AMUS 7 - Sumi Naga CL (Re-edited) Bible (BSI)

Ghutu keu Kungunhetsü

¹ Ampeu Alhou no kiu I piye keno hike: julo, kughou amunuu xaboqo no mini ipeche keno, Pa no tülhaquqo kughulhoa, eno julo, ti ye akükau saje gholuve kethiu amunuu xabo thuipeghi keu do shiae.

² Kughou tipaqo no ayeghi lo atsüni chukhave tsü keno, I no pi, “O Ampeu Alhou, kimiyeno akipimi qhitsülo! Jacob ye ighono aghuloke kishi puthugho luni kea?”

³ Ampeu no hi süchileve tsü: “Hi ye shipe moae,” ipi Ampeu no pive.

⁴ Ampeu Alhou no kiu I piye keno hike: julo, Ampeu Alhou no ami pesü küghakütha shiniye kusü ae, eno ami no akuthoku kije eno ayeghiqha pitile ae.

⁵ Ikehu I no pi, “O Ampeu Alhou, kimiyeno tavelo! Jacob ye ighono aghuloke kishi puthugho luni kea?”

⁶ Ampeu no hi süchileve tsü: “hi ghi shipe moae,” ipi Ampeu Alhou no pive.

⁷ Ampeu Alhou no kiu I piye keno hike: julo, Ampeu ye akuptu lakhi akimghitu no müzüchoi mighi no shikeu phivilo Pa u lo akimghitu pesü puthugho aghi.

⁸ Eno Ampeu no I vilo pi, “No ye kiu ithulu ania Amos?” I no pi, “akimghitu.” Tile Pa no pi, “Julo, I no Iw timi Israelmi gholo akimghitu qhitsü ani; Ni ye khilemu panoqo juzüve ghi hechewu kithemae;

⁹ Isaac kümlla topeqo ye kütsaleve tsü nani, Israel kümlla kiqo ye kütsapinyive tsü nani, I no azütakikihi pesü Jeroboam lagha mjo ithughi nani.”

Amos Nguku

¹⁰ Tileno Bethel lo achineu Amaziah no Israel kükau Jeroboam lau ishi asütsa puwu, “Amos ye Israel lo akemi zülono o shou küsüqe ani. Aghakhu ye pa tsapi puqhelu movae.

¹¹ Kughengu Amos no ishi piani, “Jeroboam ye azütakikihi lono thive no Israel ye hakiphi sasü pano yeghi lono kushuo lo wuve nani.”

¹² Amaziah no Amos vilo pi, “O tungkupu, wuvelo, Judah yeghi lo povelo, eno tilauno asho chuno tungkuptsa pialo,

¹³ ikemu khilemu Bethel lo tungkuptsa pi kevilo, kughengu ti ye akükau kümllaki eno kükaqha chineki ke.”

¹⁴ Tileno Amos no Amaziah khochile pi, “Ni ye tungkupu kumo, tike kumono tungkupu nu mu kumoe, ikemu ni ye ambekhemi eno tüküthi-mubuthi chiche kemi ke.

¹⁵ Ikemu Ampeu no ambe loji lono I kuphelu, eno I vilo pi, ‘Wulo, Iw timi Israelmi lau tungkuptsa piwulo.’

¹⁶ Tighenguno itehi Ampeu tsa inilo. “Nongu no, ‘Israel shou tungkuptsa pi kevilo, eno Isaac shiaye lau kütsü wu kevilo’ ipike.

¹⁷ Tighenguno Ampeu no ishi piani: “O nipu ye mishighüna lo kütüqhalimi shive nani, o tianuliqo ye azütakikihi lono ikiqive nani, o yeghi ye akimghi süta pesü kijethave nani; no ampi ye mithekumo yeghi lono thive nani, Israel ye mtsüqhei pa yeghi lono hakiphi sawuve nani.”