ALE KIMCHI 4 - Sumi Naga CL (Re-edited) Bible (BSI)

Solomon no Külaliu Jupe Alokütüve Akiptiu

¹ O I lomi, no ye aju kivi, ighono juvie! O gi künhaphi thiu o nhethi huye miqhedu toi mtshaminhei ke. Ane loji no Gilead qhelo kuhakive iqiche keshi o sa ye sasashi jukivie.

² O hu no amhi ghove keu mbequ loji no azükuchhu pusü akeshi metsüghoi, lakhimu ilamo no kümtsü xemtsüi.

³ O mtsü no ipumheike phi toi hughüi, eno o kichi no ighono juvie. O gi künhaphi thiu o gimuchu huye khaghatu ghakupho tüxaxa shipüa ketoie.

⁴ O kuo ye David ghukhe qogheki atu pesü ajoshi mlapuku no tile aghütomi züto qhethonhe pufu püakeshie.

⁵ O kichhi küma ye asheti kini toi, achuyi pitikishe küma no lapu xamunuli lo achu mzache keshie.

⁶ Inaqhe mülhü ighi moke kutolo eno aküzü hauve moke kutolo, ni ye müsüghüta naghuto eno tsüngqüikeu mukhu toghi lo wuve niae.

⁷ I lomi, o ju kivi ye kupukülai; o philo tukutiye kiumu kühae.

⁸ Lebanon lono I lau ighive lo, Iw külaliu; Amana, Senir, eno Hermon toghi qhivelo, abongshuu tuki eno akhighiu ngushuu achekeu naghuto lono chevelo.

⁹ Nono I mlo sünhe luvae, I chepu, Iw külaliu; o nhethi no ghuthu lakhi juke lono, eno o chiku lakhi huno I mlo sünhe luvae.

¹⁰ O kikimiye ye kiutoi alo kela, I chepu, Iw külaliu! Ti ye atsaizü nguno kishi akiviu kela, eno ow thazü xo ye jumghaikeu mukhu nguno akiviue!

¹¹ O mtsü no akhingozü kighiji cheni, Iw külaliu; Akichhizü ngo akhingozü no o milibo qholo anie; o phimini xo ye Lebanon xokütsüngü toike.

¹² Aghutu khatha püakeu huno I chepu, Iw külaliu, li ye akhadu süve keu züpuki ke.

¹³ O müzü ye khaghatu xathili lo axathi akiviu pithi chekeu toi, eno axokütsüngü tsüni henna ngo nard,

¹⁴ khungthibo, calamus, eno aküsabo, tsüngqüikeu mukhu tsünibo jeli, müsüghüta ngo aloe gholo jumghaikeu mukhu jeli toike.

¹⁵ No ye aghutulo züpuki, aküxüpu zükikhe, Lebanon lono qowu akeu ghokiqo ke.

¹⁶ Ithulo, O ahuu mülhü, Ighilo, O apeu mülhü! I ghutu shou mülhü pukulo, tipau xokütsüngü no vechighi müna pelo. I lomi pelo pa ghutu lo ighi no tile axathi akiviu chu pelo.