AKIKIHI 5 - Sumi Naga CL (Re-edited) Bible (BSI)

Mithekumomi

¹ Ampeu no Moses pütsa no pi,

² “Israelmi vilo timi khukhumu ayiko lo kitixe küsü, momu aphighü lono azü iji, eno akithikumo dilukeu lono mithe move keu ye aghazü lono hapheveni keu za tsülo.

³ Kiptimi na totimi namu no ye aghazü khalau panoqo hapheveni, tishianguno panongu no aghazü khipau mta lo I no acheni keno shikitiqe monani.”

⁴ Ikehu Ampeu no Moses vilo pike toi Israelmi no aghazü lono panoqo hapheve.

Pikiphe eno Lokichile

⁵ Ampeu no Moses vilo pi,

⁶ Israelmi vilo pilo: Kiptimi momu totimi lakhi no axine kümla shive no Ampeu lau pükhükibe kubove kelo, pa no pa kipimi kümsüchilelu aye,

⁷ pa ye axine pipheni; eno pa kipimi qhemi lono lochileni, tipau gholo saje muku ghi süküpha no khuu lau akumou shive keno pa loni.

⁸ Ikemu timi tipau no thive aghi no ame luni kemi abolomi kühave aye, ti ye Ampeu tsüvekeu shi achineu tsüveni, tipau gholono küqüve keu timi huno küthakulo mbetsü pesü tsüno pa pi tha-loni.

⁹ Israelmi no akimthepu lo hitoi qhapesü achineu lau süghi keu ye paw shive nike za.

¹⁰ Milakhikhi no akimthepu lo kiu kiumu qhapesü achineu lau süghive keu ye achineu sala shiveni.

Asalha Ghenguno Peju

¹¹ Ampeu no Moses vilo pi,

¹² “Israelmi vilo pilo, Tsala milakhi nipu no ala kumo lo wuve no pükhükibe kubove,

¹³ pa züküsüuno kütami no li sasü kütüqhave aghini; eno li ampi ye shipixive akemu akimi no mtha, eno kitiqe akelono thopi shilu keu kühave aye;

¹⁴ tsala pülüküpsa huno akimi lolo iloghive no pa nipu pülüpüsa, momu anipu no li ampi shipixi püaghimo no akimiu no pülüpüsa aghi aye,

¹⁵ pa ye anipu ghenguno barley shomkhu ahu lakhi pesü li sasü achineu lau ighini. Pa ye ashomkhu lo thazü momu axokütsüngü mukhu pesü kitemoni, kughengu ti ye pülüküpsa ghenguno athi kümllagho, axine kümsükulu kümllagho ke.

¹⁶ “Tishino achineu no li sawo Ampeu zülo qhini.

¹⁷ Pa no akimthe zü lepe ayeghi li lo süno Puloshoqhi bohu kiqhi-a ghüza lo ayeghimkhu hami ikhipe azü lo süni.

¹⁸ Tithiu pa no Ampeu zülono li sa xükhove tsüno kümsükulu kümllagho, ti ye pülüküpsa ghenguno athi kümllagho, pesü li u lo sütsüni. Eno pa u lo angusü süghi chekeu akukhu zü pesü ngoni.

¹⁹ Tileno achineu no li pelo tushoqhi penike ishi pini, “Timi khumu o sasü zü püaghimo, eno nono o kimi gholo akelo mithekumo kitiqe mphie pi aye, angusü süghi chekeu akukhu zü hipau ye o shipüsamo nani.

²⁰ Ikemu nono o kimi gholo apülaghi ala kumo lo wuve, eno o kimi nguno kütami sasü züve no o shipixive aghi aye,

²¹ (achineu huno atotiu pelo angusü shoqhi shipelo, eno li vilo pilo) ‘Ampeu no o lhoa sükütsüve tsüno o phimpi shikughunguve tsü peni, eno ow timi gholo angusüu shipeni.

²² Angusü süghi chekeu zü hipau no o kive lo ilo no o puqho ngo o phimpi inguuve peni.’ Eno atotiu no khochileni, ‘Amen, Amen.’

²³ “Tithiu achineu no angusü hipaqo yepe akukhu zü lo süno qhuveni.

²⁴ Eno atotiu pelo angusü süghi chekeu akukhu zü yeve peni, azü tipau no li lolo ilove no kukhukimji küsü süuve nani.

²⁵ Tileno achineu no li u lono pülüküpsa ghenguno athi kümllagho luve no Ampeu lau ikhiphe tsükeu shi akiptia lo süghini.

²⁶ Eno kuchopu kipti kümllagho michishi ashomkhu au kichhi lakhi epe akiptia lono pitive no tithiuno azü pesü atotiu piyeni.

²⁷ Tsala li no shupuve no akimiw pükhükibe kubove aghi aye, azü huno li lolo ilove no kukhukimji küsü süuve nani, li tita no inguuve, alhoa no sükütsüve, eno li ye timi gholo angusüu shive nani.

²⁸ Ikemu li no shipixi mono mithe aghi aye, li ye ililai shi anuli mishilu nani.

²⁹ “Hino anipu lakhi no akimi sasü apülaghi li ampi shipixive kelo pimhe kepu yezah,

³⁰ momu akimi lolo pülüküpsa anipu shou ikughive kelo pimheni keu ke. Akimi no anipu sawo Ampeu zülo qhino achineu no akhuaye hipaqo shimasae.

³¹ Akimi ye akipimi lono kuqhoveni akemu anipuu no axine jume puniae.”