AMUS 6 - Sumi Naga CL (Re-edited) Bible (BSI)

Zion lo Akuchhomami Hasapu

¹ “Zion lo akuchhoma shi akemi, eno khunono Samaria naghuto lo ililai ani keno, shiye dolo ajekipimi atüghümi, khunoqo lau Israelmi no wu acheni keno ahasapue!

² Calneh lo wuno julo, tilau no Hamath phughi kuloghi lo wulo; tishino Philistiamiw Gath lo iqilo. Nongu ye aghakhu hipaqo nguno akiviu keshea? Momu pano lughi ye no lughi nguno akuloghiu keshea?

³ Nongu no amhekiqi tsala kushuo lo tuha puwuve eno kütsakungo keu lakhü aphivilo süghive ke.

⁴ “Khunono akühahu lüpa lo zü eno panow amekusho lakhü lo xachho pesü ngono ambeloji lono heqhi chu eno amishiki lono amshiti heqhi chu acheni keno ahaküsapue,

⁵ Nongu no akighilebo gholono akiqi küha keu le phe eno David toi ale jeli iqüe,

⁶ Nongu no akulhobo lono aji sho eno thazü akiviu pesü nongu ampi nukishe cheni, ikemu Joseph kütsave keu ghenguno mloqa moe!

⁷ Tighenguno itehi ye nonguu paghino akughu lo wunani, eno now tiqhetini ngo aghulhu ghi kishekhave nani.”

⁸ Ampeu Alhou ampi no tushoqhivae, ipi Ampeu, aqokitikhi Lhou no sheshu: “Ni ye Jacob qheküza kuchhube paw sükusho-aqo mithi, I no aphughi eno tile akemi pesü aghümi tsüve nani.”

⁹ Tsala akibo lakhi lo timi chighi aghi aye, panoqo ye thive nani.

¹⁰ Eno kughou akithiu limi no akumo nuve no shiqhove tsünike ighini keno, pa no aki lono akumo peipeghi no aki alou lo akeu vilo iniju nani, “O gholo khuana aphi keshea?” Pa no pi nani, “Moe”; tileno pa no pi nani, “Inaqhoive lo! Ningu ye Ampeu je kukepu kumoe.”

¹¹ Kughengu julo, Ampeu no azah tsü cheni, eno aki kuloghi ye hepholeve no kubopinyive nani, eno aki akulotiu no mukhumuno shive nani.

¹² Khurshi ye atuqu shou no pocheni keshea? Amshitsü sasü azüghi hokide cheni keshea? Ikemu nongu no kuchou-xakütha pesü tüghü shivetsü eno achipiu-mikucho xathi pesü kukhukimji sübo shivetsüe—

¹³ ti ye nongu Lo-debar lono alokivishi, “Ni kumto lono ningu ampi no Karnaim leluve ake kumo?” ipi chekeqo noke.

¹⁴ “Kughengu julo, O Israelmi, nongu mjochileni keu shiye I no saputhuni,” ipi Ampeu aqokitikhi Lhou no pi; “eno panongu no Lebo-hamath lono Arabah ghokiti kutolo nongu qhasü luve nani.”