Apostolmi 16 - Sumi Naga CL (Re-edited) Bible (BSI)

Timothy, Paul eno Silas

¹ Paul no Derbe ngo Lystra lo ghi ighi. Akhopemi lakhi, Timothy ipikeu, aza no Jewmi küpülümi eno apu no Greekmi, tile aghi.

² Lystra eno Iconium lo küpülümi no pa pipivi che.

³ Paul no Timothy pelo pa küsa shipeni shive kehu pa no sawo aphighüyiko ghave tsü, kughengu Jewmi tipa qhalo akemi kümtsü no Timothy papu ye Greekmi kepi ithi ae.

⁴ Pama no mishighünaqo lo wuno Jerusalem lo apostolmi ngo layemi no xathalu keu pesü panoqo pelo papelu peniye tsü.

⁵ Ikehu aküpülü lono akukuhomi shikumto luno ghulo atsütsü akikihi alau ikowolu.

Macedoniami no Ku

⁶ Asia lo atsakiviu pinike Aghungu Kimthe no hakhave kehu Paul ngo Silas pama ye Phrygia ngo Galatia qhalo wuve.

⁷ Kughou pama no Mysia lughi lo ighi keno, Bithynia lo wuniye shiju, ikemu Jisü Ghungu no pama lakhave.

⁸ Ikehu pama no Mysia kathasü Troas lo iqive.

⁹ Kijili lakhi kungunhetsü Paul lau ipeghi; Macedoniami lakhi puthugho aghi no pa qhüiniju, “Macedonia lo ighi no ni kuphu tsülo.”

¹⁰ Kughou Paul no kungunhetsü hipau ithulu keno, tipa mtsa ningu ye Macedonia lo wuniye kuto, kughengu hi ye atsakiviu pesü panongu lau pi peniye Alhou no ningu kuani kepi ithive.

Lydia no Xükithelu

¹¹ Ikehu Troas lono ningu ye ashuka lono Samothrace lo wuve, eno thoghiu no Neapolis lo wu,

¹² tileno Philippi lo wu, hi ye Macedonia lo mishighüna aghiu eno Rommi ghüna lakhi. Ningu no hile atsala hami ngove.

¹³ Eno Sabbath tsalani akighini-a aghi nani kepi kümsü no ningu no aphughi khagho khalau aghoki mkülo wuno iqa ghi totimi tile kumqo akeqo pütsa.

¹⁴ Ningu tsa chilu kemi totimi lakhi ye Thyatira ghami Lydia, hughaike phimini jeche kemi, li ye Alhou kümllami. Ampeu no li mlo xükho tsüno li pelo Paul no pikeu lo amlo tsüqhiyi lupe.

¹⁵ Kughou li no abolomi sasü baptiz shiluve keno, li no ningu kusü no pi, “Nongu no ni ye Ampeu pükhükulupu shivae pi xathalu aghi aye, ighi no I kilo ngolo.” Li no ningu pütsaqhi luve.

Paul ngo Silas Akughu shive

¹⁶ Ningu no akighini-a lo wuche kelo aqeliu lakhino ningu sasü kusho. Li ye aghawu ache eno tino li pelo hithiu ghili pilupe keu lono li mpemi no pisa qeluche.

¹⁷ Li no Paul ngo ningu papesü ighamku, “Timi hipaqo ye shishe Akiqheu Lhou qemie, panongu no nongu lau xakulupu laghi sheshu ani.”

¹⁸ Li no atsala kutomo hitoi shiae. Paul no azüzüve no tsüghüwo aghawu vilo pi, “Jisü Khristo je lono I no azah o tsü anike no ye li launo ipeghive lo.” Tipa mtsa aghawu no ipeghive.

¹⁹ Ikemu kughou li mpemi no panow ilokighi la kühave keu ithive keno, panongu no Paul ngo Silas pama küghape mishi-a lo yepemi zülo sünhe saghi.

²⁰ Panongu no pama sasü xaküthami zülo saghi no pi, “Hi pama ye Jewmi, eno ni phughi pünaqhi ani.

²¹ Pama no ni Rommi yezah kiqilo kumo eno pemla keu khuaye peitha lo piani.”

²² Aqokitikhi no pama süqo thuve kelo xaküthami no pama phimini süxüve tsüno aküsü pesü ghaqhi penike azah tsüve.

²³ Pama shishe ghaqhive kethiu panongu no akughuki lo pama khathave no akughu kheu vilo jukuto lopi azah tsü.

²⁴ Azah hipau ithulu no akheu no pama pesü akughuki chebo alou lo süve eno asülu kimshi dolo pama pukhu tshüve tsüe.

Akughu Kheu no Xükithelu

²⁵ Zübumta lo Paul ngo Silas pama no Alhou lau akighini shi ale phe akelo akughumi kütami no inia,

²⁶ züleno ayeghi küghütha kije ighi no akughuki tsükucho kümtsü süküghütha. Eno paikhavi ahukikha kümtsü khaqhive, akughumi yikichhe kümtsü ikove.

²⁷ Kughou akheu no idathu akughuki hukikhaqo khaqhi püaghi keu ithulu keno, pa ye akughumi pokhavae pi kümsüve no pa zütakikihi süjope pa ampi pithive niye shive.

²⁸ Ikemu Paul no ighamku pi, “O ghüza kevilo, ningu kümtsü hila aphie.”

²⁹ Akheu no akulu khu püzü poiloghi, eno akümsa no thüthüshi Paul ngo Silas pama zülo ikiqi.

³⁰ Pa no pama sasü khalau ipeghi no pi, “Akijeu, I xalu penike ni ye kiu shimasa kea?”

³¹ Pama no pi, “Ampeu Jisü shou pülübe lo eno no eno o kibo ghi xaluve nani.”

³² Pama no Ampeu tsa pesü pa eno pa kibolomi kümtsü vilo pi.

³³ Eno tipaji atüqhüdo tipau lono pa no pama sawo pama philo azaku qhuve tsü, pa eno pa kibolomi kümtsü baptiz shiluve.

³⁴ Tishino pa no pama sasü pa kilo wuno kuchu-kusho kutope tsü. Eno Alhou pülü luveke ghenguno pa no akibolomi kümtsü sasü alovi.

³⁵ Ikemu atsala ipeghive kethiu xaküthami no ghüshimi puwu no pi, “Timi hupaqo puwuve lo.”

³⁶ Akheu no hipa tsa Paul vilo pi, “Xaküthami no nokujo puwuve lo pivae. Tighenguno nokujo ye ipeghi no aloino wolo.”

³⁷ Ikemu Paul no xaküthami vilo pi, “Panongu no mishi zülono küqümo kemi, Rom ghakhumi, heqhi no akughu shive no itehi ye tuqhou no ni pheve lopi ani keshea? Moe! Panongu ampi no ighi no ikhiphe masae.”

³⁸ Zakhemi no hipa tsa pewo xaküthami vilo pi, eno pama ye Rom ghakhumie pi chilu kelo, panongu ye msave.

³⁹ Ikehu panongu no ighi no pama vilo akipimi khu. Eno pama saipeghi no mishighüna qhive tsülopi qhüiniju.

⁴⁰ Ikehu pama no akughuki lono ipeghive no Lydia xujuwu. Pama no küpülümi sasü kusholu no amlo shikumtove tsü kethiu, pama ye cheve.