Apostolmi 10 - Sumi Naga CL (Re-edited) Bible (BSI)

Peter ngo Cornelius

¹ Caesarea lo Italia Ghüshimi ipikeu loji lo aqhe zatsüu Cornelius ache.

² Pa ye Alhou ithitoi eno pa kibo kümtsü Alhou sümsa chekemi, kumlhomi kuphu eno tamono Alhou vilo inikhu chekemi.

³ Ghulo lakhi avelau ayi küthü kihelo Alhouw kungumi lakhi no pa lau ighi no, “Cornelius” ipikeu pa no kungunhetsü lono mtsüqhei ithulu.

⁴ Pa no thüghüi kungumi juno pi, “Ampeu, kiu kea?” Kungumi huno pi, “O kighini eno nono kumlhomi kuphu chekeu ye kümsükulu kümllagho shi Alhou tovae.

⁵ Joppa lo timi puwu no Simon, khuu Peter ipi cheni keno pa kusaghi lo.

⁶ Pa ye ashiyiko kümlau Simon gholo ani, eno pa ki ye azüghi phivilo ani.”

⁷ Kungumi pa pütsa akeu no wuve kethiu, Cornelius no pa qemi kini eno pa hikujuu ghüshimi Alhou lau amlo tsüqhiyi kemi ku,

⁸ eno thokha panongu vilo pive no Joppa lo puwuve.

Peter Kungunhetsü

⁹ Thoghiu panongu no Joppa toniche kelo, Peter ye akighini shinike puchou ayi chighikini qhalo aki kütsüqa lo iku.

¹⁰ Pa ye müzüthive eno kiuala chunishi ae, ikemu alibe kuto akelono pa no kungunhetsü ithulu,

¹¹ atsütsü khaqhive no kiukela ayephu kuloghi toike ashe bidi lono küghape no ayeghi lo piqi keu pa no ithulu.

¹² Tipau lo tüghashi, itikiche lhoxü eno aghau jeli kümtsü ae.

¹³ Pa lau asütsa ishi ighi, “Peter, ithu no heqhi chulo.”

¹⁴ Ikemu Peter no pi, “Khilemu shimlae, Ampeu; kughengu ni ye kitiqeve keu momu mithekumo kiumu chuju mphie.”

¹⁵ Ghuthu akiniu asütsa pa lau ighi, “Alhou no kiu shikimtheve akeno mithekumo ipi kevilo.”

¹⁶ Ghuthu küthü kutolo tishi no tipau ye atsütsü lo paikhavi süikuve.

¹⁷ Peter no kungunhetsü kiqi ye kiu shiaghi nani keno phiküghüzü pe akelono, Cornelius no timi puwu keqo no Simon ki ighisü khagho lo aghi.

¹⁸ Panongu no Simon, khuu Peter ipi cheni keno, tile anima pi ighiju.

¹⁹ Peter no kungunhetsü kiqi kümsüju akelono Aghungu no pa vilo pi, “Julo, timi küthü no o phucheni.

²⁰ Ithu no iqilo, eno künacho mono panoqo gholo wulo, kughengu I no panoqo puwuke.”

²¹ Peter no timiqo lau iqi no pi, “Nongu no phuche keu huye nike. Nongu ye kiu shi ighi ani kea?”

²² Panongu no pi, “Kungumi kimthe no azah tsüke toi Cornelius, aqhe zatsüu, süchomi, Alhou sükümsami, Jewmi shiye kümtsü no gihu chekeu no nono kiu pikepu ani keno ininike o pelo pa kilo ighitsü peniye kupuwu ani.”

²³ Ikehu Peter no panongu pesü inami shi pa kilo kusü. Thoghiu pa no panongu gholono cheve, eno Joppa lo athiküzümi khami pa gholo wue.

²⁴ Panongu no aküthüni no Caesarea lo ighi. Cornelius no pa bolomi ngo shompami kukumqo no panoqo huqhe aghi.

²⁵ Peter no aki alou iloghi kelo Cornelius no pa sasü kusho, eno pa pukhu philo itsaqi no pa mlla.

²⁶ Ikemu Peter no pa sünhe puthu no pi, “Ithulo; ni ghi timi ke.”

²⁷ Peter no pa pütsa ghi alou iloghi kelo, timi kutomo kumqo aghi.

