Apostolmi 12 - Sumi Naga CL (Re-edited) Bible (BSI)

James Pithive, Peter Küghaluve

¹ Tipa ghuloki lo akükau Herod no akukuhomi khami ghime thuve.

² Pa no John thiküzüu James azütakikihi pesü ghiqhive.

³ Hi no Jewmi lopu shikeu pa no ithulu no Peter ghi küghaluve nike phuwu. Hi ye Kholaqhi sümokeu Sho pine ghuloki lonoe.

⁴ Pa no Peter küghape akughu shive, eno Hechekulu Ghulhu thiu no timiqo zülo pepheni ke ghüshimi amqo bididi no kiphino pa khepe.

⁵ Ikehu Peter pesü akughu shive kemu akukuhou no pa ghenguno akumtoshi Alhou vilo inikhu ae.

Peter Xaphelu

⁶ Kughou Herod no pa saipeghi niye kughu akeno, tipaji Peter ye ayikichhe kini no pa tshüpe aghukhemi kini dolo züa, eno akughuki hukikha lo aghukhemi no kheae.

⁷ Paikhavi Ampeuw kungumi no pa phivilo puthugho aghi eno aküvü no achebo yepüvüve. Pa no Peter tukini küdaputhu no pi, “Mtazü ithulo.” Tile pa u lono ayikichhe iko ikiqive.

⁸ Kungumi no pi, “O phimini eno o pukhukuqho puluve lo.” Peter no tishive kelo kungumi no pi, “Ow hebephi puve no I papelo.”

⁹ Pa no khalau pa papesü wuve. Pa ye kungumi no kiu shi akeno kuchou kepi mthano kungunhetsü ithulu ani küghashi kümsü ae.

¹⁰ Pama no khagho atüghüu ngo akiniu veche ipeve no aphughi lo ayi khagho lo ighi. Tino akutoshi no pama ghenguno khaqhive tsü, eno pama no ipeve no alaghi lakhi lo wuve. Paikhavi kungumi ye Peter qhive.

¹¹ Peter no atsüveshe ipeghi kelo pi, “Itehi ye I no mtsümishei ithivae, Ampeu no paw kungumi hapuwu no Herod u lono eno Jewmi no shinie pi kümsü akeu kümtsü lono I xaphe luvae.”

¹² Kughou pa no ti vethalu keno, pa no John khuu Mark ghi kuche keno, pa za Mary kilo wu, tile kutomo no kumqope akighini shiae.

¹³ Ikehu pa no khalau hukikha kukhu kelo, aqeliu Rhoda no khaqhi niye ipeghi.

¹⁴ Peter tsapi michilu no li ye alokivi launo khagho khaqhi nike züqhu pochile ilo no Peter ye khalau puthugho anie pi.

¹⁵ Panongu no li vilo pi, “No ye o kükümsü aphi ije amoe!” Ikemu li no tsümomo kuchoue pi kelo panongu no pi, “Ti ye paw kungumie!”

¹⁶ Ikemu Peter no kukhu auve kehu panongu no khaqhi kelo pa ithulu no akichiqhive.

¹⁷ Panongu pelo inaqhoive peniye pa no au kütsüpe tsüno Ampeu no akughuki lono kishi pa saipeghi keno kishekulu lhepiye. Pa no pi, “Hipau pesü James ngo athiküzümi vilo pilo.” Eno pa ye a-a kütau cheve.

¹⁸ Thanau aghukhemi dolono Peter ye kishive keno mqhumza thuve.

¹⁹ Kughou Herod no Peter phuju püzü phumlave keno, pa no aghukhemi kighiniju no panoqo pithive penike azah tsüve. Tithiu Herod ye Judea lono Caesarea lo iqive eno tilau ache.

Herod Kithi

²⁰ Herod no Tyre ngo Sidonmi sasü kimpi ache kehu panongu no amlo lakhi shino pa lau ighi. Akükau ki jukükütsüu Blastus züiza no panongu no Herod vilo külakishi tsa pi, kughengu pano ghakhumi ye achuqupu ghenguno akükau ghakhu pükhü cheke.

²¹ Kihitha püake tsalani Herod no aküka phimini pepusü kükalakhü lo iqa, eno panongu vilo sheshu.

²² Timiqo no ighamku, “Hi ye alhou tsapi kethono timi tsapi kumoe!”

²³ Paikhavi Ampeuw kungumi no pa hekuluve, kughengu pa no ajekipi Alhou tsümo ke, eno pa ye apithe no tsaqhi no atuthu kishekhave.

²⁴ Ikemu Alhou tsa ye veküpha eno alau ikowove.

²⁵ Barnabas ngo Saul pama no pichebe tsükeu kümla tave kethiu Jerusalem lo ideighi, eno John khuu Mark ghi kuche keno sasü ighi.