AKIKIHI 30 - Sumi Naga CL (Re-edited) Bible (BSI)

Kiptimi eno Ashoqhi

¹ Moses no Israel shiaye lo sakiphemi vilo pi, “Ampeu no hitoi azah tsü ani.

² Kughou timi lakhi no Ampeu lau ashoqhi shini, momu pa ampi lau akütsügha shoqhi shini keno, pa ye pa shoqhi kubove moni, ikemu pa kichi lono pikeu kiqi lono thokha papeni.

Totimi eno Ashoqhi

³ “Tsala ilimi lakhi no li papu kilo aphi lono Ampeu lau ashoqhi shino li ampi no akütsügha shoqhi shiveni,

⁴ eno li no ashoqhi momu akütsügha shoqhi shikeu li papu no chilu no kiumu lachilemo aye, li shoqhi huye shikupuve masa, eno li no piqhive keu kümtsü shikupuve masae.

⁵ Ikemu li papu no chiluke tsalani no li shoqhi tipau lakha aye, li no akütsügha shoqhi shikeu ye avehu kühavae. Eno Ampeu no li kipimi qhivetsü nani, kughengu li papu no li lakhave ke.

⁶ “Tsala li no ashoqhi shipüake lono momu kümsüju mono ashoqhi shive no külauve aye,

⁷ eno li kimi no ti chiluke tsalani no li vilo kiumu pimo aye, li ye ashoqhi momu akütsügha shoqhi shikupuve masa.

⁸ Ikemu li kimi no chiluke tsalani no li lakha aye, li no ashoqhi momu kümsüju mono ashoqhi shive keu pa no shipühave tsüae. Eno Ampeu no li kipimi qhivetsü nani.

⁹ (Ikemu chimemi momu akibo ixave keu totimi no akütsügha shoqhi shiaye ti ye shikupuve masae.)

¹⁰ Tsala totimi lakhi no li kimi ki lono akütsügha shoqhi shi aye,

¹¹ eno li kimi no chilu no kiumu pimo eno lakhamo aye, li no akütsügha shoqhi shikeu ye shikupuve masa.

¹² Ikemu li kimi no chiluke tsalani no li shoqhi lakha aye, li kichi lono piqhi püakeu shoqhi kümtsü avehu kühavae. Li kimi no tipaqo lakhave ke Ampeu no li kipimi qhivetsü nani.

¹³ Li no kiuala shoqhi momu bekütha shoqhi shikeu kümtsü lo shikumto tsüni keu momu hexave tsüni keu ye li kimi shou ke.

¹⁴ Ikemu li kimi no tsalakipetsü li vilo kiumu pimo aye, li no akütsügha shoqhi shi püakeu kümtsü li kimi no iqhikumto tsü ani, kughengu pa no chiluke tsalani li vilo kiumu pimove ke.

¹⁵ Ikemu pa no ashoqhi tipaqo hexa aye, li kipimi ye pa shou ikughi nani.”

¹⁶ Hi no kiptimi totimi dolo eno ilimi lakhi no li papu kilo akelo pepimhe kepu khuaye Ampeu no Moses tsükeu ke.