AKIKIHI 8 - Sumi Naga CL (Re-edited) Bible (BSI)

Akulu Tsüni

¹ Ampeu no Moses vilo pi,

² “Aaron pütsa no pilo, Kughou nono akulu küqüni keno akulu tsüni huye akibepu gizüu yekulupu shi qhilo.”

³ Eno Ampeu no Moses azah tsüke toi Aaron no akuluqo pesü akibepu züu qhive.

⁴ Akulu kibepu ye ayihesü no ameshoyi hephape axugha mlakeu ke. Ampeu no Moses piye püake toi, pa no apukhu lono iku akibepu kutolo tipau ghola lono ayihesü pesü axugha mlaphe.

Levimi Shikimthe

⁵ Ampeu no Moses vilo pi,

⁶ “Israelmi gholono Levimi kusawo panoqo shikimthelo.

⁷ Panongu shikimthe nike nono hitoi shini: shikimthekütsü zü pesü panongu küzütelo, eno panongu no aqe pesü pano phimpi kuchopu miyeveni, tithiu no aphimini ishive no azü kuchhuveni.

⁸ Tishino panongu no amshitsü lakhi, athi kümllagho sala ashomkhu kivi thazü lo kiteve keu süghini, eno nono axine kümllagho ghenguno amshitsü lakhi luni.

⁹ Nono Levimi kümtsü sawo Aphiki zülo qhino Israelmi qoaho kümtsü kukütsüni.

¹⁰ Kughou nono Levimi sasü Ampeu zülo ighini keno, Israelmi no panongu u pesü Levimi shou beni,

¹¹ eno panongu pelo Ampeu kümla shi apenike Aaron no Israelmi launo akimchi kümllagho shi ghi Levimi ikhiphepe Ampeu tsüni.”

¹² Tishino Levimi no panongu u pesü amshitsü kütsü lo beni, eno panoqo ghenguno tha-lo tsünike amshitsü lakhi no axine kümllagho eno lakhiu no akipti kümllagho shi Ampeu tsüni.

¹³ Tithiu nono Levimi sasü Aaron ngo pa nuli zülo qhino panoqo pesü Ampeu lau akimchi kümllagho shi tsüveni.

¹⁴ “Hitoi nono Israelmi gholono Levimi pesü kütüta shiveni, eno panoqo ye Iw shini.

¹⁵ Kughou nono Levimi shikimtheve no akimchi kümllagho shi tsüve akeno, tithiuno panongu ye Aphiki lo mlaithani ke iloni.

¹⁶ Kughengu panongu ye Israelmi gholono qhoi ikhipe I tsüve ake. Israel lo anu anoghiu züqhulo I no panongu pesü I salashi luvae.

¹⁷ Kughengu Israelmi gholo timi na tüghashi namu anoghiu thaqhü ye Iw ke. Panongu ye I no Egypt lo anu anoghiu thaqhü pithiveke tsalani no I salashi kishekimthe ke,

¹⁸ ikemu itehi ye panongu züqhulo Levimiu luvae.

¹⁹ Eno Israelmi ghenguno Aphiki lo hukuthu kümla eno tha-lo keu kümla shi penike I no Israelmi gholono Levimi pesü agho lakhi shi Aaron ngo pa nuliqo tsüvae, tishianguno Israelmi no mthamini Akimthe-a phivilo ighilu namu panongu lau asagha ighimo nani.”

²⁰ Levimi ghenguno Ampeu no Moses azah tsüke toi pa ngo Aaron eno Israelmi qoaho kümtsü no hitoi Levimi lau mlake.

²¹ Levimi no axine lono pano ampi shikimthe no aphimini ishive, eno Aaron no akimchi kümllagho shi panoqo pesü Ampeu lau tsü püzü shikimthe tsüniye panongu ghenguno tha-love tsü.

²² Tipa thiuno Levimi no Aphiki lo Aaron ngo pa nuliqo gholo pano kümlapu shinike ilove; Ampeu no Levimi ghenguno Moses lau azah tsüpüake toi panongu no titoi shive.

Levimi Kulhokiqhi

²³ Ampeu no Moses vilo pi,

²⁴ “Levimi ghenguno hitoi shilo: Apunu mpe muku pungu eno kunguu thaqhü ye Aphiki lo hukuthu kümla shinike ighini.

²⁵ Eno ampe lhopungu lono panongu ye mlamove no akümla lono akulho qhiveni.

²⁶ Panongu ye pano thiküzümi no Aphiki lo mla akelo kuphulu nani kemu lotoshi mlalu moae. Levimi kümlapu kughutsü kelo no ye hitoi shini.”