AKIKIHI 32 - Sumi Naga CL (Re-edited) Bible (BSI)

Jordan Kipelau Ngove kemi

¹ Reuben ngo Gad shiaye ye pichepighi kütsasa ache kehu panongu no Jazer ngo Gilead yeghi ithulu kelo pichepighi ghenguno alo nani kepi ithive.

² Ikehu panongu no Moses ngo Eleazar eno aqoaho lo atomiqo lau wuno pi,

³ “Ataroth, Dibon, Jazer, Heshbon, Nimra, Elealeh, Sebam, Nebo eno Beon,

⁴ aghakhu khikhi Ampeu no Israelmi zülono kütsakungove keno, hipaqo ye pichepighi yeghi shi ani, eno ningu ye kutomo ani.”

⁵ “Tighenguno nino nongu mlo kiqipu shiaghi aye, aghakhu hipau pesü ni mheghi shive tsülo eno ni sasü Jordan katha iku kevilo.”

⁶ Moses no khochile, “No thiküzümi no aghüshi akelo nongu ye hilau ngo auveni keshea?

⁷ Kushiye nongu ye Israelmi no Ampeu no tsükeu yeghi lo ilo niye akelo panongu ghüthi püsüve tsüani kea?

⁸ Kadesh-barnea lo ayeghi puju peniye I no nongu papuqo puwu kelo panoqo no hitoi shike.

⁹ Panongu ye Eshcol Khila kutolo wuno ayeghi ithulu kemu Ampeu no tsükeu yeghi lo timiqo pelo ilope moniye aghüthi püsüve tsüe.

¹⁰ Eno tipani Ampeu no amloide tushoqhive,

¹¹ ‘Jualo, kiptimi ampe muku nguno kunguu khije Egypt lono ipeghi keno milakhi mu I no Abraham, Isaac, eno Jacob lau piqhi püakeu yeghi lo ilo pemoae, kughengu panongu no amlo kuchopu pesü I papemoe,

¹² Kenimi Jephunneh nu Caleb ngo Nun nu Joshua pama likhino ilo nani, kughengu pama ye amlo kuchopu pesü Ampeu pape ke.’

¹³ Ampeu no timiqo shou amloideve no Pa zülo axine shive keu tiqhelimi no thikhave moke kutolo panoqo pelo asayeqha lo ampe lhobidi itsü chewuve peke.

¹⁴ Julo, Israelmi shou Ampeu xukighide kighishe penike nongu axinemi tianuliqo no nongu papuqo theli lo ipeghivae!

¹⁵ Kughengu nongu no Pa pape move aye, Pa no itaghi timi hipaqo kümtsü asayeqha lo qhive nani, eno nongu no panoqo kütsave nanie.”

¹⁶ Panongu no Moses kupunu ighi no pi, “Ni pelo ambe ghenguno bokütha eno ni tianuli ghenguno aphughi shilu pelo,

¹⁷ tishino nino aghünanu kutope Israelmi züu shino pano yeghi kutolo sawo qhinani. Ikemu hipa ghakhu lo küami launo sükusho ghenguno ni tianuliqo ye aliwo kuptu phughiqo lo amasae.

¹⁸ Israelmi kümtsü no amheghi ithulu moke kutolo ningu ye ni kibo lo ideighi moe.

¹⁹ Kughengu ningu ye Jordan kukuu panoqo gholo kiu mheghi mu ighimo nani, kughengu Jordan kipelau hi kukuu no ningu saje ithuluve ake.”

²⁰ Ikehu Moses no pi, “Nongu no tishini pi aye, eno Ampeu zülono aghü shinie pi aghünanu kuto aye,

²¹ nongu gholo ghüshimi thaqhü Ampeu no Pa ghümi halekhave moke kutolo Pa zülono Jordan kathasü wuni pi aye,

²² eno aghakhu kümtsü Ampeu nhethe lono qhasü luve aye; tileno nongu ye idewolu nani eno tithiu ye Ampeu lau eno Israelmi lau kiumu bemakho kühave no Ampeu zülono hipa yeghi pesü nongu mheghi shiluve nani.

²³ Ikemu nongu no hitoi shimo aye, julo nongu ye Ampeu zülo axine shivae eno tipau xine no nongu shou akipimi ikughi nani pütsae.

²⁴ Nongu tianuli ghenguno aphughi shiluve lo eno no mbeqo ghenguno bokütha shiluve lo ikemu nongu no kiu piqhive akeno ti shimasae.”

²⁵ Gadmi ngo Reubenmi no pi, “Ni mpeu no azah tsüke toi o qemi no shini.”

²⁶ Ningu nipu anuli eno niw pichepighi ye Gilead lo mishighünaqo lo ngove peni,

²⁷ ikemu ni mpeu no azah tsü aketoi ningu ghüshimi thaqhü no Ampeu zülono aghü shinike katha ikuni.

²⁸ Tighenguno Moses no achineu Eleazar ngo Nun nu Joshua eno ali tomiqo vilo azah hitoi tsü,

²⁹ “Gad ngo Reuben ghüshimi thaqhü no Ampeu zülono Jordan katha ikuno pano kukuphu lono nongu no ayeghi qhasü luve aye, Gilead ghakhu pesü pano mheghi shive tsülo.

³⁰ Ikemu panongu no aghünanu kutope Jordan katha ikumo aye, panongu ghi nongu gholono Canaan lo amheghi tsülo.”

³¹ Gadmi ngo Reubenmi no khochile, “Ni mpeu no o qemiqo lau kiu za tsüani keno ningu no ti shini.

³² Ningu no Ampeu zülono aghünanu kutope katha ikuno Jordan kipela hilau ni mheghi ighi luni.”

³³ Tighenguno Moses no Gad ngo Reubenmi eno Joseph nu Manasseh lagha tüxa lau Amorimi kükau Sihon ghakhu ngo Bashan kükau Og ghakhu eno panow mishighünaqo ngo ti sükümxa kümtsü kophe tsüve.

³⁴ Eno Gad laghami no Dibon, Ataroth, Aroer,

³⁵ Atroth-shopan, Jazer, Jogbehah,

³⁶ Beth-nimrah eno Beth-haran shiqhe no aliwo mlave eno ambeloji ghenguno bokütha süve.

³⁷ Reubenmi no Heshbon, Elealeh, Kiriathaim,

³⁸ Nebo, Baal-meon (aje tipaqo kilive tsü) eno Sibmah shiqhe. Panongu no shikitheve keu phughiqo je kukideve tsü.

³⁹ Manasseh nu Makhir limi no Gilead ghakhu leluve no tipau lo Amorimi akeqo hapupove.

⁴⁰ Eno Moses no Gilead pesü Makhir limi tsüve no panongu no tilehi ngove.

⁴¹ Manasseh nu Jair no aphuqo lewu no khasü luve eno tipaqo pesü Havvoth-Jair kuvetsü.

⁴² Nobah no wuno Kenath eno tipa qhalo aphuqo leluve eno pa je kiqi lono tipa-a pesü Nobah kuve.