AMUS 5 - Sumi Naga CL (Re-edited) Bible (BSI)

Ampeu phuno Xülo

¹ I no nongu shou akumlo tsa hipau pipuku akeu inilo, O Israel lo küami:

² “Ayiliu Israel ye ithughi kümlapu shi ikiqivae; li sünhe puthuni kemi kühano li yeghi lono li qhivae.”

³ Kughengu Ampeu Alhou no ishi piani: “Israel lo qhethonhe puwu keu phughi huno aqhe likhive nani, eno aqhe puwu keu huno chighi likhive nani.”

⁴ Kughengu Ampeu no Israelmi vilo ishi piani: “I phulo eno aküxüpu shilulo;

⁵ ikemu Bethel phuwu kevi, eno Gilgal momu Beersheba lo wu kevilo; kughengu Gilgal ye mtsüqhei haphe sawuve nani eno Bethel ye kiumu kumove nani.”

⁶ Ampeu phu no aküxüpu shilo, tikumo aye Pa no ami toi Joseph lagha piti ighive, eno khumu Bethel ghapinhe mlano qhoi pitive nosae,

⁷ O nongu achipiu tuchighipe kukhukimji sübo toive tsü eno amikucho pe ayeghi lono nedaqodave tsü chekeqo!

⁸ Püghüno süpemi eno Ayenokilimi lhosü keu, tsüküzü pesü tsüküvü shivetsü, eno puchou pesü putho shivetsü, azüghi zü ku püzü ayeghi shou leqhitsü chekeu, Pa je ye Ampeu ke;

⁹ Pa no akumtomi shou züleno kütsakungo keu puwu, tishianguno aliwo shou kütsakungo keu ighi cheni.

¹⁰ Panongu no khagho lo shikithetsü kemi mithi, eno kuchou tsa pi kemi jukuchhube cheni.

¹¹ Kughengu nongu no kumlhomi nedaqoda eno pa launo athi zame luve chenike ghenguno, nongu no heküthatu ki shiqhe püaghi namu, nongu ye tile ngomla nani; nongu no alo kepushi atsailu chi ani kemu nongu ye tipaqo tsaiji shomla nani.

¹² Kughengu no xine ye khije eno kishi kije keno I no ithi ani— nongu no achipiu mikuchomi kijipüsa, külügho lu, eno khagho lo aveküsami juzüve chenie.

¹³ Tighenguno ado titoi kelo alokütsümi ye inaqhoive cheni, kughengu hi ye alhoksa doke.

¹⁴ Alhoksa kumono achipiu phulo, tishi aye nongu ye xülu nani: eno nongu no piche ketoi Ampeu, aqokitikhi Lhou no nongu gholo anani.

¹⁵ Alhoksa mithi eno akivi kimiyelo, khagho lo achipiu xakütha puthuphelo; tishi aye Ampeu, aqokitikhi Lhou no Joseph lagha lo ghükulumi kimiyeqhiyi lunani.

¹⁶ Tighenguno Ampeu, aqokitikhi Lhou, no ishi piani: “Aphughi kuchopu mloqa nani, eno alaghila kümtsü lo, ‘Aha! Aha!’ ipi igha nani. Panongu no alu kichimi eno akumlo lo aqe kiqemi kusü püzü mloqape nani,

¹⁷ atsailu kümtsü lo mloqa nani, kughengu I no nongu heche wunani,” ipi Ampeu no pi.

Kuchou-xakütha no Qowu pelo

¹⁸ Khunono Ampeu tsala laju cheni keno ahasapue! Kushiye ti kheni kea? Ti ye aküzü thono aküvü kumoe,

¹⁹ milakhi no abongshuu launo poche kelaye ava sholu ketoi, momu aki lo ilo pa u no atozü bu kelaye apighi no mighi ketoie.

²⁰ Ampeu tsala ye aküzü thono aküvü kumo eno vüqai mono züchiyi kekumo?

²¹ Ni ye now tiqhetiniqo mithi eno junishi moe, eno nongu hukülü hohoqo lo I züküvü kühae.

²² Nongu no akipti kümllagho ngo athi kümllagho süghi namu I no ikhilu tsümo nani; eno now athakupu lhoxü pesü külakishi kümllagho shikeu Ni ye tipa shou jupukumo nani.

²³ Nongu le ghügha tavelo; Ni ye nongu kighilebo ghügha inimo nani.

²⁴ Ikemu kuchou-xakütha no azüghizü toi qowu pelo, eno achipiu-mikucho no qotamo keu ghoki toi pelo.

²⁵ “Nongu ye ampe lhobidi asayeqha lo chekelo I lau aghakishi ngo akümllagho süghi keshea, O Israelmi?

²⁶ Nongu ye no kükau Sikkuth ngo no yepu-lhou Kiyyun—nongu u no mlakeu julho ikhiluve nani,

²⁷ ikehu I no Damascus nguno hulau nongu hakiphi sawuve nani,” ipi Ampeu khuu je aqokitikhi Lhou keno Pa no piani.