²⁸ Pa no panoqo vilo pi, “Nongu no ithi anike Jewmi lakhi no shiye kütami sasü xukütshü momu xujuni keu ye ayezah kiqilo kumoe, ikemu timi khumu pesü kitiqeve keu momu mithekumo ipi pemoni ke Alhou no I piyevae.

²⁹ Ikehu kughou I ku ighi keno, ni ye lachile mono ighi ani. Tishiaye nongu ye kushiye I kupuwu kea?”

³⁰ Cornelius no pi, “Ishi bidi shive ake hipa tüqhüdo avelau ayi küthü kihelo, ni ye I ki lono akighini shiae. Tile timi lakhi metsüghoike phimini pepusü I zülo ipeghi,

³¹ eno pi, ‘Cornelius, o kighini eno nono kumlhomi kuphu chekeu hu Alhou no ikhiluve tsüae.

³² Tighenguno Joppa lo Simon khuu Peter ipi cheni keno pa kupuwu lo. Pa ye Simon ashiyiko kümlau kilo ani, ti ye azüghi phivilo ani.’

³³ Ikehu I no mtazü o kupuwu kelo nono ighi tsüke alovae. Tighenguno itehi Ampeu no o vilo kiu pilo pi azah tsü keno thokha chiluni ke ningu kümtsü Alhou zülo anie.”

Jewkumomi no Atsakiviu Chilu

³⁴ Ikehu Peter no pithu: “Kuchou no Alhou ye agikuju kühae pi I no vethaluvae,

³⁵ ikemu shiye kümtsü gholo khukhumu Pa sümsa eno achipiu shikeu ye ikhikulupu shicheni.

³⁶ Atsa khikhi Pa no Israelmi lau puwu keno, ti ye Jisü Khristo vecheo aloino keu tsakiviu pesü sheshu keu nongu no ithi ani (Pa ye kümtsü Mpeu ke).

³⁷ John no baptizkishi sheshu keu vecheo Galilee lono huthusü Judea qhalo kiu shive keno nongu ampi no ithi ani:

³⁸ Alhou no Aghungu Kimthe eno aküka pesü Nazarethmi Jisü nukishe. Alhou no pa gholo ake ghenguno pa no aqha kümtsü lo wuno akivi kümla shi eno tüghami no qhasüpe akeqo kümtsü shipivi tsüe.

³⁹ Jewmi ghakhu lo ngo Jerusalem lo pa no kiu shiche keno, ningu no tipaqo kümtsü thopimi ke. Panongu no asübo lono pa pithive.

⁴⁰ Ikemu Alhou no aküthüni ye, akithi lono pa xüputhuve no pa pelo timi zülo ipeghipe,

⁴¹ timi kümtsü lau kumo kemu Alhou no thopimi shipenike kisheluve kemi, pa no akithi lono ithughive kethiu pa sasü kümtsa chusho kemi ningu lau ipeghi ke.

⁴² Pa no ningu vilo sheshu lopi azah tsü, eno Alhou no pa pesü küxümi ngo kithimi shou küghaküthau shi kishelu kepi ashepe shipenike azah tsüe.

⁴³ Pa pülü kemi kümtsü no pa je vecheo axine qhikütsü ithulue pi tungkupmi kümtsü no pa shepe shipüani.”

Jewkumomi shou Aghungu Kimthe

⁴⁴ Peter no hipaqo pi aphi lono, atsa ini akemi kümtsü shou Aghungu Kimthe ikughive.

⁴⁵ Peter gholo ighi kemi küpülümi aphighüyiko ghave kemi no akichiqhive, kughengu Jewkumomi shou ghi Aghungu Kimthe gho lepuku tsüke.

⁴⁶ Kughengu panongu no amili lono pi akeu eno Alhou sheqhe akeu chilue. Tileno Peter no shuphe,

⁴⁷ “Ningu shou ighike toi timi hipaqo shou ghi Aghungu Kimthe ighivae, panongu pesü azü lono baptiz shinike khuana no lakha lunani keshea?”

⁴⁸ Ampeu Jisü Khristo je lono panoqo baptiz shilu penike pa no azah tsüve. Tishino panongu no pa vilo atsala hami ngo aghilo pi qhüiniju.