ALE KIMCHI 3 - Sumi Naga CL (Re-edited) Bible (BSI)

Külaliu Samo

¹ Putho lo I züa lono I ngulho no khuu kimiye cheni keno pa phuju; ikemu pa phumlave.

² Itehi ni ye ithu no aphughi qhalo wuni, alaghila eno kobidi qhalo phuwuni; I ngulho no khuu kimiye cheni keno pa phuni. I no pa phuju kemu phumlave.

³ Aphughi lo akhemi no itsüsü aphughi xüche kelono ni ithulu. “Nongu ye I ngulho no kimiye chekeu ithulu kema?”

⁴ I no panongu veche kithishi pa phulue. I no pa valuve no pa sasü I zano kilo I punuu chebo lo ilo moke kutolo pa phevemoe.

⁵ O Jerusalem limiqo, I vilo piqhilo, nino kimiye kile akelo alopiqilu moke kutolo nongu ye vexa tsümonie pi aghasa lo achuyi ngo aqhu jeku I lau tushoqhi lo.

Solomon no Külakupu Ghenguno Ighi

⁶ Asayeqha lono amchhi kupho toi, lhidimi u lo tsüngqüikeu mukhu müsüghüta eno tsüngqüikeu ta no phochighi akeshi iqhoche keu ye khuu kea?

⁷ Julo, huye Solomonw awophe ke! Israel lo akumtomi gholo aghütomi pano lhotsügho no ti sühope cheni,

⁸ panongu kümtsü aghükivimi eno azütakikihi chepu cheni, putho lo leighi nosa kehu kümtsü no aluko lo azütakikihi tsüghapu cheni.

⁹ Akükau Solomon ampi no Lebanon sü pesü awophe chebo mla püanie.

¹⁰ Pa no ghükayi pesü tipau tsükucho küzü, aghütsü lo ameshoyi da, alakhü lo hughaike phi qhae; tipau alou ye Jerusalem lo ilimiqo no küpüqhiyi ghokeu phi no tünananu shitsüe.

¹¹ O Zion lo ilimiqo, ipeghilo eno Akükau Solomon julo, pa küküla tsala, pa lokivipu tsala lo, paza no qhopipe keu kütsükuqho pusü cheni.