AKUMLO 1 - Sumi Naga CL (Re-edited) Bible (BSI)

Mishighüna ye Yenguyivae

¹ Timi chhitoi achekeu ghüna huye kishi yenguyive akela! Shiyeqo dolo kije shi achekeu li huye kishi chimemi lakhi toive akela! Akuaqha lo kükaliu shi ache keu itehi li ye aqüaxeu shivae.

² Anhezü no li gimuchu lono qo ghi puthotsü li ye mloqa ani; li lomiqo dolo khunomu li lokughuno tsüni keu kühae; li küsami kümtsü no li pishiqhipe thechuvae; panongu ye li ghümi shivae.

³ Akaghashi mlape eno pishipuju keu ghenguno Judah ye hakiphi sawuvae; itehi li ye shiyeqo dolo xü ani, eno akulhokiqhi-a ithulu amoe; li no aghime kitikhi shiake lono li hache kemi no li botha luvae.

⁴ Zion lo kuwu laqo no mloqa ani, kughengu khunomu aghulhu lo ighimo ke; liw khagho kümtsü ixapinyivae; li chinemiqo no ijuqa ani; ililhotheqo pesü ghimevae, li ampi ghi mijimlai sü auvae.

⁵ Li ghümiqo no ampemi shivae; li ghümiqo no kinikülü shivae, kughengu li xine kitikhi ghenguno Ampeu no li ghimeve ke; li nuliqo ye akughumi shisü aghümi no sawuvae.

⁶ Zion limi kükanguagha kümtsü li launo chevae. Liw kükapumiqo ye ashe no achu kümza-a phumla ke toivae; panongu ye akumto kühano pano hache kemi zülo poke.

⁷ Aghime eno kupokiche ghuloki lono Jerusalem no khaghi liw shiche keu akughupu thime jeli kümtsü kümsüchilelu anie. Kughou liw timi no aghümi u lo ilove no li kukuphumi kühave keno, li ghümiqo no alokivi shi li cheqhi; panongu no li vekiqhi thaighae.

⁸ Jerusalem no zaghishi axine shive, tighenguno li ye niqhinilaivae; li gihu chekemi kümtsü no li jukünatha ani, kughengu panongu no li phikümsa ithuluvae; li ampi no aghime ghügha igha eno li gi küsü luvae.

⁹ Li mithekumo ye li mini lo ani; li ye ighini keu tsala ghenguno kümsüju move; tigheno li vekiqhi ye kümsapuke; li ye aloinokütsüu kühae. “O Ampeu, I ghime julo, kughengu aghümi no toluvae!”

¹⁰ Liw akughupu thime kümtsü aghümi no süxa luvae; kughengu shiye khipaqo Nono O kukuhomi gholo ilo pemoni keu shi ani keno, tipaqo no akimthe-a lo iloghi keu li no ithuluvae.

¹¹ Liw timiqo no asho phuche kelo kümtsü no aghime ghügha shie; panongu no pano kumto püxü niye küakini pesü achuqupu kilichu. “Julo, O Ampeu, eno kümsüju tsülo, kughengu ni ye küthaküghapu shi anie.”

¹² “Nongu itsüche keqo müzülo hi ye kiumu kumo keshea? Julo, I mloghime khikhi Ampeu no Pa loghu tsala lono I shou pukutsü keno titoi keu mloghime ani kemo keno kümsüju lo.

¹³ “Pa no kunguu no ami puwu; tipau piqi no I ghi lo ilovepe; Pa no I pukhu lo alichhe qhitsü; Pa no I tutsüghüve; atsala kupuju aghimeshi I pelo thüghüi ngovepe.

¹⁴ “I xine pesü kuokhasü lo tshü; Pa u no tipaqo tsügha küqhave; tipaqo pesü I kuo lo xipipe; I kükakumto ye tomlavepe; I no khunoqo mjomla keno tipaqo u lo Ampeu no I phesüve ke.

¹⁵ “Akumtomi I zülo akeqo kümtsü Ampeu no milivae; Iw apumiqo kütsa nike Pa no I lachile ghi ahoho kusüe; Judah nga athatheliu pesü atsaithi qoda keshi Ampeu no nedavae.

¹⁶ “Hipaqo ghenguno I no qa ani; I nhethi lono anhezü qole ani; kughengu aloinokütsüu, I ghungu püxü tsünikeu ye putou wuvae; I nuliqo ye küghüküghaleivae kughengu aghümi no toluvae.”

¹⁷ Zion no au xachho, ikemu li lokughuno tsüni kemi kühae; Ampeu no Jacob kisüghüu pelo pa ghümi shipenike azah tsüvae; Jerusalem ye pano dolono niqhinilai keu lakhi shivae.

¹⁸ “Ampeu ye achipi, ikeghi I no Pa tsa hebideve ke; ikemu inilo, nongu ashiayeqo, eno I ghichheghime julo; Iw ilimi eno apumiqo ye küghape akughu lo wuvae.

¹⁹ “I no I kimiye chekemi kue, ikemu panoqo no I pishiqhive; I chinemi eno layemiqo ye panoqo kumto püxü kitheni ye achuqupu phuche kelono mishighüna lono pühavae.

²⁰ “O Ampeu, I no iju akeu jutsülo; I po no minhe anie; I mlo no ipopinyi ani, kughengu I no shishe hebideve ke. Alaghila lo azütakikihi no amlo shikughuju tsü ani; aki lono akithi likhi anie.

²¹ “Panongu no I küsü ghügha chilu kemu khunomu I lokughuno tsüni kemi kühae. I ghümi kümtsü no ti chiluvae; Nono hipau shivae pi panongu ye alovi anie. Nono sheshuke tsala lono saghivae; itehi ye panoqo ghi I toive pelo.

²² “Panow küsakügha kümla kümtsü O zülo süghi pelo, eno Nono I xineqo ghenguno I ghime ketoi panoqo ghimelo; kughengu I küsü ghügha ye kutomo eno I mlo ye hauve anie.”