AKIKIHI 27 - Sumi Naga CL (Re-edited) Bible (BSI)

Zelophehad Ngaqo

¹ Zelophehad papu ye Hepher, Gilead nu, Makhir nu, Manasseh nu, eno Manasseh ye Joseph nu ke. Zelophehad ngaqo ye Mahlah, Noah, Hoglah eno Milcah.

² Panongu no kuposhukulu phiki kulaghi lo wuno Moses ngo achineu Eleazar, atomi eno aqoaho kümtsü zülo puthugho no pi,

³ “Ningu papu ye asayeqha lono thive. Pa ye Korah gholono Ampeu hebide kemi kumoe eno pa ye pa xine ghenguno thive ke. Pa ye anu lakhimu kühae.

⁴ Pa no anu kühave ke ghengu likhino kushiye Israel lo pa je hauve peni kea? Tighenguno nipu thiküzümi gholono amheghi ningu ghi tsülo.”

⁵ Moses no hipa vehu pesü Ampeu zülo qhitsü.

⁶ Eno Ampeu no pa vilo pi,

⁷ “Zelophehad ngaqo ye achipie. Panoqo papu thiküzümi gholono amheghi panongu ghi tsülo, pa mheghi ye panoqo u lo phesüve tsülo.

⁸ Eno Israelmi vilo pilo, ‘Milakhi no anu kühano thive aye pa mheghi pesü pa nga tsüvelo.

⁹ Eno tsala pa no anga küha aye pa mheghi ye pa thiküzümi tsüvelo.

¹⁰ Tsala pa no athiküzümi ghi küha aye, papu thiküzümi tsüvelo.

¹¹ Eno papu no athiküzümi küha aye, pano bolomi pa kupunu aghikeu tsüvelo. Ampeu no Moses vecheo azah tsüke toi hi ye Israelmi ghenguno pimheye shi pechelo.’”

Joshua no Moses Thisülu

¹² Ampeu no Moses vilo pi, “Abarim naghuto lo iqho no Israelmi lau I no tsü akeu yeghi juluve lo.

¹³ Nono ti ithuluve kethiuno no ghi o mu Aaron toi thive nani,

¹⁴ kughengu Zin sayeqha lo timiqo no hebide thuve kelo panongu zülo no ye akimtheshi Ni ikhilu moveke.” (Hi ye Zin sayeqha, Kadesh lo Meribah züpuki lono ke.)

¹⁵ Moses no Ampeu vilo pi,

¹⁶ “Ampeu, aküxüküa ghungu kümtsü Lhou no aqoaho sakipheu lakhi kishe tsülo

¹⁷ pa no timiqo züu shi ipeilo eno saphe pelo, tishianguno AMPEUw timiqo ye akheu kühakeu mbeloji toi pemonie.”

¹⁸ Ikehu Ampeu no Moses vilo pi, “Nun nu Joshua khuu lolo aghungu ani keno, pa sasü ighi no pa shou o u betsülo.

¹⁹ Pa pelo achineu Eleazar eno aqoaho kümtsü zülo puthughope no nono panoqo nhethe lono pa süküsü shilo.

²⁰ O kükanguagha hami pa tsülo, tishianguno Israelmi qoaho no pa gholu penie.

²¹ Pa no achineu Eleazar zülo puthughoni, achineu no pa ghenguno Urim xakütha vecheo Ampeu vilo inijuni, eno achineu tsa vecheo pa eno aqoaho kümtsü no kuhu-kuwo shini.”

²² Ampeu no azah tsüke toi Moses no tishive. Pa no Joshua sawo achineu Eleazar eno aqoaho kümtsü zülo qhi,

²³ eno Ampeu no azah tsüke toi pa u pesü Joshua shou beno süküsü shive.