AKIKIHI 9 - Sumi Naga CL (Re-edited) Bible (BSI)

Hechekulu Pini

¹ Israelmi no Egypt lono ipeghive kethiu ampe akiniu aqhi atüghüu lo Ampeu no Sinai sayeqha lono Moses pütsa no pi,

² “Azah shipüakeu tsala lono Israelmi no Hechekulu pinini.

³ Hipa qhi atsala chighiabidini tsüzüve kethiu nongu no Hechekulu khuaye eno ayezah kiqi lono ti pinini.”

⁴ Ikehu Moses no Israelmi vilo Hechekulu pini penike pive.

⁵ Eno Ampeu no Moses azah tsükeu kiqi lono aqhi atüghüu lo atsala chighiabidini tsüzüve kethiu Israelmi no Sinai sayeqha lono Hechekulu pinilu.

⁶ Ikemu tilehi timi khami khunoqo akithi kumo bulukeu vecheo mithe move no tipani Hechekulu pini mlave keno, panongu no Moses ngo Aaron pama lau ighi no

⁷ pi, “Ningu no akithi kumo buluke lono mithe move aghi namu kushiye azah shipüakeu tsala lo ni pelo kütami gholono Ampeu lau akümllagho tsüpemo kea?”

⁸ Moses no pi, “Ampeu no nongu vehulo azah kiu tsüni keno I no huqhe junike khe aghilo.”

⁹ Ampeu no Moses pütsa no pi,

¹⁰ “Israelmi vilo pilo, Nongu na nongu kughukomi khukhumu akithi kumo buluke lono mithe move, momu ala kushuo lo kicheghüzü shiuve aghi namu pa ye Ampeu lau Hechekulu pinini.

¹¹ Panongu no aqhi akiniu atsala chighiabidini tsüzüve kethiu no kholaqhi sümokeu sho ngo khumtsai keu yetsüni gholono ti chuno pinini.

¹² Kiukiu chuqupu mu thanau kutolo qhimoni, eno lhoxü saghi lakhimu kubove moni; panongu no Hechekulu khuaye kümtsü pape ghi ti pinini.

¹³ Ikemu khuu no kicheghüzü lo wumo eno achinepu lo mithe apülaghi Hechekulu pini moni keno, pa ye azah shipüakeu tsala lo Ampeu kümllagho süghimo kehu paw timiqo gholono hapheveni; pa xine ye pa no xapuni.

¹⁴ Tsala inami lakhi no nongu gholono Ampeu lau Hechekulu pini nishi aghi aye, pa ye Hechekulu khuaye eno tipau yezah kiqi lono pinini. Aghakütsami eno inaghami ghenguno akhuaye ye aqüshi lakhi peni.”

Khüngküsü no Aphiki Küzüluve

¹⁵ Aphiki shiluke tsalani khüngküsü no Puloshoqhi bohu kiqhi-a küzüpho luve. Avelau no Aphiki shou ipeghi keu huno thanau inaqhe kutolo ami toi ngove.

¹⁶ Ikehu alhokuthu lo hitoi acheuve: puchou no khüngküsü huno Aphiki küzü eno putho lono ami ipeghiche.

¹⁷ Kugho kughomu Aphiki lono khüngküsü taikuve aye Israelmi no aghazü xakiqhe wuveche, eno khile no iqighini keno tile aghazü shiveche.

¹⁸ Israelmi no aghazü xakiqhe wukeu eno ngokeu kümtsü Ampeu zakütsü lono shiche. Khüngküsü no Aphiki shou ake tivilo panongu ye aghazü shipe ache.

¹⁹ Khaniloye khüngküsü no Aphiki shou atsala kutomo ishokibe ngovemu panongu ye Ampeu zakütsü luniye itha mono ngoche.

²⁰ Khaniloye khüngküsü no atsala hami likhi ache, eno Ampeu zakütsü lono panongu no aghazü lo ngove no itaghi iqewuve che.

²¹ Eno khaniloye kijiliu no iqighi no thanau kuto likhi ache, ikehu khüngküsü no ikuve kemtsa panongu no wuveche, momu tino putho-pucho ngovemu kughou no taikuveni keno panongu no wuveche.

²² Atsala kini, momu aqhi ampe kutolo mu khüngküsü no Aphiki shou ake tivilo panongu ye itha mono ngoveche, eno tino ikuve kethiuno wuche.

²³ Ampeu no Moses vecheo azah tsükeu pape ghi panongu no aghazü shi eno xakiqhe cheke.