AKUMLO 3 - Sumi Naga CL (Re-edited) Bible (BSI)

O Pükhükulu ye Kije

¹ Pa loghu qheküsü vecheo aghime ithulu keu ye ni ke;

² Pa no I hasü aküvü küha mithe keu küzü-a lo saighi;

³ mtsüqheino atsala kupuju I shou anguno anguno Pa u chhopukue.

⁴ Pa no I shi eno I yiko kilheve tsü; eno I saghi kubove tsüe;

⁵ kukhukimji eno akijiksa pesü Pa no I khasü eno I küzüluve;

⁶ khaghi lo kithimi toi, Pa no I pelo aküzü lo ngope.

⁷ Pa no I boluve eno ayikichhe no I qaqhike ni ye pomlave;

⁸ I no kuphu peniye ku kemu Pa no I kighini chilu tsümoe;

⁹ Pa no atuquqo pesü I laghi lakhave tsü; eno I laghi shikighijive tsüe.

¹⁰ Pa ye I ngokhe akeu ava lakhi, abongshuu itshü akeu lakhie;

¹¹ Pa no I pukhunepa tukighijive tsü eno I sütha pinyive; Pa no yenguyelei I qhive;

¹² Pa no Paw shexilika piqe eno I pesü Paw vemijipu shi qhie.

¹³ Pa no Pa leghubo lo apijiqo pesü I michilothi lo vesütsü;

¹⁴ ni ye ashiaye kümtsü zükutunupu shiauvae, puchopuju panow thoküghapu shiauvae.

¹⁵ Pa no akukhu pesü I shepichhi; kukhukimji pesü I ghapiqi tsü.

¹⁶ Pa no atu pesü I hu helavetsü, eno I pelo ayevu lo ihi ngope;

¹⁷ I ngulho ye aloino keu kühavae; alokiqi ye kiu keno ni ye kümsümavae;

¹⁸ tighenguno “Ampeu lau Iw kutuukulu pühavae; titoi Iw lajupu ghi kühavae” ipi I no pianie.

¹⁹ I ghime eno Iw kupokiche, kukhukimji eno mijimlai keu kümsülu tsülo!

²⁰ I ngulho no tamono tipau kümsülu no thibui acheni.

²¹ Ikemu I no hi kümsüchilelu, tighenguno ni ye lajupu aphie:

²² AMPEUw iqemokeu kikimiye ye khilemu tave chemoe; Paw küpükini ye khilemu kishekhave chemoe;

²³ tipaqo ye inaqhe atsütsü akithe ke; O pükhükulu ye kije ke.

²⁴ I ngulho no pi, “Ampeu ye I saje, ikehu I no Pa lajuni.”

²⁵ Ampeu ye khunono Pa pükhü, eno Pa phucheni keno tipaqo ju alo cheni.

²⁶ Milakhi no inaqhoi AMPEUw xakulu ngokhe keu ye aloe.

²⁷ Timi lakhi no pa lhothe lono kuokhasü xapu keu ye aloke.

²⁸ Kughou no amakho kimshi ighini keno iqünhei puqhelo;

²⁹ akichi pesü ayeghimkhu lo daluvelo, tile lajupu aghi nani;

³⁰ ghimeqhi akeu lau agimuchu kugho tsüno thokügha xapulo.

³¹ Kughengu Ampeu ye pülhapuju milivemo nani,

³² Pa no amloksa süghi namu Paw iqemokeu kikimiye kupukuno shi akeu kiqi lono Pa ye kimiyeqhiyi nani;

³³ kughengu Pa ye amlo lono ithithai no ghimeve momu timi tianuliqo shikughujuve chemoe.

³⁴ Ayeghi lo akughumi kümtsü apukhu no munudaveni keu,

³⁵ Shishe Akiqheu zülono kuchou xakütha miliveni keu,

³⁶ milakhi tsa kükügha süchighi keu ye Ampeu no pulomoe.

³⁷ Ampeu no azah tsümo keloye khuu no piqhive no tipau shikupu kulupu kea?

³⁸ Akivi aküsa ye Shishe Akiqheu kichi lono ighi chenike kumo?

³⁹ Kushiye küxümi lakhi ye pa xine ghenguno ghime kelo muchhoni kea?

⁴⁰ Ni laghi phuju no chhejuni nolo, eno Ampeu lau idewonie!

⁴¹ Kungugha lo Alhou lau ni mlo eno ni u süqheni nolo:

⁴² “Ningu no axine shive no hebidevae, eno Nono akipimi qhitsü movae.

⁴³ “O xukighide no O küzüpe ningu hakuqoe, eno kimiyemo no pithive;

⁴⁴ khüngküsü no No ampi küzüpho luve, tishianguno kiu kighini mu shoxü mlave.

⁴⁵ Nono ni pesü ashiaye gholo tübatüzü eno atachu shivetsüe.

⁴⁶ “Ni ghümi kümtsü no pano kichi xükhope ni lachile ani;

⁴⁷ thüghüi keu ngo aqokutho, hakiphi keu ngo kütsakungo no ningu shou ikughivae;

⁴⁸ Iw timi nga kütsave keu ghenguno I nhethi lo anhezü no aghoki toi qo anie.

⁴⁹ “Akulhoqhi mlano ashekha küha I nhezü no qowu anani,

⁵⁰ Ampeu no atsütsü lono jupiqi no ithulu moke kutolo;

⁵¹ I phughi limi nguküsa jupe I nhethi no I kütakihi ani.

⁵² “Akiqi kühamu I ghümi shi akeqo no aghau toi I hakuqoe;

⁵³ xüaphi lono panoqo no aqolo I vesüve no atu pesü I veqhie;

⁵⁴ azü no I kütsü yimi ikughive; I no pi, ‘Ni ye pühavae.’

⁵⁵ “Aqokutho lono I no O je kuke, O Ampeu;

⁵⁶ I no qhüiniju keu Nono chilu tsü, ‘I no akukuphu ghenguno ighamku kelo O kini kiyikhave kevilo!’

⁵⁷ I no O ku kelo Nono kupunu ighi no pi, ‘Msa kevilo!’

⁵⁸ “O Ampeu, Nono I she petsü eno I küxü qhüchilelue.

⁵⁹ I lau akumou shikeu Nono ithuluvae, O Ampeu; I she pe ghi küghatha tsülo.

⁶⁰ Pano mkhükulu eno I shou küsüqe keu kümtsü Nono ithuluvae.

⁶¹ “Panow thokügha eno I shou küsüqe akeu kümtsü Nono chiluvae, O Ampeu.

⁶² I ghümi mütsü eno akükümsü no atsala kupuju I lachile anie.

⁶³ Pano küghüqa eno ithukeu julo; ni ye pano tichepu shianie.

⁶⁴ “Pano kümla kiqi lono Nono pano lochile nani, O Ampeu.

⁶⁵ Nono pano mlo küzüpho tsü nani; O ngusü no pano shou anani.

⁶⁶ O Ampeu, O tsütsü qholo Nono axukighide lono panoqo hawuno kütsave nani.”