Apostolmi 14 - Sumi Naga CL (Re-edited) Bible (BSI)

Iconium lo

¹ Iconium lo Paul ngo Barnabas pama no Jewmi sinagog lo ilo no thopi shikelo Jewmi ngo Jewkumomi kutomo no pülüluve.

² Ikemu aküpülü kumomi Jewmi no Jewkumomi xukutho no athiküzümi mlo lo tüghü süvetsü.

³ Ikehu pama no tile ado kushuo ngono Ampeu ghenguno mtotoi paw küpükini tsa pesü thopi shi, eno amchipu ngo akümzapu kümlaqo shie.

⁴ Ikemu mishighüna lo timiqo ye kijethave; khami no Jewmi gholo eno khami no apostolmi gholo süve.

⁵ Kughou Jewmi ngo Jewkumomi no yepemi gholo süno pama ghime eno atu pesü veqhi nike kughu keno,

⁶ pama no ti chilu no Lycaonia lo Lystra ngo Derbe mishighüna eno tipa ghakhu qhalo pove,

⁷ tilau pama no atsakiviu pesü sheshue.

Lystra lo

⁸ Lystra lo timi lakhi, aza po lono apukhu kinitave no alache mlave kemi ache.

⁹ Pa no Paul no pikeu tsa inia. Paul no tsaqüi pa jukelo, pa ye shipivi luve kepu küpülü akeu ithulu kehu,

¹⁰ asütsa kuloghi lono pi, “Müzüchoi puthugho lo.” Timi huno ilhethu ala chethuve.

¹¹ Kughou aqokitikhi no Paul no mlakeu ithulu keno, panongu no Lycaonia tsauno ishi ighamku pithu, “Alhouqo no timi julho lono ningu lau iqighivae!”

¹² Panongu no Barnabas pesü Zeus, eno Paul no atsakipiu shi akehu Hermes kutsü.

¹³ Eno mishighüna khagho lo Zeus chineki lo achineu no amshitsü ngo axamunu pesü pama no akeu khagho lo ighi no aqokitikhi sasü akümllagho pesü apostolmi tsüniye shi.

¹⁴ Ikemu kughou apostolmi Barnabas ngo Paul pama no ti chilu keno, pama no aphimini süxü ghi posü aqokitikhi gholo ilo no ighamku,

¹⁵ “Timiqo, nongu ye kushiye hipaqo shi ani kea? Nikujo ghi nongu toi timi, eno nongu lau atsakiviu süghi ani, tishianguno nongu pelo hi adou thime lono tsüghüsü aküxüpu Lhou khuu atsütsü, ayeghi, azüghi eno tile akeu kümtsü lho keno, Pa lau ighi peniye ke.

¹⁶ Wovekeu tiqheli loye Pa no shiye kümtsü pelo pütüta lalo chepe.

¹⁷ Ikeghi Pa ye thopimi qhimoke kumoe, kughengu Pa no akümla kivi hitoi shi püani: atsütsü lono tsütsüghu piqitsü; atusho kiqi lono axa jeli nongu tsü; achuqupu ngo alokivi pesü nongu mlo piqi tsüke.”

¹⁸ Atsa hipaqo pive namu aqokitikhi no akümllagho pama tsüniye akeu lakha mlave.

Lystra lo Atu pesü Paul Veqhi

¹⁹ Ikemu Antioch ngo Iconium lono Jewmi ighi, eno aqokitikhi xukutho pe atu pesü Paul veqhive no thiva küghashi aphughi khalau sünhe pheve.

²⁰ Ikemu akhopemi no pa sühope akelono pa no ithughi no aphughi lo ilove, eno thoghiu no Barnabas sasü Derbe lo wuve.

²¹ Kughou pama no mishighüna tipau lo atsakiviu pesü kütsü no akhopemi kutomo shiluve keno, pama ye xachilesü Lystra, Iconium eno Antioch lo idewove.

²² Hi kümtsü lo akhopemi mlo shikumto tsüno aküpülü lo cheche penike pama no pi, “Aghime kitikhi kutomo vechesü ningu ye Alhou yekipe lo ilo masae.”

²³ Pama no akukuhou kümtsü lo layemi kisheve tsü kethiu, akighini eno kümvü keu lono panongu pesü pano no pülüluve keu Mpeu lau kulhuqhi tsü.

Syria Antioch lo Ideighi

²⁴ Tithiu pama no Pisidia kathasü Pamphylia lo ighi.

²⁵ Kughou pama no Perga lo atsa pesü sheshuve keno Attalia lo iqive.

²⁶ Tileno pama ye ashuka lono Antioch, khileno pama pesü akümla itehi shiqhilu keu mlawu peniye Alhouw küpükini lo kulhuqhi tsü keno, tilau wuve.

²⁷ Pama no ighi no akukuhou kukumqo püzü Alhou no pama peitha keu pesü sheshu, eno Jewkumomi lau kishi Alhou no aküpülü hukikha khaqhi tsü keno lhepiye.

²⁸ Pama no küpülümi sasü ado kushuo ngove.