ALE KIMCHI 2 - Sumi Naga CL (Re-edited) Bible (BSI)

¹ Ni ye Sharon lo rose xamunu, akhila lo lapu xamunu ke.

Akiptiu

² Asahuli lo lapu xamunu akeshi I lomi ye ililhotheqo gholo titoie.

Atotiu

³ Aghasü lo asüboqo dolo apple xathibo akeshi I qhuu ye apumiqo gholo titoie. I no azüküvü kije lono pa kusho qholo iqa eno I lopushi pa xathi kungo michelue.

⁴ Pa no I sasü aghulhu shi akeu kilo wu, eno I shou kikimiye michiphi süqheke.

⁵ Atsaikipki ngo apple pesü I ghüthi püxü no I shikumto tsülo; kughengu ni ye kikimiye küsü no thiqhi anie.

⁶ Pa u piyiu pesü I kütsü kümkhü shi eno pa u ajeu no I vape!

⁷ O Jerusalem lo ilimiqo; nino kimiye kile akelo alopiqilu moke kutolo nongu ye vexa tsümonie pi aghasa lo achuyi ngo aqhu jeku I lau tushoqhi lo.

Külaliu no Li Qhuu Gihu

⁸ I qhuu sütsa chilu anie! Julo, pa ye naghuto eno atoghi ilhechesü I lau cheni.

⁹ I qhuu ye achuyi momu aqhu lhothe toike. Julo, pa ye hi ighivae, atozü dape alashe lono pishipulo ju anie.

¹⁰ I qhuu no I pütsa no pi: “Ithulo, I lomi ajukiviu, eno I gholo ighivelo,

¹¹ kughengu julo, süsütusho ye wovae; tsütsüghu ghi taveno wuvae.

¹² Aqha kümtsü lo axamunu pu ipeghiuva, alekiphe do ighivae, eno ni luza lo miqhedu sütsa chilu ayae.

¹³ Mububo no pa xathi pinitsü, atsaibo no aheshi pule; eno tipaqo no axokütsüngü kivi tsü ani. Ithulo I lomi ajukiviu, eno I gholo ighivelo.

¹⁴ O Iw miqhedu, atu nhepho lo eno atuxu cheku lo itshü akeu, I pelo o gi ithulu eno o sütsa chilu pelo, kughengu o sütsa ye jumghai eno o gi ye juvike.

¹⁵ Atsaibo shipüsave chekeu aghalo tsüqo ni ghenguno kügha tsülo, kughengu ni tsaiboqo ye puaya ke.”

¹⁶ I qhuu ye Iw, eno I no paw ke; pa no atsü-aqu sawo lapu xamunuli lo achu kümza cheni.

¹⁷ I qhuu, inaqhe mülhü no ighi moke kutolo eno aküzü no hauve moke kutolo, naghuto nhepho lo aqhu lhothe toi momu achuyi hutoi I lau ide ighivelo.