AMUS 2 - Sumi Naga CL (Re-edited) Bible (BSI)

¹ Ampeu no ishi piani, “Moab xine küthü ghenguno, eno bidi ghenguno, Ni ye aghime süchilemo nani; kughengu pa no Edom kükau saghi ayevu shi pitivetsü.

² Ikehu I no Moab shou ami puwuni, eno tino Keriothw sükusho-aqo pitileve tsü nani, eno Moab ye mbumghu akelono, aghükishi eno afuko ghügha igha akelono thive nani;

³ I no pa launo yepeu ikhivetsü, eno paw kükapumi kümtsü pa gholono pithive nani,” ipi Ampeu no piani.

Judah shou Küghakütha

⁴ Ampeu no ishi piani, “Judah xine küthü ghenguno eno bidi ghenguno, Ni ye aghime süchilemo nani, kughengu panongu no Ampeu yezah milivae, eno akhuayeqo pemovae, pano kimki no pano sabidevae, pano puasüqo no cheche keu laghi panongu no pape wuvae.

⁵ Tighenguno I no Judah shou ami puwuni eno tino Jerusalem sükusho-aqo pitileve tsü nani.”

Israel shou Küghakütha

⁶ Ampeu no ishi piani, “Israel xine küthü ghenguno eno bidi ghenguno, Ni ye aghime süchilemo nani; kughengu pano no ghükayi ghenguno amikuchomi jechuve, eno apukhuqho ghenguno kumlhomi jechuve.

⁷ Panongu no ayeghimkhu lono kumlhomi kütsü qoda eno iju akemi la tutsüghüve tsü; anu ngo apu pama gha aqelimi lakhi sazü no I je kimthe shikitiqe ke;

⁸ nalu keu theli lo aphimini qhipüa keqo panongu no pesü akümlla-a lono qhazü, pano Lhou ki lono asüchuve kemi tsaiji pewo sho acheni.

⁹ “Ikeghi panoqo zülono Amorimi kütsave keu ye I no ke, panongu ye akiqhelau Cedarbo toi chuqumghai eno aphisü toi choshiyike; kunguu no pa xathi eno aqhou no pa kuhu aghü I no kütsave tsü.

¹⁰ Egypt yeghi lono nongu saipeghi keu hughi I noe eno Amorimi yeghi pesü tsüniye ampe lhobidi asayeqha lo nongu sacheke.

¹¹ Nongu nuli khami tungkupu shi peniye I no saputhu, eno apumi khami no Nazirmi shi peniye saputhuke. Tishike kumo, O Israelmi?” ipi Ampeu no shuphe.

¹² “Ikemu nongu no Nazirmi pelo atsaiji shope eno tungkupmi vilo, ‘Nongu ye tungkuptsa pimla’ ipi azah tsü.

¹³ “Julo, mishikulu no athi xapu ayeghi nedasü ketoi I no nongu-a lono titoi nedasü nani.

¹⁴ Akümthümi no pomlave nani, akumtomi no pa küka kühave eno aghütomiu ghi pa küxü xamlave nani;

¹⁵ shexilika kipeu ghi puthugho mlave nani, eno apukhu kümthüu ghi pa ampi xamla nani, tike kumono khurshi sakicheu ghi pa küxü xamla nani;

¹⁶ aghütomi dolo khuu no amlo kumtou keno tipa tsala loye aphi kümsa pove nani,” ipi Ampeu no shuphe ani.