ALE KIMCHI 8 - Sumi Naga CL (Re-edited) Bible (BSI)

Akiptiu no Pa Qhuu kümsü

¹ O pelo I za kichhizü no loji puthukeu I mu shiaghi penishi nolae! I no o sholu no o müma namu khunomu I jukünatha moniche.

² I shika chekeu I za kilo I no o sawuni cheke. I no mülüi keu tsaizü, Iw khaghatu zü o piyeni che.

³ Pa u piyiu pesü I kütsü kümkhü shi eno pa u ajeu no I vape!

⁴ O Jerusalem lo ilimiqo; nino kimiye kile akelo alopiqilu moke kutolo nongu ye vexa tsümonie pi I lau tushoqhi lo.

⁵ Asayeqha küdau no li lomi mungupe iqhoche keu huye khuu kea? Apple sübo qholono I no o küdaputhuke. O punuu o za ye tileno ihino o punuke.

⁶ I küghape o mlo eno o u lo amchipu shivelo, kughengu kikimiye ye akithi toi akumto, anhekushu ye akumokilive toi ayiküsae. Tipau mi ye Ampeu mi toi shishe müghake.

⁷ Azüghi zü mu kikimiye mi ghapinhe mla, tike kumo atshünazü mu ti yimive mlae. Milakhi no kikimiye qhüniye pa kilo küakini qhoi tsünamu ti ye shishe atichepu shi nanie.

Ashekhau Mijekütsü Kütami

⁸ Ningu ye achepu lakhi akichhi kühakeu anie. Li ini ighike tsala lo li ghenguno kishiveni kea?

⁹ Li no aliwo keaye nino li shokha kepu ghükayi tozü mla tsüniche, eno li no khagho keaye nino cedar süpa pesü li bothasü luveni cheke.

Atotiu

¹⁰ Ni ye aliwo lakhi shiche, eno I kichhi no aghukhe qoghe toi ache; tileno timi no aloino keu phulu akeshi I no I lomi nhethi lo kiyighiu shive.

¹¹ Solomon no Baal-hamon lo atsailu ache; pa no alu tipau pesü akhemi mishive; milakhikhi no ghükayi 1,000 tsüni keu shie.

¹² O Solomon, nono 1,000 lu aghiluvi, eno akhemi no pano saje 200 ithuluvi; ikemu I likhi Iw, I tsailu huye I zülo anie.

Akiptiu

¹³ O no khuu aküsami no o tsa ini aghutu lo acheni keno, ni ghi ti chilu pelo.

Atotiu

¹⁴ I qhuu, mtazü ighilo, tsüngqüi keu naghuto lo achuyi momu aqhu lhothe toi mighilo.