ALE KIMCHI 6 - Sumi Naga CL (Re-edited) Bible (BSI)

Kütami

¹ O totimi gholo shishe ajukiviu, o qhuu ye khila wuve akea? Nino o sasü phunike khiküdau wuve kea?

Kikimiye Ghutu lo Kümtsa Ngo Atotiu

² I qhuu ye pa ghutu lo iqivae, pa tsü-aqu achu kümza eno lapu xoniye tsüngqüikeu tsünibo ghutu lo iqivae.

³ Ni ye I qhuuw, eno pa no Iw ke; pa no lapu pholi lo pa tsü-aqu kümza cheni.

Solomon ngo Paw Külaliu Lokiqi Akiptiu

⁴ I lomi, no ye Tirzah phughi toi jukivie, Jerusalem toi jukighilepue, ghüshimi no michiphi peche ketoi akimchi ke.

⁵ I launo o nhethi kughovelo, kughengu tino I mhoqhive ani— Ane loji no Gilead qhelo kuhakive iqiche keshi o sa ye sasashi jukivie.

⁶ O hu no amhi ghove keu mbequ loji no azükuchhu pusü akeshi metsüghoi; lakhimu ilamo no kümtsü xemtsüi.

⁷ O gi künhaphi thiu o gimuchu ye khaghatu ghakupho tüxaxa shipüa ketoie.

⁸ Akükau nipu lhotsügho, amishiu no lhotache, eno ililhotheqo no kihimla akelo

⁹ Iw miqhedu, kupukülai keu ye li likhike, li ye paza polo li likhi, eno aza mlo kuchuuke. Ilimiqo no li ithulu no akishe tsücheni; akükau nipu ngo amishiuqo ghi li sheqheke.

¹⁰ Khuu no tsükutho tsütsü toi jupiqi, aqhi toi juvi, khetsünhe toi vüqai, ghüshimi no michiphi peche ketoi ani kea?

Atotiu

¹¹ I no akhila lo asübo, atsaibo eno khaghatubo mini ani kemo keno juniye ghakuthili lo iqie.

¹² I no ithikuto lumphi lono I kükümsü no I küghape I kükapuuw khurkulu lo küghüqave.

Kütami

¹³ Ideighilo, ideighilo, O Shulam liu, nino qheghüi o junike ideighi pütsalo. Kushiye nongu ye ghüshimi aqo kini zülo ilhe akeshi Shulam liu jukuto ani kea?