AMUS 8 - Sumi Naga CL (Re-edited) Bible (BSI)

Kukhukimji Tsala Chekeu

¹ Ampeu Alhou no kiu I piye keno hike: julo, mütsü tusho xathi ashoghi lakhi.

² Eno Pa no pi, “Amos, no ye kiu ithulu ani kea?” I no pi, “mütsü xathi ashoghi lakhi.” Tile Ampeu no I vilo pi, “Iw timi Israelmi shekuho ye ighivae; Ni ye khilemu panoqo juzü moae.

³ Tipani achineki lo alekiphe ye mloküqa shive nani,” Ampeu Alhou no pivae. “Akithi kumo no kütsasa!” “Aqha kümtsü peve nani!” “Inaqhoi khümüive nani!”

⁴ Hi inilo, nongu aveküsami nedaqoda chekeqo eno aghakhu lo kumlhomi kütsaveni ye pi chekeqo,

⁵ “Nino athi jeluni ke kughou no aqhi kithe wove nani kea? Kughou no Sabbath wove nani kea? Tishianguno nino ashothi jelu, ahu kimghipu aghulo shive tsüno shekel no kutomo shivetsü eno ahu kichileu pesü pishiqhini ke,

⁶ tishianguno nino ghükayi no kumlhomi qhüluve eno apukhuqho pesü aveküsami qhüluve eno ashothi muu jelunie.”

⁷ Ampeu no Jacob qheküza ghenguno tushoqhivae: “Mtsüqheino Ni ye khilemu pano kümla kümsümamo nani.

⁸ Hi ghenguno ayeghi ye itha moni keshea, tile akemi kümtsü mloqa moni keshea? Ayeghi kümtsü no Nile züghi toi fukucho ithughi no itaghi Egypt lo Nile züghi toi ikiqi ilo nani.”

⁹ “Tipa tsalani,” Ampeu Alhou no asheshu pi, “I no khetsünhe pelo puchou no ilovepe nani eno puchomghü lono ayeghi pesü aküzü shivetsü nani.

¹⁰ I no now tiqhetini pesü akumlo shivetsü nani eno nongu le kungo pesü amloksa le shivetsü nani; I no yeqhiyephi pesü nongu chita lo khatsü nani eno nongu kütsü lono asa miye khave tsü nani; anu lakhi akeu thive kelo mloqa ketoi shipe nani eno tipau shekuho ye kukhukimji tsala toi nani.

¹¹ “Julo, atsala chenie,” Ampeu Alhou no asheshu, “I no aghakhu lo püqümiye puwu nani— asho momu azü küpüqü kumoe, ikemu Ampeu tsa ininishi keu müzü-tüghü shi nani.

¹² Timiqo no Ampeu tsa phusü azüghi lakhi lono lakhiu lo, eno ahuu no kipelau hu-woju nani kemu phulumo nani.

¹³ “Tipa tsalani ilimi jukivi eno apumiqo no tüghüthi kelauno iluqive nani.

¹⁴ Samaria kipimi jeku tushoqhi, eno ‘O Dan, o lhou xü anike,’ momu ‘Beersheba Laghi anike,’ ipi chekemi ye ikiqive nani eno khilemu ithughi kithemo nani.”