AKIKIHI 4 - Sumi Naga CL (Re-edited) Bible (BSI)

Kohath, Gershon, eno Merarimi Kümlapu

¹ Ampeu no Moses pütsa no pi,

² Levi kughuko lo Kohath laghami, ali eno abolomi kikithi lono aje kihikütsü lo,

³ ampe shighi lono lhopungu dolo khunoqo no kuposhukulu phiki lo mlalu nani keno kümtsü kihilo.

⁴ Panongu kümlapu ye hike: shishe akimthepu thime peithani.

⁵ Kughou aghazü iqeve kepu shini keno, Aaron ngo pa nuliqo no ilo nhaqhiphi xape Puloshoqhi Bohu khonhani.

⁶ Panongu no ashiyiko küküzü lo süve no itaghi tipau shou atsüla phi kupuju no khobeni, tithiuno kuhope kepu sü chuxusüni.

⁷ Ampeu zülo asho kibepu shou panongu no atsüla phi qhano tipau shou akhu ajukhu, axokütsüngü kümlla bohu, atsaizü kümlla khu-ajukhu; alhoaye lo asho qhiche keu ghi tile qhini.

⁸ Tishino panongu no huchuyike phi pesü tipau khonhave no itaghi ashiyiko küküzü lo süveni, tithiuno kuhope kepu sü chuxusüni.

⁹ Panongu no atsüla phi pesü akulu kibepu, akuluqo, tsümtsa, alazayi khu, eno thazü bohu kümtsü küzüni.

¹⁰ Eno ashiyiko küküzü lo tipaqo süve no awophe shou qhini.

¹¹ Panongu no atsüla phi pesü ameshoyi xokütsüngü kiptibo khonhave no ashiyiko küküzü lo süni, tithiuno kuhope kepu sü chuxusüni.

¹² Akimthe-a lo peitha chekeu liqo pesü atsüla phi shou qhino ashiyiko küküzü lo süni, tishino pewo awophe shou qhini.

¹³ Panongu no akiptia lono ayevu miyeqhive no hughaike phi pesü tipau khonhani.

¹⁴ Eno akiptia lo peche keu nhemghaqo, amikhu, ayiküba, amikihepu, chithakhu, kümtsü tipau shou qhini; tishino ashiyiko küküzü lo süno kuhope kepu sü chuxusüni.

¹⁵ Kughou Aaron ngo pa nuliqo no Akimthe-a eno tipau lo tinhemgha kümtsü küzü khaveni keno, tithiu no Kohath laghami no tipaqo xapu nike ighini, ikemu panongu ye akimthepu thimeqo bumoni, tikumo aye thive nosake. Kohath laghami no Aphiki lo nhemgha xapuni keu ye hipaqo ke.

¹⁶ “Achineu Aaron nu Eleazar no akulu ghenguno thazü, axokütsüngü kümlla, alhoaye lo athi kümlla, nukikishe thazü, Puloshoqhi bohu kiqhi-a eno tile ache keqo kümtsü shou jukükütsüu shini.”

¹⁷ Ampeu no Moses ngo Aaron pama vilo pi,

¹⁸ “Levi kughuko lo Kohath laghami kütsave nosake jukuto lo,

¹⁹ mthamini panongu no shishe akimthepu thime phivilo ighi kelo thive mono xülu penike hitoi pekithilo: Aaron ngo pa nuliqo no ilo panongu lakhikhi kümlapu eno akho kuto tsüni,

²⁰ ikemu Kohathmi ye akimthepu thimeqo kitilamu junike ilomoni, tikumo aye panongu ye thive nani.”

²¹ Ampeu no Moses pütsa no pi,

²² “Gershon lagha lo ghi ali eno akibo kiqi lono kihikütsü julo.

²³ Ampe shighi lono lhopungu dolo khunoqo no Kuposhukulu Phiki lo mlalu nani keno, kümtsü nono yekütsüni.

²⁴ Puqhe peqheni keu kümla lo Gershon laghami ghenguno ishi kughutsü:

²⁵ Aphiki alou eno ashou nhaqhiphi, tipau küküzü eno ashiyiko küküzü, Aphiki kulaghi lo nhaqhiphi akeu, hipaqo peni,

²⁶ Aphiki khala lo nhaqhiphi, Puloshoqhi bohu ngo akiptia bocho kulaghi lo nhaqhiphi akeqo, eno akighi ngo kütau thime peitha chekeqo, tinguno alau akümlapu ipeghi keu kümtsü shini.

²⁷ Gershonmi kümlapu, panongu no puqhe peqhe kepu kümtsü Aaron ngo pa nuliqo zakütsü lono shini. Eno panoqo no xapu kepu kho kümtsü nongu no kuto tsüni.

²⁸ Achineu Aaron nu Ithamar kichekütsü qholono Aphiki lo Gershon laghami mla kepu akeu ye hipaqo ke.

²⁹ “Merari laghami ghengu ye, pano li eno akibo kiqi lono nono kihini.

³⁰ Ampe shighi lono lhopungu dolo Aphiki lo mlaluni kemi kümtsü nono yekütsüni.

³¹ Panoqo no Aphiki lo nhemgha hipaqo xapuni: Puloshoqhi bohu kiqhi-a lo axu puthu piphi, atsükucho eno tipaqo boqhayi,

³² Aphiki khala bokütha tsükucho eno tipaqo boqhayi, akuhoyi, eno akighi ngo mudomgho thimeqo. Milakhi khino kiu nhemgha xapu kepu keno nono aje yekütsüni.

³³ Achineu Aaron nu Ithamar kichekütsü qholono Aphiki lo Merari laghami kümlapu ye hipaqo ke.”

³⁴ Tithiu Moses ngo Aaron eno aqoaho lo atomi no Kohath laghami, ali eno akibo kiqi lono kihikütsü,

³⁵ ampe shighi lono lhopungu dolo khunono Aphiki lo mlalu nani keno,

³⁶ kihiju kelo pano 2,750.

³⁷ Ampeu no Moses vecheo azah tsü ketoi, Moses ngo Aaron pama no Kohath lagha lo Aphiki lo kümlami hijehi kihilue.

³⁸ Gershon laghami, ali eno akibo kiqi lono kihikütsü kelo,

³⁹ ampe shighi lono lhopungu dolo khunono Aphiki lo mlalu nani keno,

⁴⁰ kihi kelo pano 2,620.

⁴¹ Ampeu zakütsü kiqi lono Moses ngo Aaron pama no Gershon lagha lo Aphiki lo kümlami hijehi kihilue.

⁴² Merari laghami, ali eno akibo kiqi lono kihikütsü kelo,

⁴³ ampe shighi lono lhopungu dolo khunono Aphiki lo mlalu nani keno,

⁴⁴ kihi kelo pano 3,200 aghi.

⁴⁵ Ampeu no Moses vecheo azah tsü ketoi, Moses ngo Aaron pama no Merari lagha lo Aphiki lo kümlami hijehi kihilue.

⁴⁶ Moses ngo Aaron eno Israel lo atomiqo no Levimi khunoqo alagha eno ali kiqi lono kihikütsü keno,

⁴⁷ ampe shighi lono lhopungu dolo Aphiki lo hukuthu kümla eno akhokupu kümla shiluni kemi kümtsü

⁴⁸ küqha kelo pano 8,580 aghi.

⁴⁹ Ampeu no Moses vecheo azah tsü ketoi milakhi khino hukuthu kümla lo keo akhokupu lo keno Moses no yekütsü luve.