AKIKIHI 28 - Sumi Naga CL (Re-edited) Bible (BSI)

Tsalakipe Kümllagho

¹ Ampeu no Moses vilo pi,

² “Israelmi azah tsüno pilo, ‘Nongu ye ado kihikütha do kiqi lono I kümllagho, I chuqupu, I chuqupu kümllagho, I lopu xokütsüngü, süghilo.’

³ Itaghi ishi pilo, Achuqupu kümllagho ishi Ampeu lau süghini: tsalakipe kümllagho shi ampe lakhi mbetsü tukutiye kühakeu kini.

⁴ Ambe lakhino inaqhe no tsüni eno lakhiu no tsüküzü lono tsüni;

⁵ tipa gholo ashomkhu akiviu ahu kini toike pesü thazü ahu lakhi toike gholono kunuve keu ghi pesü tsüni.

⁶ Hi ye tsalakipe kipti kümllagho Ampeu lopushi tsüngqüi achuqupu kümllagho tsü peniye Sinai Toghi lono huthu tsükeu ke.

⁷ Ambeti lakhikhi gholo atsaizü kümllagho ahu lakhi tsülo. Akimthe-a lo atsaizü kümllagho mkamghai keu Ampeu lau leqhilo.

⁸ Ambeti lakhiu no tsüküzüu no mllani. Inaqhe athi kümllagho eno atsaizü kümllagho toi Ampeu lopushi tsüngqüi achuqupu kümllagho shi ghi tsülo.

Sabbath Kümllagho

⁹ “Sabbath tsala loye ampe lakhi mbetsü tukutiye kühakeu kini, athi kümllagho shi ashomkhu ahu bidi thazü gholono kunuve keu, eno atsaizü kümllagho tsülo:

¹⁰ tsalakipe kipti kümllagho ngo atsaizü kümllagho gholo hi no Sabbath atsütsü lo akipti kümllagho tsünikeu ke.

Aqhi kithe Kümllagho

¹¹ Aqhi bothu lo Ampeu lau akipti kümllagho hitoi tsülo: tukutiye kühakeu mishitsü kini, anetsü lakhi, ampe lakhi mbetsü tsüni;

¹² amshitsü lakhikhi gholo athi kümllagho shi ashomkhu ahu tsügho thazü gholono kunuve keu pesü mllani, eno anetsü gholo athi kümllagho shi ashomkhu ahu bidi thazü gholono kunuve keu pesü mllani;

¹³ ambeti lakhikhi gholo athi kümllagho shi ashomkhu ahu kini thazü gholono kunuve keu pesü Ampeu lopushi tsüngqüi mllalo.

¹⁴ Amshitsü lakhi ghenguno atsaizü kümllagho ye ahu kini toike, eno ambetsü lakhi gholo ahu lakhi tüxa eno ambeti lakhi gholo ahu lakhi toike mllalo. Hi no ampe kupuju aqhi atsütsü lo akipti kümllagho shini keu ke.

¹⁵ Ampeu lau axine kümllagho tsünikeu ye tsalakipe kipti kümllagho ngo atsaizü kümllagho nguno alau ambetsü lakhi pesü tsüni.

Hechekulu kümllagho

¹⁶ Aqhi atüghüu lo atsala chighiabidiu no AMPEUw Hechekulu pine,

¹⁷ eno chighiapunguu no aghulhu tsala ke. Kholaqhi sümokeu sho atsala tsüni chuni.

¹⁸ Atsala atüghüu lo akimtheshi kuho kumqoni, kiu kümla mu shimoni,

¹⁹ ikemu Ampeu lau achuqupu kümllagho shi akipti kümllagho hitoi tsüni: amshitsü kini, ambetsü lakhi eno ampe lakhi mbetsü tsüni; hipaqo ye tukutiye kühakeu shini;

²⁰ athi kümllagho shi ashomkhu akiviu thazü gholo kunuve keu; ti ye amshitsü lakhi gholo ahu tsügho, ambetsü gholo ahu bidi;

²¹ ambetsü tsüni ghengu ye lakhikhi gholo ahu kini tsülo,

²² eno axine kümllagho sala anetsü lakhi pesü tsüno lochileni.

²³ Inaqhe kipti kümllagho nguno alau nongu no hipaqo pesü mllani.

²⁴ Tipaphi shi nongu no atsala tsüni Ampeu lopushi tsüngqüi keu chuqupu kümllagho pesü Pa tsülo. Ti ye tsalakipe kipti kümllagho ngo atsaizü kümllagho gholo küqhano tsüni.

²⁵ Eno atsala akütsüniu lo nongu no akimtheshi kuho kumqoni, eno kiu kümla mu shimoni.

Ghile Tiqhetini Kümllagho

²⁶ Ghile tiqhetini tsala atüghüu lo kughou nongu no athi kithe pesü akümllagho shi Ampeu tsüni keno, nongu ye akimtheshi kuho kumqo lo eno kiu kümla mu shimoni,

²⁷ ikemu Ampeu lopushi tsüngqüi akipti kümllagho hitoi tsülo: amshitsü kini, anetsü lakhi eno ampe lakhi mbetsü tsüni;

²⁸ eno athi kümllagho shi ashomkhu akiviu thazü gholo kunuve keu pesü hitoi tsülo; amshitsü lakhi gholo ahu tsügho, anetsü gholo ahu bidi,

²⁹ eno ambe tsüni ghenguno lakhikhi gholo ahu kini tsülo;

³⁰ anetsü lakhi pesü nongu ghenguno lochiletsü pelo.

³¹ Tsalakipe kipti kümllagho ngo atsaizü kümllagho nguno alau nongu no hipaqo pesü mllani. Hipaqo ye tukutiye kühakeu shini.