AKIKIHI 3 - Sumi Naga CL (Re-edited) Bible (BSI)

Aaron Nuliqo

¹ Sinai to lo Ampeu no Moses sasü küptsake ghuloki lo Aaron ngo Moses pama polo kughukomi hipaqo ache.

² Hipaqo no Aaron nu: Nadab no anoghiu, Abihu, Eleazar, eno Ithamar.

³ Pa nu hipaqo ye nukisheve keu chinemi, panoqo pelo achinemi shi Ampeu huthu penike pa no anguagha betsü.

⁴ Ikemu Nadab ngo Abihu pama ye Sinai sayeqha lono Ampeu zülo mithekumo mi pesü mlla kelono Ampeu zülono thive, eno pama ye anuli kühave. Tighenguno Eleazar ngo Ithamar pama no Aaron küxü tivilo achinemi shiche.

Levimi Kümlapu

⁵ Ampeu no Moses pütsa no pi,

⁶ “Levi laghami sasü kupunu ighi no panongu pelo achineu Aaron huthu penike süsülo.

⁷ Panongu no I kungo phiki lo mla akelo, Aaron khekutoni eno Kuposhukulu Phiki zülo aqoaho jukutoni.

⁸ Panongu no tile tinhemgha kümtsü jukütsüni eno I kungo phiki lo mla akelo Israelmi kümlapu saje mlani.

⁹ Nono Levimi pesü Aaron ngo pa nuliqo tsüni; panongu ye Israelmi gholono qhoi ikhipe Aaron tsüvae.

¹⁰ Eno nono Aaron ngo pa nuliqo süsüni, panongu no achine kümlapu jukuto anani. Ikemu khalaumi khuu khumu aphivilo ighikeu ye pithiveni.”

¹¹ Itaghi Ampeu no Moses pütsa no pi,

¹² “Julo, I no Israelmi gholo anu anoghiuqo züqhulo Levimi luvae. Panongu ye Iw shiniae,

¹³ kughengu anu anoghiu thaqhü ye Iw ke. Egypt yeghi lo I no anu anoghiu kümtsü pithiveke tsala lono Israelmi kibo loye timi na tüghashi namu, anoghiu thaqhü ye I no Iw shinike kishekimtheve. Ikehu panongu ye Iw shinani. Ni ye Ampeu ke.”

¹⁴ Sinai Sayeqha lono Ampeu no azah Moses tsüno pi,

¹⁵ “Levi polo kughukomi ali eno alagha kiqi lono kiptimi aqhi lakhi nguno kunguu thaqhü nono aje yekütsüni.”

¹⁶ Ikehu Moses no Ampeu tsa kiqi lono yekütsüve.

¹⁷ Hipaqo no Levi nu: Gershon, Kohath eno Merari.

¹⁸ Gershon nu kini: Libni ngo Shimei.

¹⁹ Kohath nu bidi: Amram, Izhar, Hebron, eno Uzziel.

²⁰ Merari nu kini: Mahli ngo Mushi. Levi kughuko lo alagha kiqi lono timi hipaqo je yekütsü lue.

²¹ Gershon launo Libni ngo Shimei limi ikowove; hipaqo no Gershon laghami shive.

²² Kiptimi aqhi lakhi nguno kunguu thaqhü yekütsü kelo pano kikihi ye 7,500.

²³ Gershon laghami ghazü ye kulolau Aphiki thiu shinikeu shie,

²⁴ eno Lael nu Eliasaph no Gershonmi gholo ali tou shie.

²⁵ Kuposhukulu Phiki lo panongu kümlapu ye Puloshoqhi bohu kiqhi-a, tipau küküzü, akulaghi lo nhaqhiphi jukutoni keu,

²⁶ Aphiki khala lo nhaqhiphi, Puloshoqhi bohu kiqhi-a eno akiptia bocho lo ilonikeu hukikha lo nhaqhiphi, eno tipaqo kighi jukütsüni, hitoi keu kümlapu kütau kiu kiumu mla penike kughutsü.

²⁷ Kohath launo Amram, Izhar, Hebron, eno Uzziel limi ikowove.

