ Hipa thiu Paul ye Athens qhive no Corinth lo wuve.

² Pa no Pontusmi Jewmi Aquila kusholu. Aquila ye anileshi pa nipu Priscilla sasü Italy lono ighi ae, kughengu Claudius no Jewmi kümtsü vilo Rome qhive lopi azah tsüveke. Paul no pama pütsani ye wu,

³ eno pa ghi pama toi aphiki lhikishi lo akehu, panongu kümtsa ngono kilhisho shiuve.

⁴ Sabbath atsütsü pa no sinagog lono kütsala no shika, eno Jewmi ngo Greekmi züiza niye pükapütsa che.

⁵ Kughou Silas ngo Timothy no Macedonia lono ighi keno, Paul ye ado kümtsü atsa pesü Jewmi vilo Khristo ye Jisü kepi ashepe shiae.

⁶ Jewmi no pa küla eno pipütha kelo, Paul no pa phimini kuthove no pi, “Nongu ji no nongu kütsü lo ikughi nani! Ni ye akipimi kühae. Hinguno hilau ni ye Jewkumomi lau wuniae.”

⁷ Tishino pa no tipa-a qhive no Alhou kümllami Titius Justus ipikeu kilo wuve. Pa ki ye sinagog shelo ake.

⁸ Sinagog yepeu Crispus no pa kibolomi kümtsü sasü Ampeu küpülümi shive. Corinthmi kutomo no Paul no pikeu tsa chilu no pülü luve eno baptiz shive.

⁹ Kijili lakhi kungunhetsü lono Ampeu no Paul vilo pi, “Msa kevilo, inaqhoive kevi ikemu tamono pilo,

¹⁰ kughengu I no o gholo ani, khunomu o ghüzamo nani, kughengu mishighüna hipau lo Iw timi kutomo ani.”

¹¹ Pa ye ampe lakhi no aqhi tsügho tile ngono Alhou tsa pesü timiqo shikae.

¹² Ikemu kughou Gallio no Achaia lo angh shive keno, Jewmi kümtsü küqha no Paul küghape küghaki lo saghi,

¹³ eno pi, “Timi hipau ye ayezah hebide ghi timiqo vilo Alhou mlla penike züiza ani.”

¹⁴ Ikemu Paul no atsa piniye shikelo, Gallio no Jewmi vilo pi, “O Jewmiqo, akumou kümla momu heqhi-buqhi keu vehu aye, ni ye nongu no akipimi tsü akeu ikhilu tsüni cheke.

¹⁵ Ikemu hi ye atsa ngo aje eno nongu yezah vehu kütsala keu keke nongu dolono xathalu lo. Ni ye hipaqo vehu loye küghaküthau shimoe.”

¹⁶ Eno pa no küghaki lono panongu hapheve.

¹⁷ Tileno timi kümtsü no sinagog yepeu Sosthenes tsüqü luve no angh zülono pa heqhi thuve. Ikemu Gallio no kiumu alomsü tsümoe.

Paul no Antioch lo Ideighi

¹⁸ Hipa thiu Paul ye ado hami ngo apüzü, küpülümi qhive no Priscilla ngo Aquila pama sasü ashuka lono Syria lo wuve. Pa no ashoqhi shipüa kehu Cenchreae lono akütsüsa tsave.

¹⁹ Panongu no Ephesus lo ighi kelo, Paul no panoqo tile qhive no, pa ye sinagog lo Jewmi sasü küptsa wuve.

²⁰ Panongu no pa vilo ado ta ngo aghi lopi kemu pa no lachileve.

²¹ Ikemu panongu qhive no wuche kelo pa no pi, “Alhou pulou shi aye, ni ye nongu lau ideighi nani,” eno pa ye Ephesus lono cheve.

²² Kughou Caesarea tokeno, pa no akukuhomi sasü kusholu no tithiu Antioch lo wuve.

²³ Tile ado hami ngove kethiu, pa ye Galatia ngo Phrygia qhalo, a-a lakhi lono lakhi lo chesü akhopemi kümtsü shikumto wuve.

Ephesus lo Apollos Shepe

²⁴ Alexandriami Jewmi lakhi Apollos ipikeu, atsa pikithimi eno Kuchoyesü ithishe kemi, no Ephesus lo ighi.

²⁵ Pa ye Ampeu laghi lo akivishi shika puthuve kemi. John baptizkishi likhi ithi keghi aghungu lono azükini shi akehu, pa ye Jisü ghili mtsümishei pesü pikülha eno shika ae.

²⁶ Pa no amlo mtotoi sinagog lo atsa pie, ikemu kughou Priscilla ngo Aquila pama no pa tsa chilu keno, pama no pa sawo alau Alhou laghi mtsümishei lhepiye.

²⁷ Kughou pa no Achaia lo wunishi keu pi keno, küpülümi no pa shikumto eno pa ikhilu tsü penike akhopemi lau yesü yetsü. Pa no ighi kelo khunoqo küpükini vecheo pülülu keno, tipaqo shishe kuphu tsü,

²⁸ kughengu pa no Kuchoyesü vecheo akumtoshi Khristo ye Jisü kepi mishi zülono Jewmi ghechile.