AKIKIHI 36 - Sumi Naga CL (Re-edited) Bible (BSI)

Külauve kemi Totimi Mheghi

¹ Gilead lo Joseph lagha lo Manasseh nu Makhir limi atomi no Moses ngo Israel lo atomi lau ighi no pi,

² “Ampeu no I mpeu azah tsüno asaqhibe pe Israelmi ayeghi kijetsü lopi eno Ampeu zakütsü kiqi lono I mpeu no ni bolomi Zelophehad yeghi ye pa ngaqo tsülo pike.

³ Ikemu tsala panongu no alagha kütami sasü külakupu shive aye, pano mheghi yeghi ye ningu puasü mheghi lono pesü panongu no khuno lagha lau külaveni keno, tipanow shiveni cheni. Ikelo asakiqhi lono ni mheghi yeghi ye ni launo süwuveni cheni.

⁴ Eno kughou Israelmiw Jubilee ighini keno, pano mheghi ye panongu no külailo kemi gholo küpha auveni cheni, eno tishi aye, pano mheghi ye ni puasü lagha mheghi lono pewuvae.

⁵ Tile Moses no Ampeu zakütsü kiqi lono Israelmi vilo pi, “Joseph shiaye no pi akeu ye achipi.

⁶ Ampeu no Zelophehad ngaqo vehulo ishi azah tsü ani, ‘Panongu no pulo keu sasü külakupu shilu nani, ikemu ti ye pano lagha likhi sasü külani.

⁷ Israelmi mheghi ye alagha lakhi lono lakhiu lo pekiqe wumoni ikemu Israelmi kümtsü no pano puasü mheghi pükhani.

⁸ Israelmi shiaye lo totimi khuu no amheghi ighilu püaghini keno, li ye li papuno shiaye lo külaulu nani, tishianguno Israelmi kümtsü no pütüta puasü mheghi pükhalu nanie.

⁹ Tishikeu lono kiu mheghi mu ashiaye lakhi lono lakhiu lau pekiqe womo nani eno ashiaye kümtsü pütüta mheghi pekibe wolu nani ke.’”

¹⁰ Tighenguno Zelophehad ngaqo no Ampeu no azah tsüke toi shive,

¹¹ Zelophehad ngaqo Mahlah, Tirzah, Hoglah, Milcah, eno Noah noqo ye panongu papu thiküzümi nuliqo sasü külauve.

¹² Panongu ye Joseph nu Manasseh limi sasü külauve eno panoqo mheghi ye pano lagha lo acheuve.

¹³ Ayezah eno pimheye hipaqo ye Moab qa lo Jordan phivilo Jericho lono Ampeu no Moses vecheo Israelmi tsüke.