AMUS 3 - Sumi Naga CL (Re-edited) Bible (BSI)

Israel Kipimi eno Aghime

¹ O Israelmi, Ampeu no nongu shou pipuku akeu, Egypt yeghi lono I no saipeghi keu shiaye kümtsü shou pipuku akeu tsa hi inilo:

² “Ayeghi lo ashiaye kümtsü dolo Ni ye nongu likhi ithie; tighenguno no xine ghenguno I no nongu ghime nani.

³ “Pulokilemo kelo mikini ye kümtsa chewu luni keshea?

⁴ Abongshuu ye tsüqhi kepu lhoxü küha kelo aghasü lo ighani keshea? Abongshuu lhothe ye kiumu tsüqhilu moaye pa ki lono ighani keshea?

⁵ Ayeghi lo alichhe shimo keghi aghau ye ikiqi meni keshea? Alichhe lo kiumu iloghimo keghi pakutoshi no xakhalu nani keshea?

⁶ Mishighüna lo afuko igha aye timiqo ye msa moni keshea? Ampeu no puwumo kelo mishighüna lo kütsakungo keu ighini keshea?

⁷ “Kughengu Ampeu Alhou ye Pa qemi tungkupmi lau Paw tuqhou pephe piyemo keloye kiumu shichemoe.

⁸ Abongshuu no igha kelo khuu no msa moni kea? Ampeu Alhou no piqhive ake khuu no tungkuptsa sheshu moveni kea?”

⁹ Ashdod eno Egypt yeghi lo sükusho-aqo lau asheshu lo, eno pilo, “Samaria naghutoqo lo nongu hekütsülo, eno timiqo no shishe ighamku akeu, pano dolo nedaqoda kile akeu julo.”

¹⁰ “Khunono anguka lono süxape sükusho-a lo püani keno,” “tipaqo ye kishi achipiu shini keno mthae,” Ampeu no pi.

¹¹ Tighenguno Ampeu Alhou no ishi piani: “Aghümi no ayeghi botha luve eno aküghütshü-a kütsave tsü eno nonguw sükusho-a xulepuwuve tsü nani.”

¹² Ampeu no piani, “Ambekheu no abongshuu kichi lono apukhu kini momu akinibo tüxa hakholu keshi, Samaria lo Israelmi akeqo ghi amekusho lakhü acheku lakhi eno alüpa tüxa gholono hakholu nani.

¹³ “Inilo, eno Jacob lagha lakichile shepe shilo,” ipi Ampeu Alhou, aqokitikhi Lhou no shuphe ani.

¹⁴ “Tipani I no Israel xine ghenguno pa ghime nani, Bethel lo akiptia ghime nani, eno akiptia lo akibo akeqo ye ikhipe ayeghi lo veqhive nani.

¹⁵ I no süsü ki gholono mütsü ki ghi kütsave tsü nani, akühahu ki kuboleve tsü eno akighiki xaleqhive tsü nani,” ipi Ampeu no shuphe.