AMUS 9 - Sumi Naga CL (Re-edited) Bible (BSI)

Israel Kütsakungo

¹ Ampeu no akiptia phivilo puthugho akeu I no ithulu, eno Pa no pi: “Akisheqho no itha moke kutolo atsükuchoqo lo hepukulo, eno tino timi kümtsü kütsü shou ikughi pelo; eno achili thaqhü ye I no azüta pesü ghiqhiveni; panoqo khumu povemla nani; milakhimu itshüsü pomla nani.

² “Panongu no ala chhusü Kithigha lo iqive namu, tilauno I u no küghaluve nani; panongu no atsütsü lo ikuvemu, tilauno I no saiqighive nani.

³ Panongu no Carmel toghi lo itshüuve namu, tilauno I no panoqo phuwu no küghaluve nani; panongu no I nhethe lono itshüsü azüghi polalo iqive namu, I no tilau apighi azah tsüno panongu mighipe nani.

⁴ Aghümi no panongu sasü akughu lo wuve namu, tilauno I no azütakikihi azah tsüno panoqo ghiqhive nani; Alo kelauno kumono alhoksa lono I no thüghüi panongu ju anani.”

⁵ Ampeu, aqokitikhi Lhou, Pa no ayeghi bukelo pitikümlave cheni eno tile akemi kümtsü no mloqa cheni, panoqo no Nile züghi toi ikughi eno itaghi Egypt lo Nile züghi toi iqüilove cheni;

⁶ Pa no atsütsü lo akuchuquu chebo shipüani eno ayeghi shou ajolha shipüani; Khuu no azüghi zü kuno ayeghi shou leqhitsü cheni keno, Pa je ye Ampeu ke.

⁷ Ampeu no pi, “O Israelmi, I ghenguno nongu ye Cushmi toike kumo keshea?” “Israelmi ye I no Egypt lono saipeghi, Philistiami no Capthor lono, eno Syriami no Kir lonoke kumo?

⁸ Julo, Ampeu Alhou nhethi ye axine kükaqha ju ani, I no ayeghi lono ti kütsave nani ikemu Ni ye Jacob lagha qhoi kütsaleve monani,” ipi Ampeu no asheshu.

⁹ “Kughengu Julo, I no azah tsüno shiyeqo dolo Israel shiaye süküthü nani, ti ye akhoje no ijo akeshi ikemu atumüsü mu ijoqhimo nani.

¹⁰ Iw timi axinemi khunono, ‘Küsakusho ye ni haighimo momu ni sasü kushomo nani’ ipi cheni keno kümtsü azüta kikihi lono thive nani.

Israel Athoputho tsüni

¹¹ “Tipani David pushonha khikhi ikiqive keno I no ikhiqhe nani, tipau kighipeqo pukho kithe eno ixapinyive keu shiqhe kithepe khaghi lo toi atho shive tsüni,

¹² tishianguno panoqo no Edom lo ghükulumi eno shiye khipaqo Iw ke ipiche keno tipaqo leluve nani,” ipi Ampeu khuu no hipau shi cheni keno Pa no piqhivae.

¹³ “Julo, atsala hu ye chenie,” ipi Ampeu no sheshu, “alu hokikidemi no ghile kuhumi vecheve nani eno atsaithi qole kemi no axüthi sükemi haluve nani; Naghutoqo no akungo ji kighiji eno atoghi lono ti qowu nani.

¹⁴ I no Iw timi Israelmi küakini tsüchile nani, pighive keu phughiqo panongu no shikithe no tile xü nani; atsailu chi no tipau tsaizü sho nani, aghutu shino tipa xathi chu nani.

¹⁵ I no panongu pesü pano yeghi lo shosü nani, eno panongu ye I no tsükeu yeghi lono itaghi khilemu nhüvemo nani,” Ampeu nongu Lhou no piani.