Apostolmi 15 - Sumi Naga CL (Re-edited) Bible (BSI)

Jerusalem Hoho

¹ Ikemu Judea lono timi khami Antioch lo ighi no ishi athiküzümi kütsü, “Moses khuaye kiqi lono nongu no aphighüyiko ghamo aye, nongu ye xamlae.”

² Paul ngo Barnabas pama no panongu sasü kütsala kigheve kethiu, pama gholo timi khami kishe no Jerusalem lo apostolmi eno layemi sasü hipa vehu küptsa penike kughu tsü.

³ Akukuhou no panongu puwuve, eno panongu no Phoenicia ngo Samaria kathasü wuno Jewkumomi no kishi Alhou lau xaide ighilu ani keno chixechilei lhepiye, eno küpülümi kümtsü lau shishe alokivi süghi tsü.

⁴ Kughou panongu no Jerusalem lo ighi keno, akukuhomi, apostolmi, eno layemi no alokivi shi panongu sasü, eno Alhou no panongu pesü kiu shilupe keno kümtsü lhepiye.

⁵ Ikemu Phariseemi mqo gholo pülüve kemi khami no puthugho no pi, “Panongu ye aphighüyiko ghavetsü masae eno Moses yezah pape pemasae.”

⁶ Apostolmi ngo layemi no hipa vehu küptsani ke kumqo.

⁷ Ighono kütsala juve kethiu, Peter no puthugho no panoqo vilo pi, “Athiküzümiqo, nongu no ithi anike püzüu nomu Alhou no I vecheo Jewkumomi pelo atsakiviu chilu no pülülu penike nongu gholono kishe ke.

⁸ Timi mlo ithi akeu Lhou no ningu lau mlake toi, Aghungu kimthe panongu tsükeu vecheo panongu lau thopi shi,

⁹ eno aküpülü vecheo pano mlo shikimthe tsüno ningu ngo panongu dolo kiumu kothakile keu shitsü moe.

¹⁰ Imaye, nongu ye kushiye Alhou peju ghi küpülümi shou ni puasü eno ningu no puqhemla keu kuokhasü betsü ani kea?

¹¹ Ampeu Jisüw küpükini vecheo ningu xalu nanie pi nino pülü aketoi panongu tishi nanie.”

¹² Tile kumqo akemi kümtsü no iqünheive, eno Alhou no Barnabas ngo Paul vecheo Jewkumomi gholo amchipu ngo akümzapu shikeu pama no pi akelo tsaqüi ini.

¹³ Pama no pitave kethiu James no khochile, “Athiküzümiqo, I tsa inilo.

¹⁴ Alhou no kishi Pa je ghenguno Jewkumomi gholono timi khami kishelu keno, Simon no pivae.

¹⁵ Ti ye tungkupmi kaku lo ishi yepüa keu kimshilu ani,

¹⁶ “‘Hipa thiu I no ideighi no David ki ilaqive keu shiqhe kithetsü nani; Ixapinyi akeu I no shiqhe kithe tsüno athoputho tsüni,

^17-18 tishianguno timi jeli eno Jewkumomi khunoqo I je vecheo kuluve akeno, panongu pelo Ampeu phu peni, ipi Ampeu khuu no khaghi no hipaqo ithipe keno, Pa no pi.’

¹⁹ Tighenguno Iw xakütha ye Jewkumomi khunoqo Alhou lau ighi ani keno ningu ye pano küpüna kepu kumoe.

²⁰ Ikemu panongu lau yesü yepuwu no ajulho kümlla chuqupu, asalha, tshükiqhi lhoxü, eno aji mithekumo hipaqo lono putosüve pe kepue.

²¹ Kughengu khaghi tiqheli lono aphughi kümtsü lo Moses Yezah sheshu ighivae, eno Sabbath atsütsü sinagogqo lo phisü acheni.”

Jewkumomi Küpülümi lau Yesü

²² Tileno apostolmi ngo layemi eno akukuhomi kümtsü no pano dolono timi khami kishe no Paul ngo Barnabas pama gholono Antioch lo puwuni ke pulove. Panongu no athiküzümi dolo atomi Barsabbas ipiche keu Judas ngo Silas pama puwu.

²³ Eno yesü ishi yetsü: “Athiküzümi, apostolmi, eno layemi no Jewkumomi küpülümi Antioch, Syria, eno Cilicia lo akemi lau petha tsü ani.

²⁴ Ningu gholo khami no nino azah tsümo keghi wuno atsa hami pesü nongu pünaqhi eno kütakihi anie pi nino chilue.

²⁵ Ikehu ningu no akükümsü lakhi lono kumqo no timi khami kishepe ni qhuu Barnabas ngo Paul gholono nongu lau puwuni pi pulolue.

²⁶ Barnabas ngo Paul pama ye ni Mpeu Jisü Khristo je ghenguno aküxü pephe tsüve kemie.

²⁷ Ikehu ningu no Judas ngo Silas pama kichi lono hipa tsatho pi penike puwu ani.

²⁸ Kughengu hi ye Aghungu Kimthe eno ningu ghi pulolu no bekütha hipaqo nguno alau ye kiu makho mu nongu shou bemoni keu shivae:

²⁹ nongu ye ajulho kümlla chuqupu, aji, tshükiqhi lhoxü chumoni, eno asalha lono putosüni. Nongu no hipaqo launo putosülu aye, nongu ye achipi shilu nani. Akivishi alo.”

³⁰ Panongu puwuve kethiu, panongu no Antioch lo wuno küpülümi kukumqo no yesü tsüve.

³¹ Kughou panongu no philu keno, panongu shikumto tsüke ghenguno ighamku alokivi shi.

³² Judas ngo Silas pama ghi tungkupmi kehu atsa kutomo pesü pino küpülümi hakite eno shikumto tsü.

³³ Ado hami tile ngove kethiu, pama ye küpülümi khunono pama puwu keno tipaqo lau aloino puwove.

³⁴ Silas ye tile ngonike pulove.

³⁵ Ikemu Paul ngo Barnabas pama ye Antioch lo tishi ngove no kütami kutomo gholono Ampeu tsa shika eno kütsü ae.

Paul ngo Barnabas Kütüta shive

³⁶ Atsala hami thiu Paul no Barnabas vilo pi, “Nikujo Ampeu tsa pesü sheshuve keu mishighünaqo lo idewo no küpülümi kishi ani keno juni nolo.”

³⁷ Barnabas no pama gholo John Mark sasü wunishi ae.

³⁸ Ikemu John Mark no Pamphylia lo pama gholo akümla shimono süchileve kehu Paul ye titoi kemi sawumo keu pavie pi kümsüve.

³⁹ Eno pama dolo küthamla keu ipeghive kehu pama kütüta shive. Barnabas no pa gholo Mark sasü ashuka lono Cyprus lo wuve.

⁴⁰ Eno küpülümi no Ampeuw küpükini lo ikhiphe tsüke toi, Paul no Silas kisheluve no cheve.

⁴¹ Pa no Syria ngo Cilicia qhalo wuno akukuhomi shikumto tsüe.