AKUMLO 2 - Sumi Naga CL (Re-edited) Bible (BSI)

Ampeu no Kütsave

¹ Ampeu no kishi Pa mlokighide lono khüngküsü no Zion nga küzüluve kela! Pa no Israelmiw qhivütsünyi keu atsütsü lono ayeghi lo veqhive tsü; Pa mlokighide tsalani Pa ye Pa pukhu kinepu kümsü mlave.

² Ampeu no küpükini kühano Jacob kungoa kümtsü kütsavae; Pa no Judah sükusho-aqo Pa loghu lono kubove tsüae; kükaqha eno tile yepemi Pa no akukujopu shi ayeghi lo sünhe saiqighivae.

³ Israel kumto kümtsü Pa no ayiküsa shi kishekhave tsüae; aghümi zülono Pa no panoqo launo Pa u ajeu süchile luvae; Pa ye Jacob lau ami mili toi iqü, hokümxa lo akeqo kümtsü pitileve tsüe.

⁴ Aghümi lakhi toi Pa no Paw shexilika piqe luvae, Pa u ajeu no piqepe ngovae; ni nhethe lo azüküvü ache keqo kümtsü Pa no Zion nga phiki lono pithivae; Pa no ami toi Pa loghu pephevae.

⁵ Ampeu ye aghümi toivae; Pa no Israel munovae; tile kükaki kümtsü munovae; sükusho-aqo kütsaleve tsüae, eno Pa no Judah nga mloküsa ngo akumlo küghüsüve tsüae.

⁶ Pa no aghutu toi Pa pushonha, kuposhukulu-a kütsalevae; Ampeu no Zion pelo tiqhetini ngo Sabbath kümsümavepe, eno Pa mlo kighide lono akükau ngo achineu milivae.

⁷ Ampeu no Pa kiptia lomipi, Pa kimthe-a milivae; Pa no li kükaki liwoqo pesü aghümi u lo phesüve tsüae; tiqhetini tsala lo toi panongu no Ampeu ki lono angukashi ighae.

⁸ Ampeu no Zion liwo kütsaveni ke mtsüqhei shivae; Pa no akimghipu süta xachho; Pa ye kütsani keu lono Pa u süchileve moe; aqoghe ngo aliwo pelo mloqape; tipaqo no kümtsa ikiqi khave.

⁹ Li khagho ye ayeghi lo ilovae; Pa no li khaduqo hechhevae; li kükau ngo sakiphemi ye shiye gholo ani, ayezah ye kühavae, eno liw tungkupmi no Ampeu launo kungunhetsü ithumlavae.

¹⁰ Zion ngaw layemiqo ye inaqhoi ayeghi lo iqa anie; panoqo ye akütsü lo ayeghimkhu epuku no yeqhiyephi xapuvae; Jerusalem limiqo no pano kütsü pesü ayeghi lo shosüvae.

¹¹ Ni ye qakeno anhebo khoivae; I po no tsüghü minhe anie; Iw timi nga kütsave keu; aphughi laghila lo angakughunu eno itimiqo no thiqhi akeu ghenguno I tithizü ye ayeghi lo ijiqi ani.

¹² Mishighüna laghila lo izave kemi no thiqhi-thiqhi ake toi, aza no khape pülaghi pano küxü küxü süthauve ketoi panongu no panoqo paza lau ighamku, “Asho ngo aji khile ani kea?”

¹³ O Jerusalem limi, Ni ye o ghenguno kiu pini, kiu pesü o kimhe tsüni kea? O Zion limi athatheu, Ni ye o lokughuno tsü kepushi o pesü kiu kimihi shitsüni kea? Kughengu o mhekiqi ye azüghi pahi qhachhovae; khuu no o shipivi luni kea?

¹⁴ Ow tungkupmi no o ghenguno kichile eno pishikiqhi kungunhetsü ithulu; panongu ye o ngukümgha tsüchile peniye o xine pephe tsümoe, ikemu o ghenguno kichile eno sakibide tungkuptsa pitsüe.

¹⁵ Khunono o kathasü wu keno kümtsü no au kukhupe o tsüe; panongu no Jerusalem limi cheqhi eno akütsü küzü ghi pi: “Kupukülai keu jukivi, ayeghiqha kümtsü lokivipu, ipi chekeu mishighüna huye hi keshea?”

¹⁶ O ghümi kümtsü no kujojo o mjochile ani; panongu no cheqhi, ahu tsüghü eno ighamku: “Nino li munovae! Ah, nino kheche keu tsala ye hike; itehi ye niw shivae; nino ithuluvae!”

¹⁷ Ampeu no kiu miji akeno; Pa no püzüu no azah tsükeu, Pa tsa pape ghi amloighi qhiyi keu kühano shikupuvae; Pa no aghümi pelo o shou alovipe eno o ghümi kumto süqhetsüe.

¹⁸ Panoqo no Ampeu lau ighae. O Zion limiw aliwo kuptu, putho pucho tsüqhu-tsüghu akeshi anhezü no qowu pelo! No ampi kulhoqhi kevilo, o nhethi küghüqü kevilo!

¹⁹ “Putho hikuju kikili dolo, eno putho lo ithu ighamku lo! Ampeu zülo azü lephe ketoi o mlo lhephe lo! O tianuli khunoqo akhüava shi alaghila kümtsü lo thiqhi thiqhi ani keno, panongu küxü ghenguno Pa lau o u süqhelo.”

²⁰ O Ampeu, julo! No ye khuu lau hitoi shiju kea? Totimi ye pano tita lo xathi, atianuli pano no tuchomjo chekeu chuni keshea? Ampeuw akimthe-a lono achineu ngo tungkupu pithini keshea?

²¹ Alaghila lo ayeghimkhu lo kichimi itimi athoshi ikiqi ani; Iw ilimi eno apumiqo ye azütakikihi lono ikiqivae; Nono O mlokighide tsala lono kimiyemo no panoqo pithivae.

²² Nono tiqhetini tsala lo toi aqha kümtsü lono I shikichi kepu kusü, eno Ampeu mlokighide tsalani khumu pomla momu xümlave; I no khunoqo khape eno saputhu keno I ghümi no kütsave.