AKIKIHI 31 - Sumi Naga CL (Re-edited) Bible (BSI)

Midian shou Amkhükulu

¹ Ampeu no Moses vilo pi,

² “Midianmi shou Israelmi mkhü lulo. Tithiuno no ye thive nani.”

³ Tighenguno Moses no timiqo vilo pi, “Aghü shinike kutolo, nongu vecheo Ampeu loghu Midianmi shou pukuni cheni.

⁴ Ashiaye lakhi lo ghüshimi qhethonhe lakhikhi puwulo.”

⁵ Ikehu ashiaye lakhi lo qhethonhe lakhikhi kishephe kelo aghüshi ghenguno qhethonhe chighikini kütsülu.

⁶ Moses no ghüshimi hekütsülu keqo aghüshi lo puwuve, panoqo gholo achineu Eleazar nu Phinehas pelo akimthe-a lo abohu ngo kütüghü kepu afuko ishi pesü wupe.

⁷ Ampeu no Moses azah tsüke toi panongu no Midianmi sasü aghü shino kiptimi kümtsü pithi khavetsü.

⁸ Panongu no Midian kükami pungu pithive tsü: Evi, Rekem, Zur, Hur, eno Reba. Panongu no Beor nu Balaam ghi pithive.

⁹ Israelmi no Midianmi totimi ngo atianuliqo küghalu khave, eno pano pichepighi, ambeloji ngo küakini kümtsü hakho pewuve.

¹⁰ Pano no xüchekeu mishighüna ngo aghazü kümtsü pitive tsü,

¹¹ eno timi ngo lhoxü kümtsü hakho pewuve.

¹² Tishino panongu no akughumi ngo hakhokulu thimeqo pesü Moses ngo achineu Eleazar eno Israelmi qoaho lau ighi, panongu ye Moab qa yeghi, Jordan phivilo Jericho lo aghazü shipe ae.

¹³ Moses ngo achineu Eleazar eno aqoaho lo atomi kümtsü no aghazü khalau ipeghi no ghüshimi sasü kusholu.

¹⁴ Moses ye aghüshi lono ideighi keqo gholo kijemi, qhethonhe ngo aqhe zatsümi shou amlo ideve.

¹⁵ Pa no pi, “Nongu ye totimi kümtsü püxüve akea?

¹⁶ Julo, hipaqo no Peor lo Balaam mijekütsü lono Israelmi pelo Ampeu lau pükhükümla shipe keu lono AMPEUw timiqo shou püsa ighike.

¹⁷ Tighenguno itehi itimiqo gholo kiptimi thaqhü eno totimi dolo kiptimi sasü kikivive aghi kemi thaqhü ghiqhive lo.

¹⁸ Ikemu ilimi khunoqo no athathe shiaphi keno nongu sala qhiveni.

¹⁹ Khunoqo no timi ghiqhive momu akumo dive akeno kümtsü aghazü nguno khalau atsala tsüni ngoni, eno atsala aküthüni ngo akütsüniuni nongu eno nongu no kügha saghi keqo achine khuaye lono shikimtheni.

²⁰ Nongu ye aphimini, ashiyiko nhemgha, anemhi eno asü no mlakeu jeli kümtsü shikimtheni.”

²¹ Tishino aghüshi lono ideighi kemi vilo achineu Eleazar no pi, “Ampeu no Moses azah tsükeu ye hike:

²² ameshoyi, ghükayi, alazayi, ayi, ayipa eno aküsayi,

²³ thime khipaqo ami no pitimla keno, tipaqo ami lono piti kimtheni, ikemu tipaqo ghi mithekumo qhukimthe chekeu zü lono shikimtheni. Tinhemgha khikhi ami no pitive nani keno, tipaqo ye azü lono qhukimtheni.

²⁴ Atsala akütsüniu lo nongu phimini ishiveni eno nongu ye mithe luve nani. Tithiuno aghazü lo iloghini.”