²⁸ Kiptimi aqhi lakhi nguno kunguu thaqhü kihi kelo akimthe-a khemi pano 8,600 aghi.

²⁹ Kohath laghami ghazü ye Aphiki apeu küdau shinikeu shie,

³⁰ eno Uzziel nu Elizaphan no Kohath lagha lo aliqo shou atou shie.

³¹ Panongu kümlapu no Puloshoqhi Bohu, asho kibepu, akulu kibepu, akiptia, achinemi no peitha chekeu akhu ajukhu, eno Akimthe-a kulaghi lo nhaqhiphi jukütsüni, hitoi keu kümlapu kütau kiu kiumu mla penike kughutsü.

³² Achineu Aaron nu Eleazar no Levimi atomiqo shou atou shino Akimthe-a lo mlaitha akemi jukükütsüu shipe.

³³ Merari launo Mahli ngo Mushi limi ikowove.

³⁴ Kiptimi aqhi lakhi nguno kunguu thaqhü kihi kelo 6,200 aghi.

³⁵ Abihail nu Zuriel no Merari lagha lo aliqo shou atou shi. Panongu ye Aphiki ahuu aghazü shinikeu shie.

³⁶ Panongu kümlapu ye Puloshoqhi bohu kiqhi-a chebo lo axu puthu-piphi, atsükucho ngo tipaqo boqhayi, eno mudomgho thime jeli, hitoike kümla kütau kiu kiumu mla penike kughutsü;

³⁷ Aphiki khala homxape atsükucho ngo tipaqo boqhayi, akuhoyi eno akighi akeqo ghi jukuto penike pichetsü.

³⁸ Moses eno Aaron ngo pa nuliqo no kipelau Puloshoqhi bohu kiqhi-a eno Kuposhukulu Phiki zülo aghazü shino Akimthe-a khekuto, eno Israelmi süshoni keu shi. Khalaumi khuu khumu aphivilo ighi keu ye pithiveni keu shie.

³⁹ Ampeu zakütsü lono Moses ngo Aaron pama no Levimi khunoqo je yekütsü keno, kiptimi aqhi lakhi nguno kunguu thaqhü ali kiqi lono küqha kelo qhethonhe muku kini aghi.

Anu Anoghiu Xachilekulu

⁴⁰ Ampeu no Moses vilo pi, “Israelmi nu anoghiu kümtsü aqhi lakhi nguno kunguu thaqhü kihiju lo.

⁴¹ Israelmi nu anoghiu theli lo no ye I ghenguno Levimi ikhiluni, eno Israelmiw pichepighi piti tüghüu theli lo Levimiw ikhiluni, Ni ye Ampeu ke.”

⁴² Ikehu Ampeu no azah tsü ketoi Moses no Israelmi nu anoghiu kümtsü yekütsü.

⁴³ Eno kiptimi aqhi lakhi nguno kunguu thaqhü aje yekütsü kelo qhethonhe muku kini aqhe kini no lhotsüni küthü aghi.

⁴⁴ Itaghi Ampeu no Moses vilo pi,

⁴⁵ “Israelmi nu anoghiu theli lo Levimi lulo, eno Israelmiw pichepighi piti tüghüu theli lo Levimiw lulo. Levimi ye Iw shini: Ni ye Ampeu ke.

⁴⁶ Israelmi nu anoghiu pano 273 no Levimi nu kikihi kiyeve keu lo panongu xachilelu kepushi

⁴⁷ no ye anu lakhikhi lo Akimthe-a lo peitha chekeu shekel pungu no qhüni (ti ye shekel lakhi lo gram 11),

⁴⁸ eno tipau pisa ye panongu xachilelu keu me shi Aaron ngo pa nuliqo tsülo.”

⁴⁹ Ikehu Moses no anu tipaqo launo xachilekulu pisa luve.

⁵⁰ Pa no Israelmi nu anoghimi launo akimthe-a lo peitha chekeu shekel 1,365 luve.

⁵¹ Eno Ampeu tsa kiqi lono pa no Aaron ngo pa nuliqo tsüve.