AKUMLO 5 - Sumi Naga CL (Re-edited) Bible (BSI)

Ni Sachile lulo, O Ampeu

¹ O Ampeu, ni shou kiu ikughi keno kümsülulo, julo, ni kukujopu ithulu tsülo!

² Ni mheghi ye khalaumi tsüvae, ni kiqo no inaghami tsüvae.

³ Ningu ye mighimi, apu küha; ningu pazaqo ye chimemi toivae.

⁴ Ningu ye nino yekepu zü qhü masavae; nino asü ithulu akeu ye qhü masavae.

⁵ Ni hache kemi no ni zübo choha ighivae; ningu ye akulhokiqhi tsümono lhovae.

⁶ Asho ililai ithuluni ye nino Egypt eno Assyria u lo ilove.

⁷ Ni puasüqo no axine shive, panongu ye kühavae; nino pano kipimi xapu anie.

⁸ Aqüaxemi no ni shou ayepe ani; pano u lono ni xapheni kemi khumu kühae.

⁹ Asayeqha lo azütakikihi ghenguno ni küxü pesü akümsapu lo süve ghi ningu ye asho ithulu ani.

¹⁰ Püqümiye no pitipüza ningu yiko ye amiphoki toi lü ani.

¹¹ Judahw mishiphuqo lo ililhothe eno Zion lo totimiqo pesü shipütha ani.

¹² Sakiphemiqo ye au tsüghape kunguu no tshüqhi; layemi lau agigihu piyemoe.

¹³ Lhothemi no anguka lono athi tsüghüpe, eno itimi no asü xapu kulokuloi alache.

¹⁴ Layemiqo ye mishighüna khagho lono chevae, lhothemiqo no pano lekungo phemovae.

¹⁵ Ni mlo lo alokivi kishekhavae; ni kighilhe no akumlo ilhouvae.

¹⁶ Kükakütsüqho ye ni kütsü lono ikiqivae; nino axine shive kehu ningu ye ahasapuae!

¹⁷ Hi ghenguno ni mlo ye sü ani, hi ghenguno ni nhethi ye zamemeivae,

¹⁸ Zion Toghi khikhi pighive akeno tüngtüghaqo no tile iqhoiqi ani.

¹⁹ Ikemu, O Ampeu, Nono alholo ayepe ani; O kükalakhü ye tiqheli kümtsü lo ache nani.

²⁰ Kushiye No ye pülhapuju ni kümsümave ani, kushiye No ye atsala kutomo ni qhive ani kea?

^21-22 Nono ni mili kuchou shive aghimo aye, eno shishe ni shou amloide aghimo aye, O Ampeu, ni sachile lulo, eno ningu ye xaluve nani! Khaghi tsala toikeu ni tsüchile lo.