ALE KIMCHI 7 - Sumi Naga CL (Re-edited) Bible (BSI)

¹ O kükapuu nonga, nono apukhuqho pukelo o pukhu ye kiutoi jukivi kela! O lukobo chopumloi keu ye ameshoyi toi kütshaküghami u no mla püake toike.

² O pola ye atsaizü lekikite mpivemo keu chithakhu mihike. O po ye ashothi mushope lapu no vehopüa keshie.

³ O kichhi küma ye asheti kini toi, achuyi pitikishe keu mihike.

⁴ O kuo ye akühahu ghukhe qogheki toie. O nhethi no Heshbon lo Bath-rabbim khagho lo azükhe akeu toike. O nigipe ye Lebanon ghukhe qoghe no Damascus küdau jupuwo akeshie.

⁵ O kütsü ye Carmel toi qhemghai, O sa kipili no hughaike phi toi; tipau jukivi ye akükau ghi tshüluve nani.

⁶ O I züküvüu alomi, no ye kiu toi jukighilepu eno alokepu kelae!

⁷ O hi kivi ye amsabo toi eno o kichhi no chhikhoi amsa xathipho toike.

⁸ I no pi ani, ni ye iku tipau xathi xonie. O, o kichhi no atsaipho toi peniu, o tuthu no apple xokütsüngü toi,

⁹ eno o kichi no atsaizü akiviu toi peniu. Atsaizü no I qhuu mütsü eno ahu veche qoilolu pelo.

Atotiu

¹⁰ Ni ye I qhuuw ke, eno pa no mine chekeu ye ni ke.

Külaliu no Liw Kikimiye Tsü

¹¹ I qhuu, nikujo aluza qhalo wuni eno aphuqo lo zünike shilo;

¹² nikujo itheno atsaili lo wuno atsai kupu mpakho ani kemo keno juni, eno khaghatu puipeghi ani mala juni. Tilauno Iw kikimiye pesü o tsünie.

¹³ O I qhuu, zünilobo no axo kivi tsü nani, eno axathi kivi, aqau ngo akitheu kümtsü ni hukikha phivilo I no o sala qhipüa tsüae.