ALE KIMCHI 5 - Sumi Naga CL (Re-edited) Bible (BSI)

Akiptiu

¹ I chepu, Iw külaliu, ni ye I ghutu lo ighivae, jumghaikeu mukhu ngo müsüghüta pekütsüvae, akhi kütsü gholono akhingozü chuvae, atsaizü ngo akichhizü yevae. Aküsamiqo, chusho lo eno kikimiye shomzü alo!

Kütami Külaliu no Li Qhuu Phuwu Atotiu

² I no zühuju kemu I mlo ye ithu ae. Asütsa lakhi! I qhuu aki kukhu ani. “I lomi, I chepu, I khaqhisü lo, Iw miqhedu, Iw kupukülai keu, kughengu I kütsü ye atsüzü no pütsavae, putho tsüzü kighiji no I sa ghoküna keu dadaivae.”

³ Ni ye I phimini xave akeghi kishi pepu kitheni kea? I pukhu qhuve akeghi ayeghi nekithe lopi kea?

⁴ I qhuu no ahukikha heküptasü bu, ikelo I mlo alouno kukushive.

⁵ I no I qhuu khaqhi süniye ithu, I u loba lono müsüghüta thazü no iji ghi ahukikha küpta lo I u be.

⁶ I no I qhuu ghenguno khaqhitsü, ikemu pa ye idewove aghi. Pa sütsa chiluni shi ake I nhü-aghü thive. I no pa phuju kemu phumlave; I no pa ku kemu pa ye khochile moe.

⁷ Aphughi lo akhemi no itsüsü aphughi xüche kelono ni ithulu; panongu no I heqhi no ghüzave, eno I gi künhaphi pewuve, tipaqo ye aliwo khemi ke.

⁸ O Jerusalem lo ilimiqo, nongu no I qhuu phulu aye, ni ye kikimiye küsü no thiqhi anipi pa vilo pitsüni keu shoqhi shilo.

Kütami

⁹ O totimi gholo shishe ajukiviu, o qhuu ye kütami nguno akiviu keshea? O qhuu ye kiu lono kütami nguno akiviue pi ni vilo tushoqhipe ani kea?

Külaliu no Li Qhuu Sheqhe Atotiu

¹⁰ I qhuu ye puyelei eno choshiyi, qhethonhe chighi gholo ghi akimchi.

¹¹ Pa kütsü ye ameshoyi akiviu; asa kipili no ighe, agha toi tsübuike.

¹² Pa nhethi no aghoki mkülo miqhedu akichhizü kuchhu pusü ngo akeshi.

¹³ Pa gimuchu ye axokütsüngü tsünibo ghutu toi mülüi ke. Pa mütsü ye lapu xamunu no axokütsüngü kighiji keue.

¹⁴ Pa u mlo ye ameshoyi chopumloi keu lo akughupu tu dapüa keshie. Pa phimpi no akühahu lo atsülatu dapüa keshie.

¹⁵ Pa pukhu ye ameshoyi shou alabaster tsükucho ghopüa keshie. Pa koghe ye Lebanon lo cedar kighiche toike.

¹⁶ Pa tsapi ye ighono jumghai, eno pa philo mine kepu likhi ani. O Jerusalem ilimiqo, hi no I qhuu eno I küsau ke.