AKIKIHI 35 - Sumi Naga CL (Re-edited) Bible (BSI)

Levimi Phughi

¹ Moab qa lo Jordan phivilo Jericho lono Ampeu no Moses vilo pi,

² “Israelmi vilo panongu mheghi lono aphughi hami eno tipa sükümxa lo achu kümza yeghi hami pesü Levimi tsülo pilo.

³ Mishighüna tipaqo ye Levimiw shi panongu no xüni eno achu kümza yeghi no panow pichepighi sala shini.

⁴ Achu kümza yeghi nongu no panoqo tsünikeu ye aphughi liwo lono auxakuchho 450 toike qhitsülo eno ti ye aphughi homxa tsüni.

⁵ Aphughi no amta lo qhive no tipau khalau no kipelau, apeu, kulolau, eno ahuu ako kümtsü lo auxakuchho 900 kophelo.

⁶ “Nongu no Levimi tsükeu mishighüna lono itshükulupu phughi tsügho shitsüni eno tipaqo gholo mishighüna lhobidi kini süküphani.

⁷ Mishighüna eno achu kümza yeghi nongu no Levimi tsüni keu ye lhobidi tache.

⁸ Eno Israelmi mheghi lono mishighüna Levimi tsüni keu ye hitoi shilo: ashiaye kije launo kutomo ikhiphe tsülo eno kitila launo aghulo ikhiphe tsülo, ti ye pütüta mheghi kiqi lono ikhipheni.

Itshükulupu Phughi

⁹ Ampeu no Moses vilo pi,

¹⁰ “Israelmi vilo pilo, Kughou nongu no Jordan kathasü Canaan yeghi lo iloni keno,

¹¹ nongu ye itshükulupu phughi kishepe qhino timi lakhino kütüngülu kelono kütami pithive aye, pa pelo tilau itshülu pelo.

¹² Mishighüna tipaqo no amkhükuluu launo sükusho-a shilu pelo eno timi ghiqhive keu huye aqha zülono pa shou küghatha moke kutolo pa pithimo no tilau ngolu pelo.

¹³ Nongu no mishighüna tsükeu no itshükulupu phughi tsügho shini.

¹⁴ Küthü no Jordan kukuu eno küthü no Canaan yeghi lo tsüni.

¹⁵ Hipaqo no Israelmi na, inami na, momu kupokichemi namu, khuana no kütüngülu kelono kütami pithive aye, pa pelo tilau itshülu pelo.

¹⁶ “Ikemu pa no ayi pesü heqhi pithive aye, pa ye timi hekiqhimi ke ghenguno pithiveni.

¹⁷ Momu pa no atu pesü kütami heqhi pithive aye, pa ye timi hekiqhimi ke ghenguno pithiveni.

¹⁸ Momu pa no asü pesü heqhi pithive aye, pa ye timi hekiqhimi ke ghenguno pithiveni.

¹⁹ Kughou akithiu bolomi amkhükuluu no timi hekiqhiu sholuni keno, tileno pa pithiveni.

²⁰ Tsala timi lakhi no khuana jumithi kelauno itshüpe kheano pa tuhakulu momu kiuala pesü veqhi pithive aye,

²¹ momu mithi kelauno pa u no kütami heqhive aye, timi tipau ye pithiveni, kughengu pa ye timi hekiqhimi ke. Kughou amkhükuluu no timi hekiqhiu sholuni keno, tileno pa pithiveni.

²² “Ikemu timi lakhi no ashi-aghümi kumo kemi khuana kütüngülu kelono tuhakulu momu itshüpe khemo no kiuala pesü veqhi pithive aye,

²³ momu pa ghümi kumomu eno ithithai no ghüzani ye kumono kütüngülu kelono atu pesü veqhive momu jukuto mono atu pheqhi veqhi pithive aye,

²⁴ aqoaho no ayezah kiqi lono timi pithive keu ngo amkhükuluu dolo xatha tsüni.

²⁵ Tishino aqoaho no amkhükuluu launo timi heqhive keu xapheni eno timi tipau sasü itshükulupu phughi khile pa no pove keno, tilau kighide puwuveni. Eno tipa ghuloki lo tilau achinetou khuu shou akimthe thazü no nukishe püa keno, pa no thimphi kutolo timi huye tile xüaghini.

²⁶ Ikemu timi hekiqhiu no itshükulupu phughi lughi vechesü khalau ipeve aye,

²⁷ eno amkhükuluu no pa sasü itshükulupu phughi nguno khalau no kusholu no pa heqhive aye, amkhükuluu shou kiumu akipimi shimoni.

²⁸ Kughengu timi hekiqhiu ye achinetou no thimoke kutolo itshükulupu phughi lo amasae, eno achinetou no thive kethiu no pa mheghi yeghi lo idewolu nani ke.

²⁹ Akhuaye hipaqo ye nongu no xüake-a lo tiqheli kümtsü lo pepimhe chelo.

³⁰ “Milakhi no kütami pithive aye, timi hekiqhiu ye thopimi shepe vecheo pithiveni. Ikemu khumu thopimi lakhi shepe lono pithi moni.

³¹ Tinguno alau, timi hekiqhiu küxü ghenguno xakipheme lumoni, pa ye thive masae.

³² Titoi timi khuu no itshükulupu phughi lo pove keno, pa pelo achinetou no thimphi lono pa mheghi yeghi lo idewolu penike xakipheme lumoni.

³³ Nongu no küghüna akeu yeghi shipixi moni, kughengu aji kichijive keu no ayeghi shipixive cheni eno ayeghi lo aji kichijive keu ye timi hekiqhiu ji no kumo aye kiunomu lochile mlae.

³⁴ Nongu no küghüna akeu yeghi shipixi moni, kughengu Ni Ampeu ye tile Israelmi gholo acheni ke.”