AKIKIHI 6 - Sumi Naga CL (Re-edited) Bible (BSI)

Nazirmi Shoqhi

¹ Ampeu no Moses vilo pi,

² “Israelmi pütsa no pilo, Kughou kiptimi momu totimi lakhi no pa kishe kütüta shipe Ampeu tsünike akimchi shoqhi, Nazirmi shoqhi, shini keno,

³ pa ye atsaiji eno aji kümka lono putosüni. Pa ye atsaiji momu aji kümka küghümüve keu shomoni, atsaizü mu shomoni momu atsaithi aküxü na akipki namu chumoni.

⁴ Pa no Nazirmi shiake tivilo atsaibo lo pekighi, alothi na ayiko namu chumoni.

⁵ “Pa no kütüta shipe akeu shoqhi lo ake tivilo aqe pesü pa kütsüsa dimoni. Pa no khikutolo pa kütashi Ampeu lau anikeu piqhi keno tipa do tomoke kutolo pa ye akimthe shini. Pa ye akütsüsa kipili kushuo qhini.

⁶ “Pa no pa kütashi Ampeu lau ake tivilo akithi kumo phivilo wumoni.

⁷ Pa puaza momu chepu-cheli no thive namu, pa kütashi Alhou tsüve keu shoqhi ghenguno pa ye pa ampi shikitiqe moni.

⁸ Pa no kütüta shipe ake tivilo Ampeu lau akimthe shini.

⁹ “Tsala züleno pa phivi lono timi thive no kishekimtheve keu kütsüsa shipixive aye, pa ye atsala akütsüniu, pa shikimtheni keu tsala lono akütsü miyeveni.

¹⁰ Atsala akütacheu lono pa ye miqhedu momu amiqhi kini pesü Kuposhukulu Phiki kulaghi lo achineu lau ighini,

¹¹ akithi kumo vecheo pa shipixive kehu achineu no aghau lakhi pesü axine kümllagho eno lakhiu no akipti kümllagho shipe pa ghenguno tha-lo tsüno tipani no pa kütsüsa kishekimthe tsüni.

¹² Pa pelo Nazirmi shi anikeu do kupulu penike Ampeu lau ikhiphe kithe tsüni, eno akipimi kümllagho ghenguno ampe lakhi mbe süghini. Ikemu pa no püzüu Nazirmi shi ighive keu do ye shipixive akehu kihimoae.

¹³ “Nazirmi ghenguno ayezah hi anie, kughou pa kütashi akeu do kupuni keno: pa sasü Kuposhukulu Phiki kulaghi lo ighini,

¹⁴ eno akipti kümllagho ghenguno ampe lakhi mbetsü, axine kümllagho ghenguno ampe lakhi mbequ, eno külakishi kümllagho ghenguno anetsü, lakhikhi tukutiye kühakeu pesü pa kümllagho shi ghi Ampeu tsüni;

¹⁵ pa no kholaqhi sümokeu sho ashoghi lakhi, ashomkhu akiviu pesü thazü lo kiteve keu sho, zümzümüi keu sho, tipaqo gholo athi ngo atsaizü kümllagho ishi tsüni.

¹⁶ Achineu no hipaqo pesü Ampeu zülo qhino axine kümllagho ngo akipti kümllagho shini,

¹⁷ eno kholaqhi sümokeu sho ngo anetsü pesü külakishi kümllagho tsüni. Itaghi pa no athi ngo atsaizü kümllagho tsüni.

¹⁸ Tithiu Nazirmi huno pa kütsüsa kishekimtheve keu Aphiki kulaghi lono miyepe külakishi kümllagho shi akeu mi lono pitiveni.

¹⁹ Pa no tishive kethiu anetsü shi beleve keu abi lakhi eno kholaqhi sümokeu shopa ngo zümzümüi keu sho lakhikhi achineu no pesü Nazirmi u lo sütsüni,

²⁰ eno achineu no tipaqo peqhepe Ampeu zülo akimchi kümllagho shi ghi tsüni. Amlashi ngo alukoshi pesü achineu ghenguno akimthe saje shitsü keu gholo hipaqo ghi pa salae. Tithiu Nazirmi huno atsaizü shoni.

²¹ “Hi no Nazirmi yezah ke. Ikemu pa no toluye Nazirmi shoqhi kiyeve ghi Ampeu lau akümllagho tsünike tushoqhi aye, pa no piqhi püakeu gholau no pa ye Nazirmi yezah gholono tishilu nanie.”

Aaronw Kükümgha

²² Ampeu no Moses pütsa no pi,

²³ “Aaron ngo pa nuliqo vilo pilo, Nongu ye hitoi Israelmi kümgha tsüni: nongu no panoqo vilo ishi pilo,

²⁴ Ampeu no nongu kümghatsü no nongu tucho peniu;

²⁵ Ampeu gi küvü nongu shou apeni eno nongu lau küpüqhiyi peniu;

²⁶ Ampeu no Pa gi peqhepe nongu shou jupukulu no aloino keu nongu tsüpeniu.

²⁷ “Panongu no hitoi I je pesü Israelmi shou beni, eno I no panongu kümgha tsüni.”