Apostolmi 11 - Sumi Naga CL (Re-edited) Bible (BSI)

Peter no Akukuhou lau Pitsü

¹ Judea qhalo apostolmi ngo athiküzümi akeqo no Jewkumomi ghi Alhou tsa ikhiluvae pi chilu.

² Ikehu kughou Peter no Jerusalem lo ighi keno, aphighüyiko ghave kemi loji no pa pipüsa ghi pi,

³ “No ye aphighüyiko ghamo kemi lau wuno pano gholo chusho ani.”

⁴ Ikemu Peter no panoqo vilo abo-akeshi lhepiye:

⁵ “I no Joppa mishighüna lo akighini shi akelono kungunhetsü ithulu. Kiukela ayephu kuloghi toike ashe bidi lono küghape no atsütsü lono ayeghi lo piqi, eno tino I lau iqighi.

⁶ I no tsaqüi jukelo apukhu bidi kupu lhoxü, tüghashi, itikiche lhoxü, eno aghau jeli I no ithulu.

⁷ Eno asütsa lakhi no I pütsa keu I no chilu, ‘Peter, ithu no heqhi chulo.’

⁸ Ikemu I no pi, ‘Khilemu shimlae, Ampeu; kughengu kitiqeve keu momu mithekumo ye I kichi lo khilemu ilomphie.’

⁹ Ikemu atsütsü lono asütsa no ghuthu akiniu khochile, ‘Alhou no kiu shikimtheve akeno kitiqevae pi kevilo.’

¹⁰ Hitoi ghuthu küthü shive no kümtsü atsütsü lo sünhe chile saikuve.

¹¹ Tipa mtsa Caesarea lono I lau puwu kemi timi küthü no nino ngo akeu kilo ighi.

¹² Eno kiumu kilemo no panoqo gholo wulopi Aghungu no I vilo pi. Athiküzümi hipano tsügho ghi I sasü kümtsa timi lakhi kilo iloe.

¹³ Pa no ningu vilo kungumi lakhi no pa kilo ighi no pikeu pi, ‘Joppa lo timi puwu no Peter ipikeu Simon hu saghilo,

¹⁴ pa no o vilo atsape sheshu nani eno tipa vecheo no eno o kibolomi kümtsü xaluve nani.’

¹⁵ I no panongu vilo atsa pithu kemtsa, hukuthu lo ningu shou ighike toi Aghungu Kimthe no panongu shou ighive.

¹⁶ Tileno Ampeu no kishi pipüa keno I no kümsülue, ‘John no azü pesü baptiz shitsüe; ikemu nongu ye Aghungu Kimthe no baptiz shitsü nani.’

¹⁷ Tishiaye Ampeu Jisü Khristo pülülu kelo ningu tsüke toi, Alhou no agho aphiphi pesü panoqo tsükeu lo ni ye khuue pi I no Alhou laghi hakhani kea?”

¹⁸ Panongu no hi chilu kelo inaqhoive, eno Alhou sheqhe ghi pi, “Tishiaye Alhou no Jewkumomi lau ghi aküxüpu lo wulu kepu xaidekulu tsüvae.”

Antioch lo Akukuhou

¹⁹ Stephen pithive kelono kijipüsa thuve kehu Phoenicia, Cyprus, eno Antioch kutolo apanagha pove keqo no atsa pesü kütami vilo pimono Jewmi vilo likhi pie.

²⁰ Ikemu panongu gholo Cyprus ngo Cyrene timi khami no Antioch lo ighi no Ampeu Jisü ghili pesü Greekmi vilo ghi sheshu.

²¹ Ampeu küka no pano gholo ae; eno timi kutomo no pülü luno Ampeu lau ighive.

²² Hipau sütsa Jerusalem lo akukuhou tove, ikehu panongu no Antioch lo Barnabas puwu.

²³ Kughou pa no ighi no Alhouw küpükini ithulu keno, pa mloqive eno panongu vilo itha mono Ampeu ghokulu shilopi pa no kümtsü shikumto,

²⁴ kughengu pa ye timi kivimi, Aghungu Kimthe eno aküpülü no chhitoi kemie. Eno timi kutomo no Ampeu lau ighi luve.

²⁵ Tishino Barnabas no Tarsus lo Saul phuniye wu,

²⁶ eno kughou pa no phulu keno, pa sasü Antioch lo ighi. Ampe kupuju pama no akukuhomi sasü kuposhu no timi kütsasa shika. Antioch lono atüghüshi akhopemi pesü Khristomi ipi kulue.

²⁷ Tipa ghuloki lo tungkupmi khami Jerusalem lono Antioch lo ighi.

²⁸ Panongu gholo Agabus ipikeu no puthugho no ayeghiqha kümtsü lo püqümiye kije chenie pi Aghungu vecheo pichho tsü (hi ye Claudius ghuloki lono shikupuve).

²⁹ Ikehu akhopemi no pütüta no toluke qhemi Judea lo athiküzümi lau akukuphu tsünie pi xathalu.

³⁰ Eno panongu no titoi shino Barnabas ngo Saul pama u lono akukuho lo kichimi lau akukuphu tsüpuwue.