ALE KIMCHI 1 - Sumi Naga CL (Re-edited) Bible (BSI)

¹ Solomon le, kümtsü gholo akimchi.

Külaliu no Li Kikimiye Shuphe Atotiu

² O kichi pesü I müma lo! Kughengu o kikimiye ye atsaizü nguno akiviu ke;

³ o philo axokütsüngü ye tsüngqüi; o je ye axokütsüngü thazü münalu akeshie; tighenguno ililhotheqo no o kimiye cheni.

⁴ I sasü o gholo wuvelo; nikujo mtazü wuvenie. Akükau no I sasü pa chebo lo wue. Ningu no o gholono shishe alovi küqhani; ningu no atsaizü nguno alau o kikimiye lo alovini; ilimiqo no o kimiye chekeu ye achipiloe.

Kütami Atotiu

⁵ O Jerusalem lo ilimiqo, ni ye tsüngtsüi kemu jukivie, Kedar lo aphiki toi, Solomon chineki lo nhaqhiphi toike.

⁶ I no tsüngtsüike ghenguno thüghüi I ju kevilo, kughengu khetsünhe no I phuqhive ke. I mu noqo no I ju amloide kelauno I küghape atsailu kheu shipe, ikehu I likhi I phimpi ye jukuto mlave!

⁷ I ngulho no kimiye chekeu I lomi, I vilo pilo, no ye khileno o tsü-aqu achu kümza eno puchomghü lo khile püzüve cheni kea? Kughengu ni ye agi nhapu chekemi kimihishi o küsami tsü-aqu gholo cheche mlae.

Solomon ngo Paw Külaliu Lokiqi Akiptiu

⁸ O totimi gholo jukiviu, nono mthano aghi aye, atsü-aqu nepa shesü papelo, eno o netiqo sasü ambekhemi phiki phivilo no achu kümzalo.

⁹ I lomi, I no o pesü Pharaohw khurkulu sünhekicheu khurshi ali kimghilu ani.

¹⁰ Amekusho thime no o ju kivi gholo küpha, o kuo lo ameshoyi chila huno aküzüqhiyi ke.

Kütami

¹¹ Ningu no o ghenguno ameshoyi chila lo ghükayi pesü tünananu shikeu mla tsüni.

Atotiu

¹² Akükau no pa lakhü lo akulhoqhi akelo, Iw nard xokütsüngü no tsüngqüi pa kümna.

¹³ I qhuu ye I kichhi dolo müsüghüta xinipu akeu huke.

¹⁴ I qhuu ye Engedi tsailu lo henna xamunu kupupho huke.

Akiptiu

¹⁵ O I lomi, no ye aju kivi, ighono juvie; o nhethi no miqhedu toi mtshaminhei ke.

Atotiu

¹⁶ O I qhuu, no ye jukivie, kuchou no azüküvüpu anie. Nikujo küzü-a ye xüthilei ani;

¹⁷ nikujo ki khetsü ye cedar sü; eno axu no asahusü no shipüani.