²⁵ Ampeu no Moses vilo pi,

²⁶ “No eno achineu Eleazar nokujo gholo aqoaho lo ali tomi küqhano akughumi eno lhoxü hakholu keqo kihiju lo,

²⁷ eno tipaqo pesü amqo kini shi kijelo, lakhino aghüshi lo wu kemi eno lakhino aqoaho kümtsü saje.

²⁸ Ghüshimi saje lono Ampeu ghenguno asüqha ikhithalo, ti ye timi na, amshitsü, khurha, ambe loji namu 500 lo lakhi pesü tsüni.

²⁹ Tipaqo pesü Ampeu lau küqhaphe keu shi achineu Eleazar tsüni.

³⁰ Eno Israelmi saje lono timi na, amshitsü, khurha, ambe loji namu 50 lo lakhi ikhiphepe Ampeu phiki jukuto chekemi Levimi tsüni.”

³¹ Ampeu no azah tsükeu kiqi lono Moses ngo Eleazar pama no shive.

³² Ghüshimi no hakholu keu kümtsü kelo ambe no lakh tsügho qhethonhe lhotsüni pungu,

³³ amishi no qhethonhe lhotsüni kini,

³⁴ khurha no qhethonhe lhotsügho lakhi,

³⁵ eno akughumi ilithathe kümtsü kelo qhethonhe shighi kini.

³⁶ Ghüshimi saje tüxa kihi kelo ambe no lakh küthü qhethonhe shighi tsüni no aqhe pungu,

³⁷ tile Ampeu saje no ambe 675.

³⁸ Amishi no qhethonhe shighi tsügho, tile Ampeu saje no 72.

³⁹ Khurha no qhethonhe shighi no aqhe pungu, tile Ampeu saje no 61.

⁴⁰ Akughumi no qhethonhe chighitsügho, tile Ampeu saje no 32.

⁴¹ Ampeu no azah tsüke toi Moses no asüqha pesü achineu Eleazar tsüve.

⁴² Israelmi qoaho saje, ti ye Moses no ghüshimi launo kijetha tsü keu lo—

⁴³ aqoaho saje lono ambe no lakh küthü qhethonhe shighi tsüni no aqhe pungu,

⁴⁴ amishi no qhethonhe shighi tsügho,

⁴⁵ khurha no qhethonhe shighi no aqhe pungu,

⁴⁶ eno akughumi no qhethonhe chighitsügho—

⁴⁷ Israelmi saje lono Ampeu no azah tsüke toi Moses no timi ngo lhoxü 50 lo lakhi ikhipe Ampeu phiki jukuto chekemi Levimi tsüve.

⁴⁸ Tithiu ghüshimi shou kijemi, qhethonhe ngo aqhe shou zatsümi no Moses lau ighi,

⁴⁹ eno pi, “O qemiqo no ghüshimi khije ni zakütsü qholo ani keno kihiju kelo milakhi mu pühapighi püamoe.

⁵⁰ Eno milakhikhi no kiu ithulu keno, ameshoyi, au kükha, apukhu kükha, jedapu nguthi, akinikighi, eno achi pesü Ampeu zülo ni ghenguno lochiletsü penike akümllagho süghi ani.”

⁵¹ Moses ngo Eleazar pama no panongu launo ameshoyi ngo aulo kümla thime kümtsü ikhiluve.

⁵² Ikelo panongu no Ampeu lau ameshoyi küqha tsükeu mighi kelo ahu 1,842 tüxa aghi.

⁵³ (Ghüshimiqo ye pütüta müzülo hakholu keu thimeqo qhiluve ke.)

⁵⁴ Moses ngo Eleazar pama no ghüshimi shou kijemi eno qhethonhe ngo aqhe shou zatsümiqo launo ameshoyi pesü kuposhukulu phiki lo Ampeu zülo ilove; eno ti ye Israelmi ghenguno kümsüchile keu michipu shi tsüke.