AKUMLO 4 - Sumi Naga CL (Re-edited) Bible (BSI)

Akimthe Tuquqo Apanaghave

¹ Ameshoyi ye kishi thibuiva, thakimtheve keu meshoyi ye kishi kiliva kelae! Alaghila kümtsü lo akimthe tuquqo ye apanaghavae.

² Zion lo akughupu pumiqo, ameshoyi kivi meküa qhemi, ikeghi panongu ye kishi ali kümlau u no mlakeu aghanili toi peitha ani kelae!

³ Tüngtügha ghi ati pini cheni; panongu no ati tucho cheni, ikemu Iw timiqo nga ye yenguyike-a lo ostrichqo toi ayiküsa ilhouvae.

⁴ Atüghü ghenguno anga kughunu mili ye ataha lo meda luvae; anuliqo no achuqupu khu kemu khunomu panongu tsümoe.

⁵ Khunono aghulhu kivi chuche keno alaghila lono pühavae; khunono hughaike phi pipe püzü saputhu keno ayevu lo ihi ani.

⁶ Kughengu Iw timi nga ghime keu ye Sodom ghime nguno akijeu, ti ye khunomu li kuphu mono ghuthu khavino kütsave.

⁷ Liw kükapumiqo ye mürasü nguno tsüghükhüi, akichhizü nguno akimiyeue; pano phiau ye azükhenu ghitu nguno hughüi, pano kogheküghü jukivi ye amekusho tu toike.

⁸ Itehi panoqo gi ye akingu nguno tsübuivae; alaghi lo pano michi mlavae; pano yiko ye aghi lo ishikütsü luvae; ti ye asü toi qhaivae.

⁹ Ghüyi lono wove kemiu no aluza lo axathi küküha vecheo akhüava no chuxuqhi thive kemi nguno angukiviue.

¹⁰ Küpüqhiyi kemi totimiqo no pano tianuli heqhipe lhoke; Iw timiqo nga kütsale akelo tino pano chuqupu shive.

¹¹ Ampeu no Pa loghu kümtsü pükhüle; Pa mlokighide külü lephe, eno Zion lo ami küiqü no tipau boqhaqo pitileve tsü.

¹² Ashimi aghümi ye Jerusalem khagho lo iloghilu nanie pi ayeghi lo kükami, momu ayeghi lo küxümi khunomu pülümoe.

¹³ Hi ye liw tungkupmi xine eno achinemi kipimi ghenguno ke, panongu no li yeghi lono amikuchomi ji peleke.

¹⁴ Panongu ye anhethi iche kemi toi alaghila lo itsü cheni; panongu ye aji no shikitiqeve akehu khunomu pano phimini bumlavae.

¹⁵ Timiqo no igha pi, “Chevelo! Mithekumo! Chevelo! Chevelo! Bu kevilo!” Ikehu panongu ye itshüuve eno kupokichemi shive; shiye dolo timiqo no pi, “Panongu ye ni gholo xülu moae.”

¹⁶ Ampeu no panoqo halevae; Pa ye panongu kihimoae; agigihu pesü achinemi piyemo, kikimiye layemi piye move.

¹⁷ Adou lono akukuphu huqhe anipi ni nhethi ghi ithumlave; nino huqhe akelaye ni xakümlapu shiye shou jupuku aghive.

¹⁸ Ni pukhune sükiqhe kümtsü timiqo no miqe kehu ni laghila lomu chewu mlae; ni tsala ye kihithavae; ni shekuho ye kupunuvae, kughengu niw kishekha ye ighivae.

¹⁹ Ni hache kemi ye atsütsü lo alhuquqo nguno akümthüu; panongu no naghuto lo ni haighi; asayeqha lo itshüpe ni ngokhe.

²⁰ Ni küxü tuthu, AMPEUw kishekiphe kükau, khuu lau nino, “Pa kicheqho lono nino shiyeqo gholo xünani” ipiche keno pa ye küghaluvae.

²¹ O Edom limi, khuu Uz yeghi lo ani keno; alovi eno amloqilo; ikemu o lau ghi ajukhu ighi nani; no ye shomzüve no o phikümsa shive nanie.

²² O Zion limi, o xine ghenguno aghime ye tavae; Pa ye haphe sawu kithemae, ikemu O Edom limi, Pa no o xine ghenguno ghime nani; Pa no o xineqo lhephetsü nani.