AMUS 4 - Sumi Naga CL (Re-edited) Bible (BSI)

¹ “Nongu Bashan mishiqo, khunono Samaria naghuto lo ani keno, kumlhomi qhasü, aveküsami chunudaqhi, nongu kimiqo vilo, ‘Nino aji shonike süghilo,’ ipiche keqo, atsa hipau inilo!

² Ampeu Alhou no Pa kimthe lono tushoqhive ake julo, akuhoyi no nongu fuluve, eno akha kümsüpuyi no nongu gholo ashekhau kutolo fupe wuve kepu tsala huye nongu lau cheni.

³ Nongu ye aliwo kighipe lono müzüchoi azüu sawuve nani; eno Harmon lo vepheve nani,” ipi Ampeu no shuphe.

⁴ “Bethel lo ighi no axine shialo; Gilgal lono axine küghüsü alo; inaqhe atsütsü nongu ghakishi süghilo eno aküthüni no nonguw chighi saje süghilo;

⁵ kholaqhi sükeu shikimthikütsü kümllagho pesü tsülo, eno pulokini kümllagho pesü pikülha asheshulo; kughengu nongu ye tishikeu alo chenie, O Israelmi!” ipi Ampeu no asheshu.

Israel ye Ampeu lau Ideighimo

⁶ “Now mishighüna kümtsü lo I no ahu kimthe pesü tsüe, eno no kungo-a kümtsü lo asho küpüqü tsü keghi nongu ye I lau ideighi moe,” ipi Ampeu no pi.

⁷ “Kughou ghile hunike aqhi küthü akeno I no nongu launo tsütsüghu ghi süchileve; I no mishighüna lakhi lo tsütsüghu puwu kemu lakhiu loye puwumo; alu lakhi loye tsüghuqhi tsü ikemu alu khile tsüghuqhi mo keno ti ye ighüive;

⁸ ikehu aphughi kini küthü lo küami no azü yenike aphughi lakhiu lo wu kemu aghapiqi lumoe; ikeghi nongu ye I lau ideighi moe,” ipi Ampeu no pi.

⁹ “I no amülhü kushu ngo akughumho pesü nongu tsü; nongu ghutu eno atsailu kutomo, now mubuthi eno olive süboqo ye tülhaqu no külhüve; ikeghi nongu ye I lau ideighi moe,” ipi Ampeu no pi.

¹⁰ “Egypt lo toi I no nongu shou püsa puwu no azütakikihi pesü now lhothemiqo pithive, eno now khurshi süxape wuve, nongu ghazü lo akumo kümna pesü nongu nigi lo sütsü; ikeghi nongu ye I lau ideighi moe,” ipi Ampeu no pi.

¹¹ “Alhou no Sodom ngo Gomorrah kütsave ketoi I no nongu khami kütsavae, nongu ye amiphoki lono amsü püxü phelu ketoie; ikeghi nongu ye I lau ideighi moe,” ipi Ampeu no pi.

¹² “Tighenguno I no hitoi nongu lau shini cheni, O Israel; eno I no nongu lau hi shini cheni kehu o Lhou sasü kushoni ke kutolo, O Israel!”

¹³ Kughengu julo, naghuto ngo amülhü lhophe keu, Pa kükümsü timi lau lheqhi keu, inaqhe pesü aküzü kughulhove, eno ayeghi kuchuqu lono chewu chekeu, Pa je ye Ampeu, aqokitikhi Lhou ke!